Malta Te Adar Paise

Malta te ekta saap pora Paul ke katise aru dip laga manuh khan tai giri jabo koi kene rukhi thakise, aru pichete tai ekjon dewta ase koi kene bhabise. Rome te tai ekta ghor bhara loise, ekjon sipahi logote sikol te bandhi kene, Yehudi netha khan ke amar Pitri laga rajyo aru Jisu laga kotha bujhai dise. Kunba biswas korise, kunba nakorise, aru kahani tu eneka he rukhi jaise.

Adhyay 28.

Amikhan nirapod pora paar hoi juwa pichete, hei dwip laga nam Malta ase koi kene amikhan janise. Ta te thaka manuh khan pora amikhan ke bisi dangor doya dikhai dise; borkhun ahhi thakise aru thanda thakise karne, tarkhan pora jui julai kene amikhan sob ke grohon korise. Paul pora lakri olop joma kori kene jui te halise, titia gorom pora ekta bikhdhor saap ulai ahhi kene tar laga hath te dhori loise. Tar hath te hei janwar tu lathki thaka dikhi kene, ta te thaka manuh khan ekjon-ekjon ke koise, “Eitu manuh tu khun kora manuh ekjon hobo lage; tai somundur pora bachi ahhise hoilebi, Niyai pora tar ke jinda thakibole nadibo.” Kintu tai hei janwar tu jui te jari phelaise aru tar eku khyoti huwa nai. Tarkhan tai phuli jabo nahole achanak giri kene mori jabo koi kene bhabi thakise. Kintu bisi deri tak sai thaki kene tar ki bhi biya nohua dikhi kene, tarkhan laga mon badli korise aru tai to ekjon isor ase koise.

Hei jagah usor te, dwip laga mukhyo adhikari, kun laga nam Publius ase, tar laga mati thakise; tai pora amikhan ke grohon kori kene tin din tak morom pora rakhise. Publius laga pitri bukhar aru pet-jati laga bemar pora bisana te thakise. Paul bhitor te jai kene, prathana kori kene, tar uporte hath rakhi kene, tai ke bhal kori dise. Eitu huwa pichete, hei dwip te thaka dusra bemar manuh khan bhi ahhi kene bhal hoi jaise. Tarkhan pora amikhan ke bisi sonman dise, aru amikhan jahaj pora jabole homoi te, amikhan ke ki lage sob jinis dhali dise.

Paul Rome Te Ponchise

Tin mohina pichete, hei dwip te thanda din khan te thaki juwa Alexandria laga ekta jahaj, jun te “Duijon Bhai” laga sinho thakise, ta te amikhan jai jaise. Amikhan Syracuse te ponchi kene tin din tak ta te thakise. Ta pora amikhan ghuri kene Rhegium te ponchise. Ek din pichete dakshin phale pora hawa ahhise, aru dusra din te amikhan Puteoli te ponchi jaise. Ta te amikhan bhai aru bhoini khan ke lagi paise aru tarkhan logot sat din tak thakibole koise; titia amikhan Rome te ahhise. Ta te thaka bhai aru bhoini khan amikhan laga kotha huni kene, Appius laga Bajar aru Tinta Sorai-ghor tak amikhan ke lok koribole ahhise. Tarkhan ke dikhi kene, Paul pora amar Pitri ke dhanyobad dise aru mon dangor paise.

Paul Pora Rajyo Prachar Korise

Amikhan Rome te ghusi juwa pichete, Paul ke tar ke rukhdhari kora sipahi logot, nijor ekla thakibole anumoti dise.

Tin din pichete tai Yehudi cholawta khan ke matise. Tarkhan joma hoi juwa pichete, tai tarkhan ke koise, “Bhai khan, moi amar manuh khan laga nahole amar baba-apa khan laga niyom laga birudh te eku kora nai hoilebi, moi ke bondhi manuh hoi kene Jerusalem pora Roma manuh khan laga hath te di dise. Tarkhan moi ke sai-sudi kori kene, moi ke chari dibole mon korise, kilemane moi ke moribole layak eku dhosh thaka nai. Kintu Yehudi khan birodh kora homoi te, moi ke Caesar laga usor te appeal koribole jor-jobordosti hoise—hoilebi moi laga desh laga birudh te anibole moi te eku dhosh thaka nai. Eitu karne moi tumikhan ke dikhi kene kotha koribole mangise—kilemane Israel laga asha nimite moi eitu luha-rusi pindhi ase.”

Tarkhan tai ke koise, “Amikhan tumar kotha te Judea pora eku chithi pa-a nai, aru ta pora aha kun bhai bhi tumar kotha te eku khobor diya nai nahole biya kotha kowa nai. Tumi ki bhabe amikhan huni bole mon ase, kilemane eitu dol laga birudh te sob jagah te kotha koi ase koi kene amikhan jane.”

Tarkhan ek din thik kori kene, bisi manuh tai thaka jaga te ahhise. Phojur pora saj tak tai bujhai dise, amar Pitri laga rajyo laga gawahi di kene, aru Moses laga Niyom aru Bhabobadi khan pora Jisu laga kotha te tarkhan ke mani lobole kosis korise. Tai kowa kotha pora kunba to mani loise, kintu dusra khan biswas kora nai. Tarkhan nijor majot te eku mon nohua karne, Paul pora ses te ekta kotha koi dise, titia tarkhan jai jaise: “Pobitro Atma pora Isaiah bhabobadi dwara tumikhan laga baba-apa khan ke thik koise, koi kene,

“‘Eitu manuh khan logot te jai kene kobi: Tumikhan hunibo to hunibo kintu kitia bhi nabujibo, aru tumikhan sabo to sabo kintu kitia bhi gyan napabo.

Kilemane eitu manuh khan laga mon tan hoi jaise, aru tarkhan laga kaan huni bole bhari hoi jaise, aru tarkhan nijor suku bondh kori loise— nahole tarkhan suku pora dikhibo, aru tarkhan laga kaan pora hunibo, aru tarkhan laga mon pora bujibo, aru ghuri ahhibo, aru Moi tarkhan ke bhal kori dibo.’

Etiya eitu janibi: amar Pitri laga poritran tu desh khan logot te pathai dise—tarkhan hunibo.” ^a

Tai nijor bhara loi kene thaka ghor te pura dui bosor tak thakise, aru tar logot te aha sob manuh ke grohon korise, amar Pitri laga rajyo laga prachar kori kene aru Prabhu Jisu Khrista laga kotha sikhai di kene, mon dangor pora aru eku rukavat nathaki kene.