ሐዋርያት ሥራ 28

28 ¹ድነንም ከወጣን በኋላ፣ ደሴቲቱ መሊጢን እንደምትባል ዐወቅን። ²የአገሩ ሰዎች ያልተለመደ ደግነት አሳዩን፤ ዝናብ ጥሎ ስለ ነበርና ብርድ ስለ ነበር እሳት አንድደው ሁላችንን ተቀበሉን። ³ጳውሎስ እንጨት ሰብስቦ በእሳቱ ላይ በጫነ ጊዜ፣ እፉኝት ከሙቀቱ የተነሣ ወጥታ እጁ ላይ ተጣበቀች። ⁴የአገሩ ሰዎች ፍጡሩን ከእጁ ተንጠልጥሎ ባዩ ጊዜ፣ እርስ በርሳቸው፣ “ይህ ሰው በርግጥ ነፍሰ ገዳይ ነው፤ ከባሕር ቢያመልጥም እንኳ፣ ፍትሕ በሕይወት እንዲኖር አትተወውም” ተባባሉ። ⁵እርሱ ግን ፍጡሩን ወደ እሳቱ አራገፈ፤ ምንም ጕዳት አልደረሰበትም። ⁶እነርሱም ያብጣል ወይም ድንገት ወድቆ ይሞታል ብለው ይጠባበቁ ነበር። ነገር ግን ብዙ ጊዜ ከተመለከቱ በኋላ ምንም ክፉ ነገር እንዳልደረሰበት ባዩ ጊዜ፣ ሐሳባቸውን ለውጠው አምላክ ነው አሉት።

⁷በዚያ ስፍራ አጠገብ የደሴቲቱ የበላይ ሹም የሆነው ጱፑልዮስ የሚባለው ሰው ርስት ነበረ፤ እርሱም ተቀብሎ ሦስት ቀን በደግነት አስተናገደን። ⁸የጱፑልዮስ አባት በንዳድና በተቅማጥ ታሞ ተኝቶ ነበር። ጳውሎስም ገብቶ ጸለየ፤ እጁንም ጭኖበት ፈወሰው። ⁹ከዚህም በኋላ፣ በደሴቲቱ የነበሩት ሌሎች ሕመምተኞች መጥተው ተፈወሱ። ¹⁰ብዙ ክብርም ሰጡን፤ በመርከብ ስንሄድም የሚያስፈልገንን ሁሉ ጫኑልን።

ጳውሎስ ወደ ሮም ደረሰ

¹¹ከሦስት ወር በኋላ፣ በደሴቲቱ ክረምቱን ባሳለፈ፣ የመንታ ወንድማማቾች ምልክት ባለው የእስክንድርያ መርከብ ተሳፈርን። ¹²ሱራኩስም ደርሰን በዚያ ሦስት ቀን ቈየን። ¹³ከዚያም ተነሥተን ዞረን ወደ ሬጊዩም ደረስን። ከአንድ ቀን በኋላ የደቡብ ነፋስ ተነሥቶ፣ በሁለተኛው ቀን ወደ ፑቲዮሉስ ደረስን። ¹⁴በዚያም ወንድሞችና እኅቶች አገኘን፤ ከእነርሱም ጋር ሰባት ቀን እንድንቈይ ለመኑን፤ እንዲሁም ወደ ሮም መጣን። ¹⁵በዚያ ያሉት ወንድሞችና እኅቶች ስለ እኛ ሰምተው እስከ አፊዩስ አደባባይና እስከ ሦስቱ ማደሪያ ቤቶች ድረስ ሊቀበሉን መጡ። ጳውሎስም ባያቸው ጊዜ አባታችንን አመሰገነ፤ ልቡም ተጽናና።

