Marcos 11

11 ¹Sa nagkaduol na sila sa Jerusalem, didto sa Betfage ug Betania duol sa Bukid sa mga Olibo, gipauna ni Jesus ang duha sa iyang mga tinun-an,

²nga nag-ingon kanila, “Adto kamo sa balangay nga anaa sa inyong atubangan, ug pagsulod gayod ninyo, makita ninyo ang usa ka nating asno nga gihigot, nga wala pa gayod masakyi ni bisan kinsa. Hubari ninyo kini ug dad-a dinhi.”

³Kon adunay mangutana kaninyo, ‘Nganong gibuhat ninyo kini?’ ingna ninyo, ‘Gikinahanglan kini sa Ginoo, ug ibalik dayon niya dinhi.’

⁴Milakaw sila ug nakaplagan nila ang nating asno nga gihigot sa may pultahan sa gawas daplin sa dalan, ug ilang gihubaran kini. ⁵Ang pipila sa mga nagtindog didto nangutana kanila, “Unsa may inyong gibuhat, nganong gihubaran ninyo kanang nating asno?” ⁶Mitubag sila sumala sa gisulti ni Jesus kanila, ug gipasagdan sila sa mga tawo. ⁷Gidala nila ang nating asno ngadto kang Jesus ug gihapinan nila kini sa ilang mga kupo, ug misakay siya niini. ⁸Daghan ang nagbukhad sa ilang mga kupo sa dalan; ang uban nagkatag sa lunhawng mga sanga nga ilang gipamutol gikan sa kaumahan. ⁹Ang mga nag-una ug ang mga nagsunod naninggit, “Hosanna! Bulahan ang moabot sa ngalan sa atong Amahan! ¹⁰Bulahan ang umaabot nga gingharian sa atong amahan nga si David! Hosanna sa kahitas-an!”

¹¹Misulod si Jesus sa Jerusalem ug sa templo, ug gilibot niya pagtan-aw ang tanan, ug—tungod kay gabii na—miadto siya sa Betania uban sa Napulog Duha.

Gitunglo ni Jesus ang Kahoyng Igera

¹²Pagkasunod adlaw, samtang mibiya sila sa Betania, gigutom si Jesus. ¹³Sa pagkakita niya sa layo sa usa ka kahoyng igera nga dahonan, miadto siya aron tan-awon kon aduna ba kini bunga. Sa pag-abot niya didto, wala siyay nakaplagan gawas sa mga dahon, kay dili pa kini tingbunga sa igera.

¹⁴Unya giingnan niya kini, “Wala na gayoy mokaon ug bunga gikan kanimo pag-usab.” Nadungog kini sa iyang mga tinun-an nga iyang gisulti.

Gihinloan ni Jesus ang Balay sa iyang Amahan

¹⁵Miabot sila sa Jerusalem, ug misulod si Jesus sa templo ug gisugdan niya pag-abog ang mga tigbaligya ug mga tigpalit didto. Gipanglintuwad niya ang mga lamesa sa mga tigbaylo ug salapi ug ang mga lingkoranan sa mga nagbaligya ug mga salampati, ¹⁶ug wala siya motugot nga adunay magdala ug baligya agi sa hawanan sa templo.

¹⁷Ug gitudloan niya sila, nga nag-ingon, “Dili ba nahisulat man: ‘Ang akong balay pagatawgon nga balay sa pag-ampo alang sa tanang kanasoran’? Apan gihimo ninyo kini nga lungib sa mga tulisan.”

¹⁸Nadungog kini sa mga pangulong pari ug sa mga eskriba, ug nangita sila ug paagi aron patyon siya, kay nahadlok sila kaniya, sanglit ang tibuok panon sa katawhan natingala sa iyang pagtulon-an.

¹⁹Ug sa pag-abot sa gabii, migawas sila sa siyudad.

²⁰Sa pagkabuntag, samtang nangagi sila, nakita nila ang kahoyng igera nga nalaya hangtod sa gamot. ²¹Nahinumdoman kini ni Pedro ug miingon kaniya, “Rabbi, tan-awa! Ang kahoyng igera nga imong gitunglo nalaya na.”

²²Mitubag si Jesus kanila, “Pagbaton kamog pagtuo sa atong Amahan. ²³Sa pagkatinuod sultihan ko kamo, si bisan kinsa nga moingon niining bukira, ‘Alsaha ang imong kaugalingon ug itambog ngadto sa dagat,’ nga walay pagduhaduha sa iyang kasingkasing kondili mituo nga mahitabo ang iyang gisulti—mahitabo gayod kini alang kaniya. ²⁴Busa sultihan ko kamo: bisan unsay inyong iampo ug pangayoon, tuohi nga nadawat na ninyo kini—ug mainyo gayod kini. ²⁵Sa nagatindog kamo nga nag-ampo, pasayloa ninyo ang bisan unsang gihambin ninyo batok kang bisan kinsa, aron ang inyong Amahan nga anaa sa langit mopasaylo usab kaninyo sa inyong mga sala.” ^a a v25 Ang labing karaang mga manuskrito wala maglakip ug bersikulo 26 dinhi; ang ulahing mga kopya nagdugang: “Apan kon dili kamo mopasaylo, ang inyong Amahan nga anaa sa langit dili usab mopasaylo sa inyong mga kalapasan.”

Pinaagi sa Kang Kinsang Katungod?

²⁷Mibalik sila sa Jerusalem. Samtang naglakaw si Jesus sa templo, miduol kaniya ang mga pangulong pari, ang mga eskriba, ug ang mga katigulangan, ²⁸ug nangutana sila, “Pinaagi sa unsang katungod gibuhat mo kini? O kinsa ang naghatag kanimo niini nga katungod sa pagbuhat niini?”

²⁹Miingon si Jesus kanila, “Mangutana ako kaninyo ug usa ka pangutana. Tubaga ninyo ako, ug sultihan ko kamo kon pinaagi sa unsang katungod gibuhat ko kining mga butanga. ³⁰Ang bawtismo ni Juan—gikan ba sa langit, o gikan sa tawo? Tubaga ninyo ako.”

³¹Naglalisay sila sa ilang kaugalingon: “Kon moingon kita, ‘Gikan sa langit,’ moingon siya, ‘Nan nganong wala kamo motuo kaniya?’ ³²Apan kon moingon kita, ‘Gikan sa tawo’”—nahadlok sila sa panon sa katawhan, kay giila sa tanan nga si Juan tinuod nga propeta.

³³Mitubag sila kang Jesus, “Wala kami masayod.” Miingon si Jesus, “Dili ko usab kamo sultihan kon pinaagi sa unsang katungod gibuhat ko kining mga butanga.”