Hiak swak thang rwe
Chongdip

Sa Kapaisa Jerusalem bi Khutnu

Jisu na kalwangnu lola swan khat chung bi Jerusalem la khutnu kaan bi, mi khangna Hosanna diga paonu ngaisu rwe, bariak maaknu theihei kung ding basiatnu chong pi rinluga, kalei zwan ongnu mi nun ding Bapa om in bina kazun sat rwe, haba na takopuba rwan ding Bating that lang baning tak thang rwe. Tu om baze lang heiya tonubo diga ngainu kaan bi, Maanna bani khou John om lang ni han rwe.

Bung 11.

Banina Jerusalem nai hung bi, Olive Rammwan bi amnu Bethphage le Bethany kim bi hungnu kaan bi, Jisu na Baom potroi pat ni ding meithaan la lang thangluga

bani khou rinne, “Nani meithaan la amnu nam la sero, atiga nanina habei ga khutnu khap tinu le, mi khatchanale twang mak aangnu lola swan khat bang thang ong ngaakne. Haga sutluga abeiya lou hung ngo.

Tudannu pakhatna, ‘Pa-aam lang heiya tonubo?’ diga nani khou ngaiye dabe, ‘Heiya Pukraangba lang bathaang amme, atiga Maanna khap tinu le abeiya han lat lang thanglune’ diga rinno.”

Banina seluga, lampui bi impei panglang la lola swan bang thang ongnu ding dou rwe, atiga haga sut rwe. Habei ga han ongnu mi kasemna bani khou rinne, “Haba lola swan ga sutluga, nani pa-aam tonubo?” Jisu na bani khou rin ngaak danga banina katake, atiga mi nunna bani ding se thang rwe. Banina lola swan ding Jisu kim bi lou hung rwe, atiga ha chung bi bani pwan ga pha thangluga, Maan haba chung bi ong twang rwe. Mi khangna bani pwan lampui bi pha thang rwe; kateina rwanna lou la aatnu banaa nabom ga pha thang rwe. Bameithaan la khatle nung la suisenu mi khang gana paoga rinne, “Hosanna! Ani Pa meng bi hungnu Maan ga aih saye! Hung dingnu ani pa David om krwang talei ga aih saye! Basaang kataknu bi Hosanna!”

Jisu na Jerusalem bi khutluga kalum in bi khut rwe, atiga thinu bing ding batou kaluga phaang rwe; rei le rei briakpina, Maan pat somga kani ding le diga Bethany la thou drwe.

Jisu na Tacham Kung ding Taseng Pi Thangnu

Haba nina, banina Bethany bina se swak bi, Jisu khoklaang rwe. Maanna namlaa lamangna banaa ongnu tacham kung khat ding muluga, ha chung bi pot amgabo diga phaang lang se rwe. Haba kim bi hungnu kaan bi, banaa baknuza katei khatchale dou make, balangbe tacham bakaan mak ngaake.

Atiga Maanna haga khou rinne, “Tudannu pakhatchanale nangna bakraa pi sa latla ding ngo.” Haga Maanna rinnu ga Baom potroi rwanna ngaisu rwe.

Jisu na Bapa om In ding To Bathiang Thangnu

Banina Jerusalem bi hung rwe, atiga Jisu na kalum in bi khutluga, habei ga zwan ongnu le kaleinu mi bing ding kazun sat chwan to ong rwe. Maanna sian kachoi kainu nun om table khatle banphi zwannu nun om kaong riak bing tun kalat sat rwe, atiga kalum in khou mi khatchanale pot pwi pi khut langnu za make.

Atiga Maanna bani ding bachuga rinne, “Hiak thangluga amme, ‘Ain ga chaat bing taswang lang kalum in diga koulune,’ diga makpo? Atiyeda nanina haga ‘Baruksaak mi nun kabu’ pi to rwe.”

Takopuba rwan le chongtan bachuthangnu rwanna heiya ngaisuluga, Bating braan sat lang lampui zong rwe, balangbe banina Bating kachiye; mi khang taswang khakna Baom bachuthangnu bi loh lo briakpina.

Atiga khwazinren tanu kaan bi, banina nampui bina se swak drwe.

Zingkhala, banina se khan bi, tacham kung ga bakamong lana baowei ta damnu ding mu rwe. Peter na baningsuluga Jisu khou rinne, “Rabbi, phaang ngo! Nangna taseng to thangnu heiba tacham kung ga baowei ta damme.”

Jisu na bani khou katake, “Ani Pa khou balumsanu ammo. Batak sekka Eina nani khou rinnuwe, tudannu pakhatna heiba rammwan ding nga, ‘Nang abeina swakluga tuipui la ga bazwan thang dammo’ diga rinne, atiga basung bi balumsia makka, baom rinnu ga ati dam nge diga balumsa dabe, bating lang ga ati dam thanglune. Atibriakpina Eina nani khou rinnuwe, nanina hweiniga ninu pot taswang ga, lousu rwe diga balumsa dabe, haga nani om ding gaye. Nanina hweiniga han ongnu kaan bi, tudannu khat maitwang bi chong amme dabe, haga ngaak dam thangro, atiga nani noh bing ding tambaan la ongnu nani Pa na le ngaak dam thang damnuwe.” a a v25 Kaman hung lai bing bi ya hei riak pi verse 26 am make; anung la hiak thangnu lai bing bi hei pi kathan amme: "Atiyeda nanina ngaak dam make dabe, tambaan la ongnu nani Pa na le nani noh bing ding ngaak dam thanglaye."

Tu om Ngam Gabo?

Banina Jerusalem bi han lat rwe. Jisu na kalum in bi se ong bi, takopuba rwan, chongtan bachuthangnu rwan khatle chwan phunnu rwanna Bakim bi hung rwe, atiga Bakhou rinne, “Nang pa-aam om ngam gana heiya tonubo? Mak tabe, heiya to lang heiba ngam ga nang khou tuna pi thangnubo?”

Jisu na bani khou rinne, “Eina le nani khou chong khat ngaide; Akhou katako dabe, Eina pa-aam om ngam gana heiba thinu bing to ongnu ga nani khou rinlune. John om baptize to thangnu ga tambaan lanamo, mak tabe mi nun khounabo? Akhou katako.”

Banina bani cham lak pi kathuiluga rinne, “Anina, ‘Tambaan la naye’ diga rinne dabe, Maanna, ‘Ati dabe pa-aam toga nanina Bating balumsa maknubo?’ diga rinlune. Atiyeda ‘Mi nun khou naye’ diga anina rinne dabe—” banina mi khang ding kachi rwe, balangbe mi bing taswang khakna John ding thiamting sekka khate diga chak thang ngaake.

Banina Jisu khou katake, “Ani thei make.” Atiga Jisu na rinne, “Eina le pa-aam om ngam gana heiba thinu bing to ongnu ga nani khou rinlaye.”