ጳውሎስ መንግሥቱን ሰበከ

¹⁶ወደ ሮም በገባን ጊዜ፣ ጳውሎስ ከሚጠብቀው ወታደር ጋር ለብቻው እንዲኖር ተፈቀደለት።

¹⁷ከሦስት ቀን በኋላ የአይሁድን መሪዎች ሰበሰበ። በተሰበሰቡም ጊዜ እንዲህ አላቸው፤ “ወንድሞች ሆይ፤ በሕዝባችን ላይ ወይም በአባቶቻችን ልማድ ላይ ምንም ባላደርግም እንኳ፣ ከኢየሩሳሌም እንደ እስረኛ ለሮማውያን እጅ ተላልፌ ተሰጠሁ። ¹⁸መርምረውኝም ሞት የሚያስቀጣ ክስ ስላልነበረብኝ ሊፈቱኝ ፈለጉ። ¹⁹አይሁድ በተቃወሙ ጊዜ ግን፣ በሕዝቤ ላይ የማቀርበው ክስ ባይኖረኝም እንኳ፣ ወደ ቄሳር ይግባኝ ለማለት ተገደድሁ። ²⁰ስለዚህ ላያችሁና ላነጋግራችሁ ፈለግሁ፤ ይህን ሰንሰለት የለበስሁት ስለ እስራኤል ተስፋ ነውና።”

²¹እነርሱም እንዲህ አሉት፤ “ስለ አንተ ከይሁዳ ደብዳቤ አልደረሰንም፤ የመጣ ወንድምም ስለ አንተ ክፉ ነገር ያወራ ወይም የተናገረ የለም። ²²ነገር ግን ይህ ወገን በየቦታው እንደሚቃወም ስለምናውቅ፣ አንተ ምን እንደምታስብ ልንሰማ እንወዳለን።”

²³ቀንም ቀጥረው ወደ መኖሪያ ቤቱ በብዛት መጡ። ከጥዋት እስከ ማታም እየመሰከረ የአባታችንን መንግሥት ገለጸላቸው፤ ከሙሴ ሕግና ከነቢያትም ስለ ኢየሱስ ለማሳመን ሞከረ። ²⁴ከፊሎቹ በተናገረው ነገር አመኑ፤ ሌሎቹ ግን ሊያምኑ አልወደዱም። ²⁵እርስ በርሳቸውም ተከራክረው፣ ጳውሎስ አንዲት የመጨረሻ ቃል ከተናገረ በኋላ ሄዱ፤ “መንፈስ ቅዱስ በነቢዩ በኢሳይያስ አማካይነት ለአባቶቻችሁ በትክክል እንዲህ ተናገረ፤

²⁶“‘ወደዚህ ሕዝብ ሄደህ እንዲህ በል፤ መስማትን ትሰማላችሁ፣ ነገር ግን ከቶ አታስተውሉም፤ ማየትንም ታያላችሁ፣ ነገር ግን ከቶ አትመለከቱም።

²⁷የዚህ ሕዝብ ልብ ደንድኗልና፤ ጆሮአቸውም ለመስማት ደንቍሯል፤ ዐይኖቻቸውንም ጨፍነዋል፤ አለዚያ በዐይኖቻቸው አይተው፣ በጆሮአቸውም ሰምተው፣ በልባቸውም አስተውለው፣ ተመልሰው በፈወስኋቸው ነበር።’

²⁸እንግዲህ ይህ የአባታችን ድነት ለአሕዛብ እንደ ተላከ ዕወቁ፤ እነርሱም ይሰሙታል።” ^a a v28 ጥንታዊዎቹ የእጅ ጽሑፎች እዚህ ላይ ቍጥር ፳፱ የላቸውም፤ የኋለኞቹ ቅጂዎች ግን እንዲህ ይጨምራሉ፤ “ይህንም ከተናገረ በኋላ፣ አይሁድ እርስ በርሳቸው እጅግ እየተከራከሩ ሄዱ።”

³⁰ሁለት ዓመት ሙሉ በተከራየው በገዛ ቤቱ ኖረ፤ ወደ እርሱም የሚመጡትን ሁሉ ተቀበለ፤ ³¹የአባታችንንም መንግሥት እየሰበከ፣ ስለ ጌታ ኢየሱስ ክርስቶስ በድፍረትና ያለ ዕንቅፋት ያስተምር ነበር።