Matendo ya Mitume 28

28 ¹Tulipokwisha kufikishwa salama, tukafahamu ya kuwa kile kisiwa kinaitwa Malta. ²Wenyeji walitutendea ukarimu usio wa kawaida: waliwasha moto na kutukaribisha sisi sote, kwa kuwa mvua ilikuwa imeanza na kulikuwa na baridi. ³Paulo alipokusanya kichane cha kuni na kukiweka motoni, nyoka mwenye sumu akatoka kwa ajili ya joto, akajishikiza mkononi mwake. ⁴Wenyeji walipomwona yule mnyama akining'inia mkononi mwake, wakaambiana, "Mtu huyu hakika ni muuaji—ijapokuwa ameokoka baharini, Haki haimwachi aishi." ⁵Lakini yeye akamkung'utia yule mnyama motoni, wala hakupata dhara lolote. ⁶Walitazamia avimbe au aanguke ghafula na kufa. Lakini walipokwisha kutazama muda mrefu na kuona hakuna baya lolote lililompata, wakabadili nia zao, wakasema kuwa yeye ni mungu.

⁷Karibu na mahali pale palikuwa na mashamba ya mkuu wa kile kisiwa, jina lake Publio, aliyetukaribisha na kutukirimu kwa ukarimu siku tatu. ⁸Baba yake Publio alikuwa amelala mgonjwa wa homa na kuhara damu. Paulo akaingia, akaomba, akaweka mikono yake juu yake, akamponya. ⁹Baada ya hayo, wagonjwa wengine waliobaki katika kile kisiwa nao wakaja, wakaponywa. ¹⁰Wakatuheshimu kwa heshima nyingi, na tulipoanza safari ya baharini, wakatupakia kila kitu tulichohitaji.

Paulo Awasili Rumi

¹¹Baada ya miezi mitatu tukasafiri katika meli ya Aleksandria iliyokuwa imekaa kisiwani wakati wa baridi, iliyokuwa na alama ya Mapacha. ¹²Tukatia nanga Sirakusa, tukakaa huko siku tatu. ¹³Kutoka huko tukazunguka na kufika Regio. Siku moja baadaye upepo wa kusini ukavuma, na siku ya pili tukafika Puteoli. ¹⁴Huko tukawakuta ndugu, tukasihiwa tukae nao siku saba; ndivyo tulivyofika Rumi. ¹⁵Ndugu waliokuwa huko waliposikia habari zetu, wakaja kutulaki mbali hata Soko la Apio na Mikahawa Mitatu. Paulo alipowaona, akamshukuru Baba yetu, akapata moyo.

Paulo Autangaza Ufalme

¹⁶Tulipoingia Rumi, Paulo aliruhusiwa kukaa peke yake, pamoja na yule askari aliyemlinda.

¹⁷Siku tatu baadaye akawakusanya viongozi wa Kiyahudi. Walipokusanyika, akawaambia, "Ndugu, ingawa sikutenda lolote kinyume cha watu wetu wala desturi za baba zetu, nilitiwa mikononi kama mfungwa kutoka Yerusalemu hata mikononi mwa Warumi. ¹⁸Wao walipokwisha kunihoji, wakataka kunifungua, kwa kuwa sikuwa na kosa lolote linalostahili kifo. ¹⁹Wayahudi walipopinga, nikalazimika kukata rufaa kwa Kaisari—ijapokuwa sikuwa na neno lolote la kulishtaki taifa langu. ²⁰Ndiyo sababu niliomba kuwaona na kusema nanyi—navaa mnyororo huu kwa ajili ya tumaini la Israeli."

²¹Wakamwambia: "Hatukupokea barua zozote kutoka Uyahudi kwa habari zako, wala hakuna ndugu yeyote aliyekuja aliyetoa habari au kunena neno lolote baya juu yako. ²²Tungependa kusikia wewe unavyofikiri, kwa kuwa twajua kuwa madhehebu haya yanenwa vibaya kila mahali."

²³Wakampangia siku, wakamjia mahali alipofikia wakiwa wengi zaidi. Tangu asubuhi hata jioni akawaeleza, akishuhudia habari za ufalme wa Baba yetu, na kujaribu kuwashawishi kwa habari za Yesu kutoka katika Torati ya Musa na Manabii. ²⁴Wengine wakasadiki yale aliyoyanena, lakini wengine hawakuamini. ²⁵Wakiwa hawakubaliani wao kwa wao, wakaondoka baada ya Paulo kuongeza neno moja la mwisho: "Roho Mtakatifu alinena vema na baba zenu kwa kinywa cha nabii Isaya, akisema,

²⁶"'Nenda kwa watu hawa useme: Kwa kusikia mtasikia, wala hamtaelewa; na kwa kuona mtaona, wala hamtatambua.

²⁷Kwa maana moyo wa watu hawa umekuwa mzito, na masikio yao yamekuwa mazito ya kusikia, na macho yao wameyafumba—wasije wakaona kwa macho yao, na kusikia kwa masikio yao, na kuelewa kwa moyo wao, na kugeuka, nami nikawaponya.'

²⁸Basi jueni: wokovu wa Baba yetu umepelekwa kwa mataifa—nao watasikiliza." ^a a v28 Nakala za kale zaidi hazina mstari wa 29 hapa; nakala za baadaye zaongeza: "Naye aliposema haya, Wayahudi wakaondoka, wakiteta sana wao kwa wao."

³⁰Akakaa miaka miwili mizima katika nyumba yake mwenyewe aliyoipanga, akawakaribisha wote waliomjia, ³¹akiutangaza ufalme wa Baba yetu na kufundisha habari za Bwana Yesu Kristo, kwa ujasiri, wala hakuna aliyemzuia.