Marku 7 FHB Father's Heart Bible™

7 ¹Afarisi na anyakulemba anango, ale akhadabwera kubuluka ku Yerusalema, agumanyikana kuzungulira Yezu, ²mbaona kuti anyakupfundza ace anango akhadya nkate na manja akusvipa—ndiko kulonga, manja akukhonda kusambwa. ³(Thangwi Afarisi na Ayuda onsene nkhabe kudya angakhonda kusamba manja mwa mwambo, mbakoya miyambo ya akulu. ⁴Angabwera kubuluka ku nsika, nkhabe kudya angakhonda kusamba. Asakoyambo miyambo minango mizinji yakuti atambira—kutsuka makombe, mbiya, na mitsuko ya utale.). ⁵Penepo Afarisi na anyakulemba am'bvundza kuti: “Thangwi yanji anyakupfundza anu nkhabe kutowezera miyambo ya akulu, mbwenye asadya nkate na manja akusvipa?”

⁶Iye atawira tenepa: “Izaiya acita profesiya mwandimomwene thangwi ya imwe anyapfakafaka, ninga mudalembwa: ‘Anthu awa asandilemedza na milomo yawo, mbwenye ntima wawo uli kutali na Ine.’” ⁷“‘Asandilambira papezi, mbapfundzisa matongero a anthu ninga mapfundziso.’

⁸Imwe musasiya mtemo wa Baba wathu, mbakoya mwambo wa anthu.” ⁹Iye aapanga: “Imwe musacita mwadidi kakamwe kusiya mtemo wa Baba wathu, toera kukoya mwambo wanu wene!” ¹⁰Thangwi Mose alonga: ‘Lemedza baba wako na mai wako,’ pontho ‘Ule anatukana baba peno mai, aphiwe.’ ¹¹“Mbwenye imwe musalonga: munthu angapanga baba peno mai wace kuti: ‘Pyonsene pidafunika imwe kutambira kwa ine ndi Korbani’ (muoni wakuperekwa kuna Baba wathu), ^a a v11 Korbani ikhali dumbiro yakupereka kobiri peno pinthu ku templo, mbaicitisa kuti ikhonde kuphatisirwa toera kucita cinango consene—ngakhale kutsalakana anyakubala ace ene. ¹²penepo imwe nkhabe kuntawirisa pontho kuti acitire baba peno mai wace cinthu consene. ¹³Na tenepo imwe musafudza fala ya Baba wathu na mwambo wanu udaperekwa. Musacita pinthu pizinji ninga penepi.”

¹⁴Iye acemera mwinji pontho, mbaapanga: “Imwe monsene, ndibveserani, mbamubvesesa:” ¹⁵“Nkhabe cinthu ca kunja kwa munthu cakuti cingam'pita cinakwanisa kun'svipisa; mbwenye cinabuluka muna munthu ndico cinan'svipisa.” ^b b v15 Mikanda yakale kakamwe nkhabe na vesi 16 pano; makopya a papita nthawe asathimiza mafala awa: “Ule ali na makutu akubva, abve.”

¹⁷Pidasiya Iye mwinji mbapita m'nyumba, anyakupfundza ace am'bvundza thangwi ya nsangani unoyu.

¹⁸Iye aapanga: “Kodi na imwe nkhabe kubvesesa tenepa? Nkhabe kudziwa kuti nkhabe cinthu ca kunja cakuti cingapita muna munthu cinakwanisa kun'svipisa, ¹⁹thangwi nkhabe kupita muntima mwace, mbwenye mumimba mwace, buluka penepo pisabuluka kuenda ku cimbudzi?” (Mukulonga tenepa, Iye apangiza kuti pyakudya pyonsene ndi pyakucena.). ²⁰Iye alonga: “Cinabuluka muna munthu—ndico cinan'svipisa. ²¹Thangwi nkati mwa munthu, muntima mwace, musabuluka manyerezero akuipa—upombo, umbava, kupha, ²²ulukwali, umbombo, kuipa kwa ntima, uthambi, makhaliro akunyanyasa, nkhombo, kupeula, kudzikuza, na upswiru. ²³Pyonsene pyakuipa pyenepi pisabuluka nkati, mbapin'svipisa munthu.”

Cikhulupiro Cakuwanga ca Nkazi Wakunja

²⁴Yezu abuluka penepo, mbaenda ku madera a Turo. Apita m'nyumba inango, mbakhafuna kuti nkhabe munthu amudziwe, mbwenye nee akwanisa kubisalika. ²⁵Mbwenye nkazi, wakuti mwanace wang'ono wacikazi akhala na nzimu wakukhonda kucena, mukubva mphangwa za Iye, nkhabe kudembuka abwera, mbagwa pa miyendo ya Yezu. ²⁶Nkazi unoyu akhali Mugerego, wakubalwa ku Sirofenisia. Iye akhaphemba Yezu toera abuluse dimonyo muna mwanace wacikazi.

²⁷Iye am'panga: “Lekani ana adye pakutoma, thangwi nkhabe kuthema kukwata nkate wa ana mbuuponya kuna abwa.”

²⁸Mbwenye iye atawira: “Mbuya, ngakhale abwa ali pantsi pa meza asadya pyakugwa pya ana.”

²⁹Iye am'panga: “Thangwi ya ntawiro unoyu, ndoko—dimonyo yabuluka muna mwanako wacikazi.”

³⁰Na tenepo iye aenda kunyumba, mbagumana mwana agona pa nkhuliro, na dimonyo ikhadabuluka kale.

Yezu Asafungula Makutu a Nyakugomba

³¹Na tenepo Yezu abuluka m'madera a Turo, mbapita na ku Sidoni, mbafika ku Bara ya Galileya, nkati mwa madera a Dhekapoli. ^c c v31 Dhekapoli ikhali dera ya mizinda khumi ya Agerego, yakuti ikhali kumabulukiro a dzuwa na kumwera kwa Bara ya Galileya. ³²Am'bweresera mamuna wakugomba wakuti akhacimwana kulonga mwadidi, mbam'phemba kuti aikhe djanja yace padzulu pace. ³³Yezu an'kwata mbaenda naye padembe, kutali na mwinji, mbaikha zala zace m'makutu mwa mamuna, mbasenya mata, mbakhuya lirimi yace.

³⁴Na tenepo, mukulang'ana kudzulu, Iye abuula mwakuzika, mbam'panga: “Efata!” (ndiko kulonga, “Funguka!”).

³⁵Pakumwepo makutu ace afunguka, lirimi yace yasudzuka, mbatoma kulonga mwadidi. ³⁶Yezu aatonga kuti aleke kupanga munthu; mbwenye mukhawatonga kakamwe, iwo akhanyanya kuimwaza mphangwa. ³⁷Iwo adzumatirwa kakamwe, mbalonga: “Iye acita pyonsene mwadidi—asacitisa akugomba kubva, na ambeveve kulonga.”