ግብሪ ሃዋርያት 27 FHB Father's Heart Bible™

27 ¹ናብ ኢጣልያ ብመርከብ ክንጐዓዝ ምስ ተወሰነ ፥ ንጳውሎስን ንገለ ኻልኦት እሱራትን ፥ ዩልዮስ ዝተብሃለ ናይ ንጉሳዊ ጭፍራ ሓለቓ ሚእቲ ኣሕለፍዎም። ²ናብ ወደባት ገምገም እስያ ኽትከይድ ኣብ ዝተበገሰት ፥ ካብ ኣድራሚጢዮን ዝመፀት መርከብ ኣቶና ፥ ናብ ባሕሪ ወፀእና። ካብ ተሰሎንቄ ዝመፀ መቄዶናዊ ኣሪስጥርኮስ ድማ ምሳና ነበረ። ³ንፅባሒቱ ኣብ ሲዶና ኣቶና። ዩልዮስ ድማ ንጳውሎስ ፅቡቕ ገበረሉ ፤ ናብ ፈተውቱ ኸይዱ ኽእለ ኸዓ ፈቐደሉ። ⁴ካብኡ ድማ ናብ ባሕሪ ወፂእና ፥ ንፋሳት ስለ ዝተቓወሙና ፥ ብትሕቲ ቆጵሮስ ኣቢልና ተጓዓዝና። ⁵ነቲ ኣብ ቅድሚ ኪልቅያን ጵንፍልያን ዘሎ ባሕሪ ሰጊርና ተጓዒዝና ፥ ናብ ሚራ ናይ ሉቅያ መፃእና። ⁶ኣብኡ እቲ ሓለቓ ሚእቲ ናብ ኢጣልያ እትኸይድ ካብ እስክንድርያ ዝመፀት መርከብ ረኸበ እሞ ፥ ኣብኣ ፀዓነና። ⁷ብዙሕ መዓልቲ ኣጥፊእና ቀስ እናበልና ተጓዒዝና ፥ ፀጊምና ናብ ቀኒዶስ በፃሕና። ንፋስ ስለ ዝኸልከለና ድማ ፥ ብጥቓ ሳልሞና ኣቢልና ፥ ብትሕቲ ቅሬጥስ ተጓዓዝና። ⁸ብፅጋም ጥቓ ገምገም እናተጓዓዝና ፥ ናብ ሰናይ ወደባት ዝተብሃለ ፥ ኣብ ጥቓ ኸተማ ላሴያ ዘሎ ቦታ በፃሕና።

⁹ብዙሕ ጊዜ ጠፍአ ፤ እቲ ፆም እኳ ሓሊፉ ነበረ እሞ ፥ ሕዚ ብመርከብ ምጉዓዝ ናይ ሓደጋ ኾነ። ስለዙይ ጳውሎስ ኣጠንቐቖም ፥ ^a a v9 “እቲ ፆም” ኣብ ቀውዒ ዝነበረ መዓልቲ ስርየት እዩ ነይሩ ፦ ምስ ሓለፈ ፥ ወቕቲ ድሕንነት ጕዕዞ ባሕሪ ተዓፅዩ ነበረ። ¹⁰“ኣቱም ሰባት ፥ እዝ ጕዕዞ እዙይ ፥ ነቲ ፅዕነትን መርከብን ጥራሕ ዘይኮነ ፥ ንህይወትናውን ፥ ጥፍኣትን ከቢድ ክሳራን ከም ዘምፅእ ፥ እርኢ ኣለኹ” በሎም። ¹¹እቲ ሓለቓ ሚእቲ ግና ፥ ካብ ዘረባ ጳውሎስ ንላዕሊ ፥ ነቲ መራሒ መርከብን ነቲ ዋና መርከብን ኣመኖም። ¹²እቲ ወደብ ንኽረምቲ ዘይምችእ ስለ ዝነበረ ፥ መብዛሕትኦም ፥ ብዝኾነ ይኹን ናብ ፉንቄ በፂሖም ኣብኡ ኽረምቲ ኸሕልፉ ተስፋ ገይሮም ፥ ገና ኽጓዓዙ ወሰኑ። ፉንቄ ኸዓ ፥ ናብ ደቡባዊ ምዕራብን ሰሜናይ ምዕራብን ዝጥምት ወደብ ቅሬጥስ እዩ።

