使徒行傳 28

28 ¹我哋安全上咗岸之後,先至知道嗰個島叫做米利大。 ²當地嘅人對我哋出奇咁友善:因為開始落雨,天又凍,佢哋就生起一堆火,歡迎我哋所有人。 ³保羅執咗一紮柴放喺火上面嘅時候,有條毒蛇因為受熱走咗出嚟,咬住佢隻手唔放。 ⁴當地人見到條蛇吊喺佢隻手度,就彼此講:「呢個人一定係殺人兇手,雖然佢喺海裏面逃得生,公義都唔會容佢生存。」 ⁵但係保羅將條蛇抌落火裏面,一啲都冇受傷。 ⁶佢哋以為佢就快會腫起嚟,或者突然仆低死咗。但係等咗好耐,見佢一啲事都冇,就改變咗諗法,話佢係神明。

⁷嗰個地方附近有啲田莊,係屬於島上首領嘅,佢個名叫部丟。佢接待我哋,殷勤咁款待咗我哋三日。 ⁸部丟嘅父親發燒又痢疾,病到瞓喺床。保羅入去,禱告,按手喺佢身上,就醫好咗佢。 ⁹咁樣之後,島上其他嘅病人都嚟到,個個都得醫好。 ¹⁰佢哋好尊敬我哋,到我哋開船嘅時候,又將我哋所需要嘅一切都搬上船。

保羅到達羅馬

¹¹過咗三個月,我哋搭上一隻喺呢個島過冬嘅亞歷山大船,船上有「雙子神」做記號。 ¹²我哋喺敘拉古靠岸,喺嗰度停咗三日。 ¹³我哋由嗰度繞道而行,到咗利基翁。過咗一日,颳起南風,第二日就到咗部丟利。 ¹⁴喺嗰度我哋搵到啲弟兄姊妹,佢哋懇求我哋同佢哋一齊住咗七日;然後我哋就去到羅馬。 ¹⁵嗰度嘅弟兄姊妹聽聞我哋嚟,就一直行到亞比烏市同三館嚟迎接我哋。保羅一見到佢哋,就感謝我哋嘅父,得着鼓勵。

保羅宣揚神嘅國

¹⁶我哋入到羅馬,保羅獲准同一個睇守佢嘅士兵一齊,單獨自己住。

¹⁷過咗三日,保羅召集啲猶太人嘅領袖。佢哋聚埋一齊嘅時候,保羅對佢哋講:「各位弟兄,我雖然冇做過任何對唔住我哋民族,或者違背我哋祖先規矩嘅事,但係我喺耶路撒冷就畀人當作囚犯,交喺羅馬人手裏面。 ¹⁸佢哋審問我之後,想釋放我,因為我冇犯過任何該死嘅罪。 ¹⁹但係猶太人反對,我逼於無奈,唯有向該撒上訴;其實我並唔係有咩事要控告自己嘅同胞。 ²⁰就係為咗呢個緣故,我請你哋嚟見面,想同你哋傾;我戴住呢條鎖鏈,係為咗以色列所盼望嘅。」

²¹佢哋對佢講:「我哋冇收過由猶太嚟關於你嘅信,亦都冇任何弟兄嚟到,報告或者講過你啲壞話。 ²²不過我哋想聽下你點諗,因為我哋知道呢個教派周圍都畀人反對。」

²³佢哋約定咗一日,更多人嚟到佢住嘅地方。保羅由朝到晚向佢哋解釋,為我哋父嘅國作見證,又引用摩西嘅律法同眾先知嘅書,想勸佢哋信耶穌。 ²⁴佢所講嘅,有啲人信服,但係有啲人唔肯信。 ²⁵佢哋之間意見唔合,喺保羅講咗最後一句話之後就散去。保羅話:「聖靈藉住先知以賽亞向你哋嘅祖先所講嘅話,真係啱嘅,佢話:

²⁶「『你去對呢班人講: 你哋聽是聽見,卻永遠唔明白; 睇是睇見,卻永遠唔曉得。』

²⁷『因為呢班人嘅心變得麻木,佢哋嘅耳朵 又重聽,眼又閉埋咗;恐怕 佢哋會用眼睇見,用耳 聽見,用心明白, 回轉過嚟,我就醫好佢哋。』

²⁸ 所以你哋要知道:我哋父嘅救恩已經傳到外邦人嗰度,佢哋一定會聽。」 ^a a v28 最早期嘅抄本喺呢度冇第29節;後期嘅抄本加咗:「佢講完呢啲話,啲猶太人就走咗,彼此之間大大爭論。」

³⁰保羅喺自己租嘅地方住咗足足兩年,凡係嚟搵佢嘅人,佢都接待, ³¹放膽宣揚我哋父嘅國,教導關於主耶穌基督嘅道,冇人阻止佢。