Umwana yinjira i Yeruzalemu yurira

Yesu yinjira i Yerusalemu ageze ku cana c'indogobe batiye, bavuza induru ngo Hozana, avuma igiti c'umutini kitama, yirukana abadandaza mu ngoro ya Data wiwe, ivyo bigatuma abakuru b'abaherezi biyemeza kumwica. Abajijwe ububasha akoresha uwo yabuhawe na we, abasubiza ikibazo ca Yohani.

Igice 11.

Bageze hafi ya Yeruzalemu, i Betifage n’i Betaniya iruhande rw’Umusozi w’Imyelayo, Yesu aratuma babiri mu bigishwa biwe imbere,

arababwira ati: “Nimuje muri ca gisagara kiri imbere yanyu, mukimara kwinjiramwo muzosanga umwana w’indogobwa aboshwe, ata muntu n’umwe yigeze awuyurira. Muwubohore muwuzane ng’aha.”

Nihagira umuntu ababaza ati: ‘Ni kuki mugira ivyo?’ muzomwishure muti: ‘Umwami arawukeneye, kandi azowusubiza ng’aha vuba.’

Baragenda basanga umwana w’indogobwa aboshwe ku muryango hanze mu kabarabara, barawubohora. Bamwe mu bari bahagaze ng’aho barababaza bati: “Mugira iki, mubohora uwo mwana w’indogobwa?” Barabishura nk’uko Yesu yari yabibabwiye, maze abantu barabareka baragenda. Bazanira Yesu uwo mwana w’indogobwa, bawusasako imyitero yabo, arawicarako. Benshi barasasa imyitero yabo mu nzira; abandi basasa amashami y’ibibabi bari baciye mu mirima. Ab’imbere n’abakurikira bariko barasemerera bati: “Hozana! Hahirwa uwuza mw’izina rya Data wa twese! Hahirwa ubwami buje bwa data wacu Dawidi! Hozana mu majuru ya hejuru cane!”

Yesu yinjira i Yeruzalemu no mu rusengero, araheza araraba vyose, kandi kubera ko bwari bwaramaze kugoroba, aja i Betaniya ari kumwe na bamwe cumi na babiri.

Yesu avuma igiti c’umutini

Ku musi ukurikira, bariko bava i Betaniya, Yesu afata ikigoyi. Abonye kure igiti c’umutini kibisi gifise ibibabi, aragenda kuraba nimba cofiseko ikintu. Agikegereye, nta co yabonye atari ibibabi gusa, kuko catari igihe c’imitini.

Maze arakibwira ati: “Ntihazogire umuntu asubira kurya icamwa kuri wewe.” Abigishwa biwe baramwumva akivuga.

Yesu asukura inzu ya Data wiwe

Bashika i Yeruzalemu, maze Yesu yinjira mu rusengero atangura kwirukana abadandaza n’abaguzi bari ng’aho. Ahirika amameza y’abavunja amafaranga n’intebe z’abadandaza inuma, kandi ntiyareka ngo umuntu anyaruke ibidandazwa mu rugo rw’urusengero.

Yongera arabigisha, avuga ati: “Mbega ntivyanditswe ngo: ‘Inzu yanje izokwitwa inzu y’isengesho ku mahanga yose’? Mugabo mwayigize isenga ry’abambuzi.”

Abakuru b’abaherezi n’abanyabwenge barabyumva, baca barondera uburyo bwo kumwica, kuko bamutinya, kubera ko ishengero ryose ryatangazwa n’inyigisho ziwe.

Bugorovye, baca bava mu gisagara.

Mu gitondo, bariko baraca, babona igiti c’umutini cumye kuva ku mizi yaco. Petero aributse amubwira ati: “Rabi, raba! Igiti c’umutini wavumye kiramaze kuma.”

Yesu arabishura ati: “Nimugire ukwizera kuri Data wa twese. Ni ukuri ndabibabwiye, uwuzobwira uyu musozi ati: ‘Niwinyagurwe uterwe mu kiyaga,’ atakekeranya mu mutima wiwe ariko yizera ko ivyo avuze bizoba, azobikorerwa. Ni co gituma ndababwira nti: ivyo mwose musenga mugasaba, mwizere ko mwabironse, bizoba ivyanyu. Nimuhagarara musenga, nimubabarire ico cose mufitiye umuntu, kugira ngo na So wo mw’ijuru abababarire ivyaha vyanyu.” ^a

Ni ubuhe bubasha?

Basubira i Yeruzalemu. Yesu akigenda mu rusengero, abakuru b’abaherezi n’abanyabwenge n’abashingantahe baramwegera, baramubaza bati: “Ni ubuhe bubasha ukoresha ivyo? Canke ni nde yaguhaye ubwo bubasha bwo kubikora?”

Yesu arababwira ati: “Nanje ndabaza ikibazo kimwe. Nimunyishure, nanje nzobabwira ubuhe bubasha nkoresha ivyo bintu. Ububatizo bwa Yohana, bwavuye mw’ijuru, canke bwavuye ku bantu? Nimunyishure.”

Baraganira bo nyene bati: “Nitwavuga tuti: ‘Bwavuye mw’ijuru,’ azotubaza ati: ‘None kuki mutamwizeye?’ Mugabo nitwavuga tuti: ‘Bwavuye ku bantu’”—baratinya ishengero, kuko bose babona ko Yohana yari umuhanuzi w’ukuri.

Bishura Yesu bati: “Ntitubizi.” Yesu ati: “Nanje sinzobabwira ubuhe bubasha nkoresha ivyo bintu.”