Mark 12

12 ¹Ana athumli chānjam eina hāngchithei sāphoka: "Mi akhana drakhā yāmgui akha sai, pan eina kuimareihai, drakhāra̱ surkhavai alung akha akhur chuihai, tārong kajui akhala sāhai, kala chi khamasābingli luimasāt mihailaga thuihaowa. ²Drakhāthei kaphā atam kharā tharan, khamasābingwui eina yāmguiwui athei sharuk akhui khavai rao akha chihovai. ³Kha athumna ali tukkhuilaga shao, kala khamasai eina shiunhaowa. ⁴Latluida ana athumli rao khangatei akha chihovāluishita; athumna awui akuili shao kala ali maishi ngasaka. ⁵Kala khangatei akha chihovāluishita, kala athumna ali shaothathaowa; chithālala khangatei kachungkha chihovāluishita; athumna kaikhali shao kala kaikhali shaothata."

⁶Awui naomayara leikashe akha leichinga; naomeikapta "Athumna inaomayarali khayāshira" da hānglaga ali athumwuili chihovai. ^a a v6 Drakhā yāmguiwui akhavāna awui naomayara leikashe akha chihovā kahai chi ithumwui Avāna Jishuli chihovā kahaina — Avāna ali ra̱hikmi tharan awuitungli hāngkahai tui chichangna, "iwui Naomayara leikashe" da.

⁷"Kha khamasābing china athum khalatta hāngngaroka, 'Hi shimluikatpa china; rālu, ali shaothathaosa, chithākha shimlui chi ithumwui ngasāpaira.' ⁸Chieina athumna ali tukkhuilaga shaothata, kala yāmguiwui eina shimenshokhaowa. ⁹Chithākha yāmguiwui akhavāna khi sārakhala? Ana rāda khamasābing chi sāthatserhaora, kala mi kateibing masā yāmgui chi ngasakhaora. ¹⁰Nathumna kathara lairik hi mapāranglā: 'Shim kasābingna horkahai lunggui chi achithekwui akhoka ngasāhaira; ¹¹hi ithumwui Avāwui otsakna, kala ithumwui mikyanli hi matakhakhai'?"

¹²Athumna ali tukkhuingai, kha mi kachungkha chili ngacheehaowa, khikhalajila ana chānjam chi athumli kahāngna da athumna thei. Chieina athumna ali horhailaga thuihaowa.

Caesarli Milu, Avāli Milu

¹³Athumna Jishuwui tui eina ali tukkhui khavai Phariseebing eina Herodwui mibing kaikhali awuili chihovai. ¹⁴Athumna ali rāhānga, "Ojā, ithumna thei kaja na khamashungana, kala nana kateina nali khuilikhala khinada chi kakhanang maleimana, kaja maramva miwui kharei kateoli nana khikha mayangmana, kha ithumwui Avāwui shongfa mashunglak eina tamchithei. Caesarli khāshinā khami hi ainlā? Lah maningmakhala? Ithumna khami mingayikā, mamingayimakhala?"

¹⁵Kha Jishuna athumwui phākakhaning chi theihaoda, athumli hānga, "Nathumna khisāda ili chāng yangkhala? Ili lupāsā akha yangkhavai khuirālu." ¹⁶Athumna akha khuirāmi, kala ana athumli ngahāna, "Hi khipāwui aming kala azak kapihailikhala?" Athumna ali "Caesarwuina" da hāngkai.

¹⁷Jishuna athumli hānga, "Caesarwui chi Caesarli milu, kala ithumwui Avāwui chi ithumwui Avāli milu." Athumna ali matakhakhai.

Kharingabingwui Avā

¹⁸Kala ringkhalui kaho maleimana da kahānga Sadduceebing china awuili rai, kala ali ngahānda hānga,

¹⁹"Ojā, mi akhawui agato ngalā horhaida nao mapharāla thihaiakha, agatona apreiva̱ chi ngakumra kala athihaipawui vang nao pharākhuira da Mosesna ithumli kapimihai. ²⁰Chinaongarā shini leisai; khararra china ngalā khuilaga, thihai tharan nao maleila horhaowa. ²¹Kala kakhanena ali ngakumda, nao maleila thihaowa. Kala kakathumala chithai. ²²Kala athum shini china nao maleilakla thiserhaowa. Athum saikorawui thili sha̱naopāva̱ chila thihaowa. ²³Ringkhalui tharan, athumna ringluira tharan, sha̱nao chi khipāwui preiva̱ ngasārakhala? Kaja athum shini china ali preiva̱ sākahaina."

