Otsak 28

28 ¹Ithumna paisor eina yāmshokserhailaga, yikuiram chi Malta da hoi kaji ithumna theikhui. ²Apam chiwui mibingna ithumli khangatei lukhamashan chitheimi: zingrot haophokta kasik leiwui vang, athumna mei shātrunglaga ithum saikorali mathānthathup samngaroka. ³Paulna thing otrom akha kazipkhuilaga mei chili sang tharan, phara̱ akha kasā chiwui eina shokta awui pāngli hokkhui. ⁴Sāyur chi awui pāngli kangyuikapam kathei eina, apam chiwui mibingna akha eina akhali hānga, "Mayara hi mi shaokathata akhana; ana shamadruwui eina yāmshokhailala, Mashunna ali kharing leikhavai mamayāmara." ⁵Kha ana sāyur chi mei chili kathangtāhailaga, zakkashi masamphangmana. ⁶Ana workhangasakra lah hengsāda pitāda thira da athumna phaninga. Kha atam kasāngkha yangda ali makaphā akhanida mashokwui chi theihaoda, athumna ning ngacheihaida ali vare akha da hoi.

⁷Apam chiwui nganaili yikuiramli akhavā Publius kaho chiwui ngalei leisai; ana ithumli mathānthathup samngarokta kathumthang lumashan eina ithumli simzun sāngasaka. ⁸Publiuswui avāva̱ kakharur kala ashee kazāna kazāhaoda pisai. Paulna azangda, seihā sāda, awuitungli pāng parrorlaga, ali raimi. ⁹Hiwui thili, yikuiramli khalei kazābing kataibing rāda kazāt raimisera. ¹⁰Athumna ithumli khayāshi tarākha sāmi, kala ithumna marikhong tong tharan, ithumna khavātabing saikora ithumli shaksāmi.

Paulna Romeli Vākashung

¹¹Kachāng kathumwui thili, ithumna yikuiramli sikachāng zangkasā Alexanderiawui jahas, 'Ngashira Vānaongarā' da amingnaokahai chili tongvai. ¹²Ithumna Syracuseli vāshungda, apam chili kathumthang pamsanga. ¹³Apam chiwui eina ithumna kuimareida vāda Rhegiumli vāshunga. Zimiksho akha kākapei eina azingshong masi ungda, kakhane zimiksholi ithumna Puteolili vāshunga. ¹⁴Apam chili ithumna shitkasangabing samphangda, athumna ithumli zimiksho shini ngasoda pamsang khavai poi; chieina ithumna Romeli vai. ¹⁵Apam chiwui shitkasangabingna ithumwui pongli shālaga, Appiuswui Forum kala Taverns Kathum eina tangda ithumli samphang khavai rāngaroka. Athumli theilaga, Paulna ithumwui Avāli ningkashi mihailaga malung pingmeihaowa.

Paulna Wungram Hākashoka

¹⁶Ithumna Romeli zang tharan, Paulli ali phārimi raimi akha eina ngasoda kachiphun pamsang khavai mayāmihaowa.

¹⁷Kathumthang kākapei eina, ana Jihudiwui akhavābingli kazipkhui. Athumna kazip tharan, ana athumli hānga, "Ivānaongarā, ina ithumwui mibingli lah ithumwui avāva̱ ngarāwui khangachāli makhamayā khikha masālakla, ili Jerusalemwui eina phātopli zangkasā akha sāda Romewui pāngli mihaowa." ¹⁸Ili ngahānkhayang eina, ina thikhangayi maram akhala maleilui vang, athumna ili chihongaihaowa. ¹⁹Kha Jihudibingna mamayāmada matui tharan, ina iwui yurli khikha kaphen maleilala, Caesarli pophalunghaowa. ²⁰Chiwui vang eina ina nathumli theida matui khavai kapona; kaja Israelwui kachihān chiwui vang ina chā hi eina chaiyāngkasā mina."

²¹Athumna ali hānga, "Ithumna nawui maramli Judeawui eina chithi akhala masamphangmana, kala rākahai achinā akhanidala nawui pongli khikha makaphā unghāng lah mahāngmana. ²²Ithumna nawui kaphaning nganāyangngai, kaja ashang hi apam kachiva̱li matui-ngasungra kaji ithumna thei."

²³Athumna zimiksho akha ngarānlaga mi kachungkhana awui shimzunpamli rākazipa. Ngathorwui eina ngazin eina tangda ana ithumwui Avā wungramwui pongli shākhi mida meisā eina hāngchithei, kala Moseswui ain kala marānbingwui eina Jishuwui pongli athumli shitsang ngasak khavai hotnai. ²⁴Ana kahāng chiwui vang kaikhana shitsangchaowa, kha khangatei kaikhana mashitsangmana. ²⁵Athum khalatta akha eina akha mamayāmada, Paulna naodava tui akha hāngserda athumna thuihaowa: "Manglā Katharana Isaiah marānli chihoda navā ngarāli kayākha mashunghao hānga,

²⁶"'Vada mibing hili hānglu: Nathum shāshāhaira, kha makhuisangmara; kala theitheihaira, kha machukhuimara.

²⁷Kaja mibing hiwui ning tangmanghaira, kala athumwui khanāla mashāpaithura, kala athumwui mik mikpihaira; hi mathāsāsi kaje athumwui mikna theira, kala athumwui khanāna shāra, kala athumwui ning eina bhap tāra, kala ning ngateida, ina athumli raimira.'

²⁸Chiwui vang eina hi theilu: ithumwui Avāwui huikhami hi Gentilebingli chihovāhaira; athumna nganāra." ^a a v28 Haokaphok lairik kachungkhali hili verse 29 maleimana; naoda kakapi kaikhali hi ngaror: "Ana hi hānghailaga, Jihudibingna athum khalatta akha eina akha hakmahā eina ngayātmamānda thuihaowa."

³⁰Ana awui khalatta masā tā kahai shimli zingkum khani katonga pama, kala ali khavābing saikora mathānthathup samngaroka, ³¹ithumwui Avā wungramwui pongli hāshoka, kala Proho Jishu Khristawui pongli pinglak eina, hapkakhano maleila tamchithei.