Ilmi Harree Gaadhatee Yerusaalemitti Seene

Yesus harree ergifamte irra taaʼee Hosaanaa jedhamaa Yerusaalem seena, muka harbuu firii hin qabne ni abaara, daldaltoota mana Abbaa isaa keessaa ni baasa; kunis angafa luboota isa ajjeesuuf murteessa. Aangoo eenyuun jedhamee yommuu gaafatamu, waa'ee Yohannis isaan ni gaafata.

Boqonnaa 11.

Yesus Yerusaalemitti dhiyaatee, Betfaagee fi Betaaniyaa bira, Tulluu Ejersaa bira osoo jiruu, barattoota isaa keessaa lama dursee erge,

isaaniin, «Gara gamoo fuulduratti jirtu deemaa; yommuu ishee seentanittis, harree xinnoo nama tokko illee yeroo tokko iyyuu hin yaabbatin hidhamtee argitu. Ishee furaatii as fidaa.

Namni tokko yoo, ‹Maaliif kana gootu?› jedhee isin gaafate, ‹Gooftaan ishee barbaada, battalumatti as deebisee ishee erga› jedhaa.»

Isaanis deemanii harree xinnoo balbala bira daandii irratti alatti hidhamtee argatan, ishee furan. Warri achi dhaabatan keessaa tokko tokko, «Harree xinnoo sana maaliif furtu?» jedhanii isaan gaafatan. Isaanis akkuma Yesus isaaniin jedhe deebisan; namoonnis isaan gad lakkisan. Harree xinnoo sana gara Yesus fidanii uffata isaanii ishee irra baay'isan; inni immoo ishee irra taa'e. Namoonni baay'een uffata isaanii daandii irra tamsaasan; kaan immoo dahannaa baala qabu lafa qonnaa irraa muran tamsaasan. Warri dursanii fi warri duubaan hordofan, «Hosaanaa! Inni maqaa Abbaa keenyaatiin dhufu eebbifamaa dha! Mootummaan abbaa keenya Daawit isheen dhufaa jirtu eebbifamtuu dha! Iddoo ol-aanaa keessatti Hosaanaa!» jedhanii iyyaa turan.

Yesus Yerusaalemitti, mana qulqullummaattis seenee, wanta hundumaa naannoo ilaale; yeroon dheeratee waan tureef immoo kudha lamaan wajjin gara Betaaniyaa ba'e.

Yesus Muka Harbuu Abaare

Guyyaa itti aanutti, Betaaniyaa yommuu ba'anitti, Yesus beela'e. Muka harbuu baala qabu fagootti arge; wanti irra jiru jiraachuu baatu ilaaluuf gara isaa deeme. Yommuu irra ga'etti, yeroon harbuu waan hin ta'iniif baala malee homaa hin arganne.

Yommus mukicha, «Si irraa firii namni tokko illee bara baraan deebi'ee hin nyaatin» jedhe. Barattoonni isaas dhaga'an.

Yesus Mana Abbaa Isaa Qulqulleesse

Yerusaalemitti ga'anii, Yesus mana qulqullummaa seenee warra achitti gurguran fi warra bitan achii ari'uu eegale. Minjaala warra maallaqa jijjiiran fi teessoo warra gugee gurguran kuffise, namni tokko illee mana qulqullummaa keessaan meeshaa baadhatee akka darbu hin eeyyamne.

Innis isaan barsiisee, «Barreeffamee hin jiru moo: ‹Manni koo manni kadhannaa saboota hundumaaf in waamama›? Isin garuu godoo hattootaa isa gootaniirtu» jedhe.

Luboonni gurguddoon fi barreessitoonni kana dhaga'anii, ummanni hundi barsiisa isaatti waan dinqisiifateef isa sodaatanii, akkamitti isa balleessuu akka danda'an barbaadan.

Yommuu galgala ta'etti, magaalaa keessaa ba'an.

Ganamaan yommuu achiin darbanitti, muka harbuu sana hundee isaatii eegalee gogee argan. Phexros yaadatee, «Yaa Barsiisaa, ilaali! Muka harbuu ati abaarte sun gogeera» jedhee isatti dubbate.

Yesus deebisee isaaniin, «Abbaa keenyatti amanaa. Dhugaa isiniin jedha, namni tulluu kanaan, ‹Ol kaafamii galaanatti darbatami› jedhee, garaa isaa keessatti osoo hin shakkin, wanti jedhe akka ta'u amanee, isaaf in godhama. Kanaaf isiniin jedha: wanta kadhattanii kadhattan hundumaa, akka argattan amanaa, kan keessan in ta'a. Yommuu dhaabattanii kadhattan, namni tokko irratti wanta qabattan hundumaa dhiifama godhaa, akka Abbaan keessan inni waaqa irra jiru cubbuu keessan isiniif dhiifamuuf.» ^a

Aangoo Eenyuutiin?

Ammas Yerusaalemitti deebi'an. Yesus mana qulqullummaa keessa osoo deemuu, luboonni gurguddoon, barreessitoonni fi jaarsoliin gara isaa dhufanii, «Aangoo maaliitiin kana gootaa? Yookiin eenyutu kana gochuuf aangoo kana siif kenne?» jedhanii gaafatan.

Yesus isaaniin, «Ani gaaffii tokko isin nan gaafadha. Na deebisaa, anis aangoo maaliitiin wantoota kana akkan godhu isiniin nan jedha. Cuuphaan Yohannis waaqa irraa moo kan namaa ture? Na deebisaa.»

Isaan of-keessatti mari'atanii, «Yoo ‹Waaqa irraa› jenne, ‹Yoos maaliif isatti hin amanne?› nuun jedha. Garuu yoo ‹Namoota irraa› jenne»— ummata sodaatan, sababii hundi Yohannisin raajii dhugaa ta'uu isaa waan ilaalaniif.

Yesusiin, «Hin beeknu» jedhanii deebisan. Yesus immoo, «Anis aangoo maaliitiin wantoota kana akkan godhu isiniin hin jedhu» jedhe.