ማዕበል ኣብ ባሕሪ

¹³ደቡባዊ ንፋስ ብህድኣት ምስ ነፈሰ ፥ ዝደለይዎ ኸም ዝረኸብዎ መሲልዎም ፥ መልህቕ ኣልዒሎም ፥ ብጥቓ ቅሬጥስ ኣቢሎም ተጓዓዙ። ¹⁴ድሕሪ ቁሩብ ግና ፥ ሰሜናይ ምብራቓዊ ዝበሃል ብርቱዕ ዝኾነ ህቦቡላ ንፋስ ፥ ካብታ ደሴት ወረደ። ¹⁵እታ መርከብ ተታሕዘት ፥ ገፅ ናብ ንፋስ ክትገብር ስለ ዘይከኣለት ድማ ፥ ኢድና ሂብና ተገፊዕና ኸድና። ¹⁶ቃውዳ ዝበሃል ንእሽተይ ደሴት ብትሕቲ ኣቢልና እናጐየና ፥ ፀጊምና ነታ ናይ መርከብ ጃልባ ኽንሕዛ ኸኣልና። ¹⁷ናብ ላዕሊ ምስ ኣደየብዋ ድማ ፥ ነታ መርከብ ብገመድ ኣሲሮም ኣጠንከርዋ። ኣብ ሑፃ ሱርቲስ ከይወድቁ ፈሪሖም ድማ ፥ መልህቕ ኣውሪዶም ፥ ተገፊዖም ከዱ። ^b b v17 ሱርቲስ ኣብ ገምገም ሰሜናዊ ኣፍሪቃ ዝነበረ ፥ እናተቐያየረ ዝኸይድ ፥ መርከበኛታት ዓለም ዝፈርሕዎ ፥ ፍሉጥ ሑፃ ነበረ። ¹⁸እቲ ማዕበል የመና ስለ ዝሃረመና ፥ ንፅባሒቱ ነቲ ፅዕነት ናብ ባሕሪ ክድርብይዎ ጀመሩ። ¹⁹ኣብ ሳልሳይ መዓልቲ ድማ ፥ ነቲ ኣቕሑ መርከብ ፥ ብኣእዳዎም ናብ ባሕሪ ደርበይዎ። ²⁰ብዙሕ መዓልቲ ፀሓይ ኾነ ኸዋኽብቲ ኣይተርኣዩን ፥ እቲ ብርቱዕ ማዕበል ድማ ይውስኽ ነበረ እሞ ፥ ናይ ምድሓን ኵሉ ተስፋና ኣብ መወዳእታ ቐበፅና።

²¹ነዊሕ ጊዜ እንተይበልዑ ምስ ፀንሑ ድማ ፥ ጳውሎስ ኣብ ማእኸሎም ደው ኢሉ ኸምዙይ በለ ፦ “ኣቱም ሰባት ፥ ክትሰምዑንን ካብ ቅሬጥስ ከይትብገሱን ምተገብአኩም ነይሩ ፤ ሽዑ ነዝ ጥፍኣትን ክሳራን እዙይ ምተረፍኩሞ ነይሩ። ²²ሕዚ ኸዓ ፥ ትፅናንዑ ኢለ እምዕደኩም ኣለኹ ፤ እታ መርከብ ጥራሕ ደኣ ኽትጠፍእ እያ እምበር ፥ ካባኻትኩም ሓደ እኳ ህይወቱ ኣይኽስእን እዩ። ²³ትማሊ ለይቲ ፥ መልኣኽ እቲ ኣነ ናቱ ዝኾንኩን ዘገልግሎን ኣቦና ፥ ኣብ ጥቓይ ደው በለ ፥ ^c c v23 ጳውሎስ ፥ ርሑቕ ኣምላኽ ኣይጠቐሰን ፥ እቲ ናቱ ዝኾነ ኣቦና ደኣ እምበር ፤ ኣብ እትሰጥም መርከብ እኳ ፥ ንሱ ኣብ ክንክን ኣቦኡ ዝነብር ወዲ እዩ። ²⁴ከምዙይ ከዓ በለኒ ፦ ‘ኦ ጳውሎስ ፥ ኣይትፍራሕ ፤ ኣብ ቅድሚ ቄሳር ደው ክትብል ይግበኣካ እዩ ፤ እንሆ ድማ ፥ ኣቦና ፥ ህይወት እቶም ምሳኻ ዝጓዓዙ ዘለዉ ዅሎም ፥ ሂቡካ እዩ።’ ²⁵ስለዙይ ፥ ኣቱም ሰባት ኣጆኹም ፤ ከምቲ እተነገረኒ ኸም ዝኸውን ፥ ብኣቦና እኣምን ኣለኹ። ²⁶ኣብ ሓንቲ ደሴት ግና ክንወድቕ ይግበኣና እዩ”።