²⁴Jishuna athumli ngahānkai, "Nathumna Kathara Lairikla kala ithumwui Avāwui pangshapla makatheiwui vang eina nathum yonhaira maningmalā? ²⁵Kaja kathebing ringlui tharan, athum ngalā makhuimara, fathuila mafathuiluimara, kha kazingramli khalei kazingraobing thāhaora. ²⁶Thikahaibing ringshok ngasakwui pongli, Moseswui lairikli, thingpom apongwui tuipam chili, ithumwui Avāna ali, 'Iva Abrahamwui, Isaacwui kala Jacobwui Varena' da kathāda hānghaikhala kaji nathum mapāmalā? ²⁷A kathebingwui Vare maningmana, kha kharingbingwui Varena. Nathum marlak eina yonhaira.

Avāli Ot Saikora Eina Leishilu

²⁸Ain kathema akhana rāda athum ngaphata kaji shālaga, Jishuna mathālak eina ngahānkākhami kaji theida ali ngahāna, "Ningkhami saikorawui ngachaili kachipā mataimeikapkhala?"

²⁹Jishuna ngahānkai, "Mataimeikap kaje khare ningkhami chi hina: 'Nganālu, O Israel: ithumwui Avā A mānga.' ³⁰Nawui Avāli nawuklung tongda, manglā tongda, naning tongda, kala napangshap tongda leishiphalungra."

³¹"Kakhane chi hina: 'Nawui khongnainaoli na khalattali leikashi thada leishiphalungra.' Hibingli reikhameiya ningkhami khangatei maleimana."

³²Ain kathema china ali hānga, "Mathālak eina hānghaira, Ojā. A akhana, kala a maningla khangatei maleimana da nana kachangkhat eina hānghaira. ³³Ali wuklung tongda, theishingkakhui tongda, kala pangshap tongda leikashi, kala khongnainaoli khalatta thada leikashi chi rikkatā kachigat kala pha̱kaphayā saikoralila lāngda mataimeiya.

³⁴Jishuna kayākha themlāk eina ngahānkākhami kaji theida, ali hānga, "Na ithumwui Avā wungramwui eina matāmana." Chithangwui eina thuida mi khipānakhala khangahān masālengthuwa.

Khrista china Khipāwui Naomayarakhala?

³⁵Jishuna khorumshimli tamchitheida leilakha ngahāna, "Khiwui vang ain kathembingna Khrista china Davidwui naomayara da hāngkhala?

³⁶David khalattana Manglā Katharana kasatmida hānga: 'ithumwui Avāna iwui Proholi hānga, "Iwui yāshong pamlu, nawui yangkashebingli nawui pheinai masā ngasakranglakha eina tangda."'

³⁷"David khalattana Khrista chi 'Proho' hoi. Chithākha kathada Khrista china Davidwui naomayara ngasāpaira̱khala?" Kala mi kachungkha china awui tui nganāda ringphālakhaowa.

Arema Dharmali Ngasharlu

³⁸Kala ana awui tamchitheili hānga, "Ain kathembingli ngasharlu, athumna katuma phahon ngavailaga yaothuizatkhangaiya kala leihngapha̱pamli shālam sāngasak khangaibing, ³⁹kala synagogueli mathāmeikap kaji pam kala zātkhānli khayākakā pam ningchangbing, ⁴⁰Rāmeinaobingwui lanbing khangaponda, kala seihā kasāngsāng ngaraikachā chi sāchithei khavai sābing. Athum hakkhamei khonshāt samphangra."

Ra̱meinaowui Kachigat

⁴¹Jishuna lupā sangkhavai oko chiwui yangkhangasungchangli pamda, mi kachungkhana okoli pheisā sang chi yangpama; kala kashāngabing kachungkhana khami kachungkha sanghaowa. ⁴²Kala kachāma ra̱meinao akhana rārā tharan pheisā khani kasanga, chi penny akha amanna. ^b b v42 Lepta khani chiya chitharan singkasang pheisā saikorawuitungli katonkhamei mangana—khanini ngarumdala minit kateokhawui samkaphang aman katonga, mi akhana mikapai katonkhamei kaji kahaina.

⁴³Awui sākhangatha̱bingli hokhuida hānga, "Kachangkhat eina ina nathumli kahāngna, kachāma rameiva̱ hina okoli sangbing athum saikorali chungmeida sanghaira. ⁴⁴Kaja athumna athumwui tarākha khalei chiwui eina chigata, kha rameiva̱na awui kachām tungli awui khalei katonga, awui ringkhavai khalei saikora chi mikahaina."