Mi eng' bukuit

Mariko 11 FHB Father's Heart Bible™

Kiistoi 15% eng' kiy ne iale korook →
Bukuit

Laanyei Weeriit Kobe Jerusalem

Ki laany Jeso sigiryet ne ki kityach koit Jerusalem eng' kuuyogap Hosana, ak kochuby mogoywet ne ma tinyei logoek, ak koyoor piik che aldaei eng' koitap Kwandanyi, ne yai tisiik che eecheen kobwaat kobar ineendet. Kingo kisoomei kole ng'oo ne kigochi kimnateet, koteebe icheek agobo Johana eng' olooto.

Sura 11.

Ye kingo neegit koit Jerusalem, eng' Bethfage ak Bethania che neegit tulweetap Mseituni, ki yook Jeso kasubik aeng' che po ineendet koba eng' tai,

koleenji, “Oba nganaseet ne mi eng' taing'wong', ak ye okiit oriit eng' yooto, onyooru sigiryet ne kirate ne tomo kolaany chii agenge. Otyach ak oibu rani.”

Ngot koteebe chii age tugul, ‘Amu nee si oyaei niito?’ omwae, ‘Machei Kiptaiyat, ak koweektoisyei rani eng' yooto.’

Ki pa anyun ak konyoor sigiryet ne kirate eng' kurgat saang' eng' ooreet, ak kotyach. Ki teebee icheek alak che ki tonon eng' yooto, koleenji, “Nee ni oyaei, otyachei sigiryennooto?” Ki wolji icheek ko uu ye kiga leenji Jeso, ak kochamji piik koba. Ki ib sigiryet ole mi Jeso ak koinde ngoroikwak parak, ak kotebee eng' ineendet. Ki inde piik che chaang' ngoroikwak eng' ooreet; ak koinde alak mooriigap keetiik che nyigiisen che ki kitil eng' imbarenik. Ki waach icheek che ki po tai ak che ki kosubu, koleen, “Hosana! Kaberuret ineendet ne nyoonei eng' kainetap Kwandanyo! Kaberuret laitornatet ne nyoonei ne po kwandanyo Daudi! Hosana eng' ole toroor miising'!”

Ki wo Jeso Jerusalem ak Templo, kogeer tuguuk tugul, ak—amu ki kagobut—komanda koba Bethania kobooto taman ak aeng'.

Sasei Jeso Mogoywet

Ye kobetak ng'wony, ye ki kagomanda eng' Bethania, koamei rubeet Jeso. Kingo keer mogoywet ne nyigiisen ole loo, kwo kogeer ngo mi kiy age eng' ineendet. Kingo it, konyoor mooriik kityo, amu ma ki sait ne po logoegap mogoywet.

Yeityo koleenji, “Mat koam chii logoeguk agoi koigeny.” Ki kas kasubik che po ineendet ye komwa nooto.

Tiliilsei Jeso Kootap Kwanda

Ki it Jerusalem, ak ki wo Jeso Templo ak koonei piik che aldoe ak che alei eng' yooto. Ki wiir ng'wony teresyegap piik che wolee rabisyek ak ng'echerisyegap piik che aldoe cheptugenik, ak ma kacham chii age tugul koip tuguuk che kiale eng' Templo oriit.

Ak ki neeti icheek, koleen, “Tos ma kisir ale: ‘Kiguure kaanyu koek koitap saaet ne po pororyosyek tugul’? Ago kaoyai inyee koek keriinget ne po rebiik.”

Ki kas tisiik che eecheen ak siriik niito, ak kocheeng' ole partoi ineendet, amu ki iywei icheek ineendet, amu ki kwong'yo tuiyet komugul eng' kaneetisyennyi.

Ak ye kagobut, komanda eng' nganaseet koba saang'.

Eng' mornet, ye ki kagosiir, kogeer mogoywet ne kagomeiyo kobooch kelusyekyik. Ki ibwaat Petero ak koleenji, “Rabbi, keero! Kagomeiyo mogoywet ne ki isas.”

Ki wolji Jeso icheek, koleenji, “Oyan Kwandanyo. Amwaiwok iman ale, chii age tugul ne leenji tulweetani, ‘Ng'etegei parak ak iwiirtegei araret,’ ne ma kong'echei eng' muguleldanyi ago koyan ale yaak ne mwaei—kiyachini ineendet. Nooto anyun amwaiwok ale: kiy age tugul ne osaae ak osoom, oyan ole kagonyoor—ak koek neng'wong'. Ye otononse osaae, onyoetchini chii age tugul kiy ne otinye agaigai ineendet, si kobiit konyoetchini okweek Kwandang'wong' ne mi kipsengwet tengekwogikwak.” a a v25 Ma mi eng' sirutik che po keny kora siruut ne po 26 oli; ago teeseei sirutik che po let koleen: “Ago ngot ma onyoetchini, ko ma konyoetchini okweek Kwandang'wong' ne mi kipsengwet tengekwogikwak.”

Eng' Kimnateetap Ng'oo?

Ki week koba Jerusalem. Ye ki wendi Jeso eng' Templo, konyo ole mi ineendet tisiik che eecheen, ak siriik, ak poisyek, ak koteebee, koleenji, “Eng' kimnateet ne uu ne iyaei niito? Anan ng'oo ne ki igoochin kimnateeni si iyai?”

Ki leenji Jeso icheek, “Ateebee teebutyet agenge. Owolwo, ak amwaiwok eng' kimnateet ne uu ne ayaei tuguuchu. Kabatisanetap Johana—tos ki mang'une kipsengwet, anan ko mang'une piik? Owolwo.”

Ki ng'alaaljigei icheegei, koleen, “Ngot kemwae, ‘Mang'une kipsengwet,’ koteebe, ‘Amu nee anyun si ma oyan ineendet?’ Ago ngot kemwae, ‘Mang'une piik’”—ki iywei icheek tuiyet, amu ki boiboen tugul Johana kole ki poiyot ne iman.

Ki wolji icheek Jeso, koleenji, “Mogen.” Koleenji Jeso, “Ko ma amwaiwok anee eng' kimnateet ne uu ne ayaei tuguuchu.”