ምስባር መርከብ

²⁷ኣብ መበል ዓሰርተ ኣርባዕተ ለይቲ ፥ ገና ኣብ ባሕሪ ኣድርያ እናተገፋዕና እንተለና ፥ ኣጋ ፍርቂ ለይቲ ፥ እቶም መርከበኛታት ፥ ናብ ምድሪ ይቐርቡ ኸም ዘለዉ ኣስተውዓሉ። ²⁸ዕምቀት ባሕሪ ለክዖም ፥ ሚእትን ዒስራን ጫማ ረኸቡ ፤ ቁሩብ ንቕድሚት ምስ ከዱ ድማ ፥ መሊሶም ለክዖም ፥ ተስዓ ጫማ ረኸቡ። ^d d v28 እቲ ናይ ግሪኽ ፥ ዒስራ ፥ ሽዑ ዓሰርተ ሓሙሽተ እመት ይልክዕ ፦ እቲ ቀልጢፉ ዝጎድል ዝነበረ ዕምቀት ፥ ምድሪ የመና ኸም ዝቐረበት ፥ ነቶም መርከበኛታት ኣጠንቀቖም። ²⁹ኣብ ኣኻውሕ ከይተሃርሙ ፈሪሖም ድማ ፥ ካብ ድሕሪት እታ መርከብ ኣርባዕተ መልህቕ ኣውረዱ ፤ ክወግሕ ኸዓ ተመነዩ። ³⁰እቶም መርከበኛታት ፥ ካብ ቅድሚት እታ መርከብ መልህቕ ዘውርዱ ዘለዉ መሲሎም ፥ ነታ ጃልባ ናብ ባሕሪ ኣውሪዶም ፥ ካብ መርከብ ክሃድሙ ደለዩ። ³¹ጳውሎስ ነቲ ሓለቓ ሚእትን ነቶም ወተሃደራትን ፥ “እዚኣቶም ኣብ መርከብ እንተ ዘይፀኒሖም ፥ ንስኻትኩም ክትድሕኑ ኣይትኽእሉን ኢኹም” በሎም። ³²ሽዑ እቶም ወተሃደራት ፥ ነቲ ነታ ጃልባ ዝሕዝ ገመድ ቆሪፆም ፥ ተገፊዓ ክትከይድ ሓደግዋ።

³³ክወግሕ ምስ ጀመረ ፥ ጳውሎስ ንዅሎም ክበልዑ ኣምሓፀኖም ፥ ከምዙይ ከዓ በለ ፦ “እዛ መዓልቲ እዚኣ ፥ ተሻቒልኩም ፥ እንተይበላዕኩም ፥ ገለ እኳ እንተይጠዓምኩም ዝፀናሕኹምላ ፥ መበል ዓሰርተ ኣርባዕተ መዓልቲ እያ። ³⁴ስለዙይ ፥ ክትበልዑ እምሕፀነኩም ኣለኹ ፤ እዙይ ንድሕንነትኩም እዩ እሞ። ካብ ርእሲ ሓደ እኳ ኻባኻትኩም ፥ ሓንቲ ፀጕሪ እኳ ኣይትጠፍእን እያ”። ³⁵እዙይ ኢሉ ፥ እንጀራ ኣልዒሉ ፥ ኣብ ቅድሚ ዅላቶም ንኣቦና ኣመስጊኑ ፥ ቆሪሱ ኽበልዕ ጀመረ። ³⁶ኵላቶም ድማ ተፀናንዑ ፥ ባዕልቶምውን ገለ ምግቢ በልዑ። ³⁷ኣብታ መርከብ ዝነበርና ብዝሖም ፥ ኵላትና ፥ ክልተ ሚእትን ሰብዓን ሽዱሽተን ነፍሳት ነበርና። ³⁸ብምግቢ ምስ ፀገቡ ድማ ፥ ነቲ እኽሊ ናብ ባሕሪ ደርብዮም ፥ ነታ መርከብ ኣፍኰስዋ። ³⁹ምስ ወግሐ ፥ ነታ ምድሪ ኣየለለይዋን ፤ ግና ፥ ሑፃ ዝዓሰሎ ገምገም ዘለዎ ወሽመጥ ኣስተውዓሉ ፤ ዝከኣል እንተ ኾይኑ ኸዓ ፥ ነታ መርከብ ኣብኡ ኸሰፍርዋ መደቡ። ⁴⁰ነቲ መልህቕ ኣብ ባሕሪ ሓዲጎም ቆሪፆም ፈትሕዎ ፤ በቲ ጊዜ እቱይ ድማ ፥ ገመድ መሪሒ ፈትሑ ፤ ነቲ ናይ ቅድሚት ሸራዕ ናብ ንፋስ ኣልዒሎም ፥ ናብቲ ገምገም ኣምርሑ። ⁴¹ክልተ ወሓይዝ ዝራኸቡሉ ሑጻ ዝበዝሐ ቦታ ግና ምስ ሃረሙ፥ ነታ መርከብ ኣብ ምድሪ ኣውደቕዋ፤ እቲ ቅድሚት ተተኺሉ ከይተንቀሳቐሰ ፀንዐ፥ እቲ ድሕሪት ግና ብሓይሊ ማዕበል ተሰባበረ።

⁴²እቶም ወተሃደራት ከዓ ካብኣቶም ሓደ እኳ ሓንቢሱ ምእንቲ ኸየምልጥ፥ ነቶም እሱራት ክቐትልዎም መደቡ። ⁴³እቲ ሓለቓ ሚእቲ ግና ንጳውሎስ ከድሕን ስለ ዝደለየ፥ ካብቲ መደቦም ከልከሎም፤ እቶም ክሕምብሱ ዝኽእሉ ቐዲሞም ናብ ባሕሪ ክነጥሩ፥ ናብ ገምገም ባሕሪ ኸዓ ክወፁ ኣዘዞም፤ ⁴⁴እቶም ዝተረፉ ድማ ገሊኦም ብሳንቃ፥ ገሊኦም ብስብርባር መርከብ ይስዕቡ በሎም። ከምዙይ ድማ ኵሎም ብደሓን ናብ ምድሪ በፅሑ።