ኣብ ማልታ ተቐበሉና

ኣብ ማልታ ተመን ንጳውሎስ ነኸሶ፥ ነበርቲ እታ ደሴት ክወድቕ ተፀበዩ፥ ደሓር ከዓ ኣምላኽ እዩ በሉ። ኣብ ሮሜ ገዛ ተኻርዩ፥ ምስ ዝሕልዎ ወታደር ተኣሲሩ፥ ንመራሕቲ ኣይሁድ ብዛዕባ መንግስቲ ኣቦናን ኢየሱስን ይገልፀሎም ነበረ። ገሊኦም ኣመኑ፥ ገሊኦም ኣይኣመኑን፥ እቲ ዛንታ ኸዓ ብኸምኡ ጠጠው በለ።

ምዕራፍ 28።

ብደሓን ምስ ተሰገርና ድማ፥ እታ ደሴት ማልታ ኸም እትብሃል ፈለጥና። እቶም ኣብታ ቦታ ዝነብሩ ሰባት ዘይልሙድ ሕያውነት ኣርኣዩና፤ ዝናም ጀሚሩ ዛሕሊ ስለ ዝነበረ ድማ፥ ሓዊ ኣንዲዶም ንዅላትና ተቐበሉና። ጳውሎስ ጥማር ዕንፀይቲ ኣኪቡ ኣብ ሓዊ ምስ ኣንበሮ፥ ሓደ መንደላይ ተመን ካብቲ ሃሩር ወፂኡ ኣብ ኢዱ ተጣበቐ። እቶም ኣብታ ቦታ ዝነብሩ ሰባት ነቲ እንስሳ ኣብ ኢዱ ተንጠልጢሉ ምስ ረአዩ፥ ንሓድሕዶም “እዝ ሰብኣይ እዚ ቀታሊ ሰብ እዩ፤ ካብ ባሕሪ እኳ እንተ ኣምለጠ፥ ፍትሒ ህያው ኮይኑ ክነብር ኣይፈቕደሉን እዩ” ተበሃሃሉ። ንሱ ግና ነቲ እንስሳ ናብ ሓዊ ነቕኒቑ ደርበዮ፤ ገለ እኳ ኣይተጐድአን። ንሳቶም ክሓብጥ ወይ ድማ ብድንገት ሞይቱ ክወድቕ ይፅበዩ ነበሩ። ነዊሕ ጊዜ ምስ ተፀበዩ ግና፥ ገለ ኽፉእ ነገር ከም ዘይበፅሖ ምስ ረአዩ፥ ሓሳቦም ቀይሮም “ኣምላኽ እዩ” በሉ።

ኣብ ጥቓ እታ ቦታ ድማ፥ ፑብልዮስ ዝተብሃለ ናይታ ደሴት ዓብዪ ሓለቓ ዝውንኖ ግራውቲ ነበረ፤ ንሱ ኸዓ ተቐቢሉ ሰለስተ መዓልቲ ብሕያውነት ኣአንገደና። ኣቦ ፑብልዮስ ድማ ረስንን ተቕማጥ ደምን ሓሚሙ ደቂሱ ነበረ። ጳውሎስ ኣትዩ፥ ፀሊዩ፥ ኢዱ ኣብ ልዕሊኡ ኣንቢሩ ኣሕወዮ። ድሕሪ እዙይ ድማ፥ እቶም ኣብታ ደሴት ዝነበሩ ዝተረፉ ሕሙማት እውን መፂኦም ሓወዩ። ብዙሕ ክብሪ ድማ ሃቡና፤ ክንጓዓዝ ምስ ኮንና ኸዓ ዘድልየና ዅሉ ፀዓኑልና።

ጳውሎስ ናብ ሮሜ በፅሐ

ድሕሪ ሰለስተ ወርሒ ድማ፥ በታ ኣብታ ደሴት ዝኸረመት፥ ምልክት እቶም መንታ ኣሕዋት ዘለዋ ናይ እስክንድርያ መርከብ ተጓዒዝና። ናብ ሰራኩስ ኣቶና ኸዓ ኣብኡ ሰለስተ መዓልቲ ፀናሕና። ካብኡ ዞርና ናብ ሬጊዩም መፃእና። ድሕሪ ሓንቲ መዓልቲ ድማ ደቡባዊ ንፋስ ተልዓለ፤ በታ ኻልአይቲ መዓልቲ ኸዓ ናብ ፑቲዮሊ በፃሕና። ኣብኡ ድማ ኣሕዋት ረኺብና፥ ሸውዓተ መዓልቲ ምሳታቶም ክንፀንሕ ለመኑና፤ ከምዙይ ጌርና ድማ ናብ ሮሜ መፃእና። እቶም ኣብኡ ዝነበሩ ኣሕዋት ብዛዕባና ሰሚዖም፥ ክሳዕ ዕዳጋ ኣጲዮስን ሰለስተ ቤት መስተን ክቕበሉና መፁ። ጳውሎስ ድማ ንኣኣቶም ምስ ረአየ ንኣቦና ኣመስገነ፥ ተበራትዐ ኸዓ።

