Yesu Wádisa Batu Mafunda Maya
Yesu wádisa batu mafunda maya, wámenga kuhana kiphadi, amana wákebisa mu kikuma kya muvimbu wa Bafwadisi. Mputu wámona mu mbala zodi. Phetelu wumuteda Kidisitu, kunima wuyandika kumukandika kikuma kázimbula ni kafweti kufwa, amana wumuteda Satana, wisi banza mambu ma batu, kaasi ma Tata wetu ku.
8 1Muna bilumbu bina, mulumba-lumba wa lawu wa batu wákutakana hika, konda kima kya kudya. Yesu wátedisa balonguki bandi, wubazimbwadi:
2«Meni yibati yuka kyadi kikuma kya mulumba-lumba wawu wa batu, mukuma bena yi meni tuka bilumbu bitatu, konda kima kya kudya.» 3«Yuka ni yibasula yi nzala benda ku nzu, balembwa nana mu nzila, mukuma bahika bakatuka kuna thama.»
4Amana balonguki bandi bámuvutula: «Ku biki mutu kalenda kudisila batu baba mapha, mu kati kya tseki?»
5Amana wubahyudi: «Mapha makwa lwenina mawu?» Bawu bázimbula: «Tsambwadi.»
6Wuzimbudi mulumba-lumba wa batu bavwanda ha tsi, wábonga mapha tsambwadi mana, wávutula matondu, wábukuna mawu, amana wábaheka balonguki bandi ndangu babaheka batu; amana babaheka mulumba-lumba wa batu. 7Bakala phi yi tuma twa batsema; kunima dya kusakumuna tuma tuna, wuzimbudi balonguki bandi ndangu babaheka batu. 8Amana bádya, báyukuta. Amana bátonguna bitunga tsambwadi bya bitini bina byálutuka. 9Bákala kuna batu bafwana mafunda maya. Amana wábasula.
10Amana muna mbala mosi, wákota mu masuwa ha kimosi yi balonguki bandi amana wenda ku kinzunga kya Dalamanuta.
Mbandu Yisi Lomba Biphadi
11Bafwadisi bakwísa amana báyandika kuzonzila yi yandi, mu kumuleya, mu kulomba kiphadi kyatuka ku zilu.
12Yesu wáfula mbundu mu kitembu kyandi, amana wuzimbudi: «Kikuma kya biki mbandu yayi yisi lomba kiphadi? Mu kyedika, yiluzimbwadi: mbandu yayi yikátambulaku kiphadi.»
13Amana wábayambula, wávutuka kukota mu masuwa, amana wenda ku sambwa dikwawu.
Dikengenu ku Muvimbu wa Bafwadisi
14Bázimbakana mu kunata mapha; kaka dipha dimosi dyákala kumosi yi bawu mu masuwa.
15Amana wábakebisa: «Kebenu! Lwengenu kikuma kya muvimbu wa mapha wa Bafwadisi yi muvimbu wa mapha wa Eloti.»
16Amana báyandika kuzonzaka bawu yi bawu ni bakondi mapha.
17Yesu wábakulabwa, amana wuzimbudi: «Kikuma kya biki lubati zonzila ni lukondi mapha? Tii bwabu lumonaku amana lubakisa kwenu? Mbundu za benu zitu zákala?» 18Lwenina yi mesu, lumonaku? Lwenina yi matu, luyukaku? Amana lusungamanaku? 19«Muna tangwa dina yábukuna mapha matanu kikuma kya mafunda matanu ma batu, bitunga bikwa bya bitini lwátonguna?» Bawu bázimbula: «Kumi yi byodi.»
20«Amana muna tangwa dina yábukuna mapha tsambwadi kikuma kya mafunda maya, bitunga bikwa bya bitini lwátonguna?» Bawu bávutula: «Tsambwadi.»
21Amana wubazimbwadi: «Tii bwabu lubakisa kwenu?»
Mufwa Mesu Watámbula Kumona
22Bátula ku Betisayita, amana batu bámunatina mufwa mesu, balomba Yesu ndangu kasimba mutu wuna.
23Wásimba koku dya mufwa mesu, wámutotisa ku hata, wáhuma metya ha mesu mandi, wásya moku ha yandi, amana wumuhyudi: «Wisi mona kima?»
24Wávumuna mesu, amana wuzimbudi: «Yisi mona batu, kaasi bafwanakani yi miti, bana bisi kangala.»
25Amana Yesu wásya moku mandi ha mesu ma mutu hika; watála mboti-mboti, mesu mámuvutuka, amana wámona byosu phwelele.
26Amana wámusula kenda ku nzu, wuzimbudi: «Wukotaku ata ha hata.»
Abweti Lubati Zonza ni Yenina Nani?
27Yesu yi balonguki bandi benda ku mahata ma Sezale dya Fidiphu. Mu nzila, wubahyudi: «Abweti bisi zonza batu ni meni yenina nani?»
28Bawu bámuzimbwala: «Yowani Mubotiki; bahika bisi zonza Eliya; bahika, mosi wa bambikudi.»
29Amana wubahyudi: «Kaasi benu, abweti lubati zonza ni meni yenina nani?» Phetelu wávutula: «Ngeyi wenina Kidisitu.»
30Amana wábakandisa ni bazimbulaku kwena mutu kikuma kya yandi.
Mwana wa Mutu Kafwana Kanyokwama
31Wáyandika kubalonga ni Mwana wa mutu kafwana kanyokwama lawu, kalosilwa kwena bambuta, bapfumu ba banganga Nzambi, yi balongi ba mitsiku, bamúhonda, amana kafutumuka kunima bilumbu bitatu. 32Wázimbula mama phwelele. Amana Phetelu wámubonga ku phungamu, wáyandika kumukaya.
33Kaasi wubaluki, watála balonguki bandi, amana wákaya Phetelu: «Katuka ku manima ma meni, Satana! Mukuma wisi banza ko mambu ma Tata wetu, kaasi mambu ma mutu.»
34Wátela mulumba-lumba wa batu yi balonguki bandi, amana wubazimbwadi: «Wosu wuna wuzodi kwisa ku manima ma meni, kafwana kadisuwangana yandi-meni, kabonga kitakani kyandi, amana kandanda meni. 35Wosu wuna wuzodi kuhulula luzingu lwandi, kalutotisa; kaasi wosu wuna watotisa luzingu lwandi kikuma kya meni ni kya Musamu wa Bukheti, kahulula luzingu lwandi. 36Khi mupfunu kwena mutu kavwa tsi yosu amana katotisa luzingu lwandi? 37Mukuma, biki mutu kafwani kuhana mu kusobisa yi luzingu lwandi? 38Mukuma wosu wuna wisi yuka tsoni kikuma kya meni yi kya mambu mama, muna mbandu yayi ya kisanda amana ya masumu, Mwana wa mutu kayuka phi tsoni kikuma kya yandi, muna tangwa kakwísa mu nkembu wa Tata wandi ha kimosi yi banzyo ba bukheti.»
