Putro Jerusalem te Ghura te Uthi Kene Ghusi Jai

Jisu ekta dhar luwa gadha bacha uporte Jerusalem te Hosanna laga awaz logot ahhise, phol nadiya ekta dimoru ped ke shrap dise, aru Tar Pitri laga ghor pora bepari khan ke kheda dise, juntu pora mukhya purohit khan Tai ke morabole thik kori loise. Kun laga odhikar pora koi kene hudile, Tai bodla te John laga kotha tarkhan ke hudise.

Adhyay 11.

Jerusalem usor te ponchi kene, Jaitun Pahar usor te Bethphage aru Bethany te, Jisu pora Tar duijon chella ke age pathai dise,

aru tarkhan ke koise, “Tumikhan laga age te thaka gaon te jabi, aru ta te ghusa loge-loge, kun bhi kitia bhi uthi nabosa ekta bandhi rakha gadha laga bacha tumikhan pabo. Eitu khuli kene yate loi anibi.”

Jodi kunba tumikhan ke hudile, ‘Kile tumikhan eneka kori ase?’ tenehole kobi, ‘Prabhu ke eitu lage, aru Tai joldi eitu yate wapas pathai dibo.’

Tarkhan jai kene bahar te rasta te ekta dorja usor te bandhi rakha gadha laga bacha paise, aru eitu khuli dise. Ta te khara koi thaka kunba manuh khan pora tarkhan ke hudise, “Tumikhan ki kori ase, hei gadha laga bacha ke kile khuli ase?” Jisu pora koi diya nisena tarkhan jawab dise, aru manuh khan pora tarkhan ke jabole dise. Tarkhan gadha laga bacha ke Jisu usor te loi anise aru tarkhan laga kapra eitu uporte phelai dise, aru Tai eitu te bohi jaise. Bisi manuh pora tarkhan laga kapra rasta te bisarai dise; dusra khan pora kheti pora kati ana pata thaka daal khan bisarai dise. Age te jai thaka khan aru pichete jai thaka khan jor pora hala kori thakise, “Hosanna! Amar Pitri laga nam te aha Jun dhonyo ase! Amar pitri David laga aha rajyo dhonyo ase! Sob pora untcha jagah te Hosanna!”

Jisu Jerusalem aru mondir bhitor te ghusise, sob kiman uporte charte saise, aru—homoi deri hoi jua karone—Barojon logote Bethany te bahar ulai jaise.

Jisu pora Dimoru Gas ke Shrap Dise

Dusera din te, tarkhan Bethany pora ulai thaka homoi te, Jisu ke bhuk lagise. Dur te pata thaka ekta dimoru gas dikhi kene, Tai ta te eku ase na nai sabole gise. Ta te ponchi kene, pata khan chara aru eku pa-a nai, kilemane eitu dimoru laga homoi thaka nai.

Titia Tai eitu ke koise, “Kun bhi kitia bhi tumi pora aru phol nakhabo.” Tar chella khan pora Tai koa tu hunise.

Jisu pora Tar Pitri laga Ghor ke Sapha Korise

Tarkhan Jerusalem te ponchise, aru Jisu mondir bhitor te ghusi kene ta te bikri kora aru kina manuh khan ke khedai dibole shuru korise. Tai poisa bodli kora manuh khan laga mez aru kabotar bikri kora khan laga bohi jagah ultai dise, aru Tai kun ke bhi mondir laga uthan pora saman loi jabole dibole mana korise.

Aru Tai tarkhan ke sikhai kene koise, “Eneka likha nai naki: ‘Moi laga ghor sob desh laga nimite prathana kora ghor koi kene matibo’? Kintu tumikhan eitu ke chor khan laga gufa bonai dise.”

Moha purohit khan aru niyom likha khan pora eitu huni kene Tai ke khotom kori dibole rasta bisarise, kilemane tarkhan Tai ke bhoi korise, kele koile guta bhir Tar sikhani te asurit hoi jaise.

Aru saami hua homoi te, tarkhan sheher pora bahar ulai jaise.

Phojur te, tarkhan jai thaka homoi te, dimoru gas tu jor pora sukhi juwa dikhise. Peter pora monte ani kene Tai ke koise, “Rabbi, sabi! Apuni shrap diya dimoru gas tu sukhi jaise.”

Jisu pora tarkhan ke jawab dise, “Amar Pitri uporte biswas rakhibi. Hosa kotha Moi tumikhan ke koi ase, jun pora eitu pahar ke, ‘Uthi kene samundar te giri ja,’ koi kene, tar mon te eku shak na kori kene kintu tai koa tu hobo koi kene biswas korile—eitu tar nimite hoi jabo. Etu nimite Moi tumikhan ke koi ase: tumikhan ji prathana kori kene mange, eitu tumikhan pai loise koi kene biswas koribi—eitu tumikhan laga hoi jabo. Jitia tumikhan khara koi kene prathana kore, kunba manuh laga birodh te ji dhori rakhise eitu maph kori dibi, titia sorgot te thaka tumikhan laga Pitri pora bhi tumikhan laga paap khan maph kori dibo.” ^a

Kun laga Adhikar pora?

Tarkhan Jerusalem te wapas ahhise. Jisu mondir bhitor te bera thaka homoi te, moha purohit khan, niyom likha khan, aru bura manuh khan Tai usor te ahhise, aru hudise, “Kun laga adhikar pora Apuni eitu kori ase? Nahole eitu koribole Apuni ke kun pora eitu adhikar dise?”

Jisu pora tarkhan ke koise, “Moi tumikhan ke ekta kotha hudibo. Moi ke jawab dibi, aru kun laga adhikar pora Moi eitu khan kori ase eitu Moi tumikhan ke kobo. John laga baptizma—eitu sorgo pora thakise, na manuh pora ahhise? Moi ke jawab dibi.”

Tarkhan nijor majote kotha korise: “Jodi ami ‘Sorgo pora,’ koile, Tai hudibo, ‘Tenehole tumikhan kile tai ke biswas kora nai?’ Kintu jodi ami ‘Manuh pora,’ koile”—tarkhan bhir ke bhoi korise, kilemane sob manuh pora John ke ekjon hosa bhabobadi mani thakise.

Tarkhan Jisu ke jawab dise, “Ami najane.” Jisu pora koise, “Tenehole kun laga adhikar pora Moi eitu khan kori ase eitu Moi bhi tumikhan ke nakobo.”