ጳውሎስ ብዛዕባ መንግስቲ ኣዋጀ

ናብ ሮሜ ምስ ኣቶና፥ ጳውሎስ ምስቲ ዝሕልዎ ወታደር፥ በይኑ ክቕመጥ ተፈቕደሉ።

ድሕሪ ሰለስተ መዓልቲ ድማ ነቶም ሓለቕቲ ኣይሁድ ኣኪቡ፥ ምስ ተኣከቡ ኸምዙይ በሎም፦ “ኣቱም ኣሕዋት፥ ኣነ ኣብ ልዕሊ ህዝብና ወይ ልማድ ኣቦታትና ሓንቲ እኳ እንተ ዘይገበርኩ፥ ካብ ኢየሩሳሌም ከም እሱር ኮይነ ናብ ኢድ ሮማውያን ተዋሃብኩ። ንሳቶም ድማ ምስ መርመሩኒ፥ ሞት ዘግብኦ ክሲ ስለ ዘይነበረኒ ኽፈትሑኒ ደለዩ። ኣይሁድ ምስ ተቓወሙ ግና፥ ኣብ ህዝበይ ዘቕርቦ ክሲ እኳ እንተ ዘይነበረኒ፥ ናብ ቄሳር ይግባይ ክብል ተገደድኩ። ስለዙይ ክርእየኩምን ክዛረበኩምን ለመንኩኹም፤ ምእንቲ ተስፋ እስራኤል ኢለ በዛ ሰንሰለት እዚኣ ተኣሲረ ኣለኹ እሞ።”

ንሳቶም ድማ፥ “ንሕናስ ካብ ይሁዳ ብዛዕባኻ ደብዳቤ ኣይተቐበልናን፤ ካብ ኣሕዋት ዝመፀ ሓደ እኳ ብዛዕባኻ ገለ ክፉእ ኣየውረየን ወይ ኣይተዛረበን። እዝ ወገን እዚ ኣብ ኵሉ ቦታ ከም ዝቃወምዎ ንፈልጥ ኢና እሞ፥ ንስኻ እንታይ ከም እትሓስብ ክንሰምዕ ንደሊ ኢና” በልዎ።

ሓንቲ መዓልቲ ቖረፁሉ ኸዓ፥ ብዙሓት ኮይኖም ናብቲ ዝሓድረሉ ቦታ መፁ። ካብ ንግሆ ክሳዕ ምሸት ድማ፥ ብዛዕባ መንግስቲ ኣቦና እናመስከረ ገለፀሎም፤ ካብ ሕጊ ሙሴን ካብ ነብያትን ብዛዕባ ኢየሱስ ከረድኦም ፈተነ። ገሊኣቶም በቲ እተዛረቦ ተኣመኑ፤ ገሊኣቶም ግና ኣይኣመኑን። ንሓድሕዶም ድማ ተፈላሊዮም ከዱ፤ ጳውሎስ ከዓ ሓንቲ ናይ መወዳእታ ቓል ወሲኹ ኸምዙይ በለ፦ “መንፈስ ቅዱስ ብነቢይ ኢሳይያስ ጌሩ ነቦታትኩም ቅኑዕ ተዛረበ፦

‘ናብዝ ህዝቢ እዚ ኺድ እሞ በሎም፦ ብምስማዕ ክትሰምዑ ኢኹም፥ ግና ከቶ ኣይክትርድኡን ኢኹም፤ ብምርኣይ ድማ ክትርእዩ ኢኹም፥ ግና ከቶ ኣይክተስተውዕሉን ኢኹም።

ልቢ እዝ ህዝቢ እዚ ደንዚዙ ኣሎ፥ ኣእዛኖም ድማ ከቢድወን ኣሎ፥ ኣዒንቶም ድማ ዓሚቶም ኣለዉ፤ ከይኸውን ብኣዒንቶም ዝርእዩ፥ ብኣእዛኖም ዝሰምዑ፥ ብልቦም ዝርድኡ፥ ተመሊሶም ድማ ዘሕውዮም።’

እምበኣር፥ ምድሓን ኣቦና ናብ ኣህዛብ ከም እተላእከ ፍለጡ፤ ንሳቶም ድማ ክሰምዑ እዮም።” ^a

ኣብቲ ዝተኻረዮ ገዛኡ ድማ ክልተ ምሉእ ዓመት ፀንሐ፤ ናብኡ ዝመፁ ዅሎም ከዓ ተቐበለ፤ መንግስቲ ኣቦና እናሰበኸን ብዛዕባ ጐይታና ኢየሱስ ክርስቶስ ድማ እናመሃረን፥ ብትብዓትን ብዘይ ዕንቅፋትን።