Marcos 11

11 ¹Nang malapit na sila sa Jerusalem, sa Betfage at Betania sa tabi ng Bundok ng mga Olibo, isinugo ni Jesus na mauna ang dalawa sa kaniyang mga alagad,

²na sinasabi sa kanila, “Pumunta kayo sa nayon sa harapan ninyo, at pagpasok na pagpasok ninyo roon ay masusumpungan ninyo ang isang nakataling batang asno na hindi pa kailanman nasasakyan ninuman. Kalagan ninyo ito at dalhin dito.”

³Kung may magtanong sa inyo, ‘Bakit ninyo ginagawa ito?’ sabihin ninyo, ‘Kailangan ito ng Panginoon at ibabalik niya agad dito.’

⁴Pumunta sila at nasumpungan ang isang batang asnong nakatali sa isang pintuan sa labas sa lansangan, at kinalagan nila ito. ⁵Ang ilan sa mga nakatayo roon ay nagtanong sa kanila, “Ano ang ginagawa ninyo, at kinakalagan ninyo ang batang asnong iyan?” ⁶Sumagot sila ayon sa sinabi ni Jesus sa kanila, at pinabayaan sila ng mga tao. ⁷Dinala nila ang batang asno kay Jesus at inilagay nila rito ang kanilang mga balabal, at sumakay siya rito. ⁸Marami ang naglatag ng kanilang mga balabal sa daan; ang iba naman ay naglatag ng mayayabong na sanga na pinutol nila sa mga bukid. ⁹Ang mga nauuna at ang mga sumusunod ay sumisigaw, “Hosana! Pagpalain ang dumarating sa pangalan ng ating Ama! ¹⁰Pagpalain ang dumarating na kaharian ng ating amang si David! Hosana sa kaitaasan!”

¹¹Pumasok si Jesus sa Jerusalem at sa templo, at nilibot niya ng tingin ang lahat ng bagay, at—yamang gabi na—lumabas siyang patungong Betania kasama ang Labindalawa.

Isinumpa ni Jesus ang Puno ng Igos

¹²Kinabukasan, habang paalis sila sa Betania, nagutom si Jesus. ¹³Nang makita niya sa di-kalayuan ang isang mayabong na puno ng igos, lumapit siya upang tingnan kung mayroon itong bunga. Nang marating niya ito, wala siyang nasumpungan kundi mga dahon lamang, sapagkat hindi pa panahon ng igos.

¹⁴Kaya sinabi niya rito, “Huwag nang kumain kailanman ang sinuman ng bunga mula sa iyo.” At narinig ito ng kaniyang mga alagad.

Nilinis ni Jesus ang Bahay ng kaniyang Ama

¹⁵Dumating sila sa Jerusalem, at pumasok si Jesus sa templo at sinimulang itaboy ang mga nagtitinda at namimili roon. Itinaob niya ang mga mesa ng mga tagapagpalit ng salapi at ang mga upuan ng mga nagtitinda ng kalapati, ¹⁶at hindi niya pinahintulutan ang sinuman na magdala ng paninda sa mga looban ng templo.

¹⁷At tinuruan niya sila, na sinasabi, “Hindi ba nasusulat: ‘Ang aking bahay ay tatawaging bahay-panalanginan para sa lahat ng mga bansa’? Ngunit ginawa ninyo itong yungib ng mga tulisan.”

¹⁸Narinig ito ng mga punong pari at mga eskriba at naghanap sila ng paraan upang puksain siya, sapagkat natatakot sila sa kaniya, yamang namangha ang buong karamihan sa kaniyang turo.

¹⁹At nang dumating ang gabi, lumabas sila ng lungsod.

²⁰Nang umaga, habang sila ay nagdaraan, nakita nila ang puno ng igos na natuyo mula sa mga ugat nito. ²¹Naalala ni Pedro at sinabi niya sa kaniya, “Rabi, tingnan mo! Natuyo na ang puno ng igos na isinumpa mo.”

²²Sumagot si Jesus sa kanila, “Magkaroon kayo ng pananampalataya sa ating Ama. ²³Katotohanang sinasabi ko sa inyo, ang sinumang magsabi sa bundok na ito, ‘Maalis ka at maihagis sa dagat,’ nang hindi nag-aalinlangan sa kaniyang puso kundi naniniwalang mangyayari ang kaniyang sinasabi—ito ay magaganap para sa kaniya. ²⁴Kaya sinasabi ko sa inyo: anuman ang inyong ipanalangin at hilingin, maniwala kayong tinanggap na ninyo ito - ito ay magiging inyo. ²⁵Kapag tumatayo kayong nananalangin, patawarin ninyo ang anumang inyong ikinasama ng loob laban kaninuman, upang ang inyong Ama sa langit ay patawarin din kayo sa inyong mga kasalanan.” ^a a v25 Ang pinakamaagang mga manuskrito ay walang talatang 26 dito; idinaragdag ng mga huling kopya: “Ngunit kung hindi kayo magpapatawad, hindi rin patatawarin ng inyong Ama sa langit ang inyong mga pagkakasala.”

Sa Kaninong Awtoridad?

²⁷Bumalik sila sa Jerusalem. Habang naglalakad si Jesus sa templo, lumapit sa kaniya ang mga punong pari, mga eskriba, at mga matanda, ²⁸at nagtanong, “Sa anong awtoridad mo ginagawa ito? O sino ang nagbigay sa iyo ng awtoridad na ito upang gawin ito?”

²⁹Sinabi ni Jesus sa kanila, “Isang tanong ang itatanong ko sa inyo. Sagutin ninyo ako, at sasabihin ko sa inyo kung sa anong awtoridad ko ginagawa ang mga bagay na ito. ³⁰Ang bautismo ni Juan—galing ba ito sa langit, o mula sa tao? Sagutin ninyo ako.”

³¹Pinag-usapan nila ito sa kanilang sarili: “Kung sasabihin nating, ‘Mula sa langit,’ itatanong niya, ‘Kung gayon, bakit hindi kayo naniwala sa kaniya?’ ³²Ngunit kung sasabihin nating, ‘Mula sa tao’”—natakot sila sa karamihan, sapagkat itinuring ng lahat na tunay na propeta si Juan.

³³Sumagot sila kay Jesus, “Hindi namin alam.” Sinabi ni Jesus, “Hindi ko rin sasabihin sa inyo kung sa anong awtoridad ko ginagawa ang mga bagay na ito.”