Katachin eng' Malta
Ki susei ereneet Paulo eng' Malta, ak kogeni piigap olooto kole kobut kome, yeityo kole kamuktaindet ineendet. Eng' Rome, komeny koot ne kagoyaalda, kagorat kanamonik ak riibindet, koboorun laitornatetap Kwandanyo ak Jeso eng' kiptainigap Yahudik. Iyan alak, ma iyan alak, ak kogees ng'olyoot kityo.
28 1Kingo kagisawech komyee kebar, kenai kole kiguure kebemeetnooto Malta. 2Ki boorwech piigap olooto myeeindo ne oo: kolal maat ak kotaach echeek tugul, amu kigonam ropta ak ki mi kaitityet. 3Kingo kayum Paulo kweenik koinde eng' maat, kong'eetu ereneet eng' kiptoret ak konam eunnyi. 4Kingo keer piigap olooto tyong'ndonooto kosonginini eunnyi, koleenjigei, “Imuuchi koek chiichi rumiindet; agot ki kosar eng' nyanjet, ma cham Imanda kosabei.” 5Ago ki pur Paulo tyong'ndonooto kobut eng' maat, ak ma kinyoor kiy ne yaach. 6Ki bwaat kole koonotin anan kobut kome kamuiset. Ago kingo kaimen koger kooi ak koger ma kiy ne yaach ne yachi ineendet, koweekyi muguleldanywa, koguure ineendet kamuktaindet.
7Ki mi eng' ole neegitee olooto mbareenik che po kiptaiyatap kebemeet, ne kiguure Publio, ne kataach echeek ak koriibech komyee eng' peetuusyek somok. 8Ki myani kwandap Publio kolalee maat ak muriindap moo. Ki chut Paulo, kosaaei, koinde eunnyi ineendet, ak kosoop ineendet. 9Kingo kabata niito, konyoonu che myandos alak tugul che mi kebemeet ak kisoop. 10Ki teechei echeek miising', ak kingo keba, koratyinech tuguuk tugul che kiyotinech.
Koit Paulo Rome
11Kingo kabata arawek somok, keba eng' meeliitap Alexandria ne ki mi kebemeet eng' iwot komugul, ne ki kiguure Tupchosyek Aeng'. 12Keit Sirakusa ak ketebi yoo peetuusyek somok. 13Kong'eetyee olooto, keyiem keba kot keit Regio. Kingo kabata peet agenge, kong'eetu koristo ne punu murot tai, ak eng' peet ne po aeng', keit Puteoli. 14Kinyoor yoo tupchosyek ak kiga saaei echeek kele ketebi kobootech peetuusyek tisap; nooto kingo keit Rome. 15Kingo kagas tupchosyek che mi yoo agobo echeek, konyoonu kotuiye echeek agoi Chaametap Apio ak Kaptinetap Somok. Kingo keer icheek Paulo, kogoito kong'oi Kwandanyo ak kogimegitu.
Koamdoe Paulo Laitornatet
16Kingo kechut Rome, kichamchi Paulo kotebi tugegei, kobooto asigarindet ne riibei ineendet.
17Kingo kabata peetuusyek somok, koguur Paulo kiptainigap Yahudik. Kingo koyumgei, koleenji, “Tupchosyek, agot ki ma ayai kiy ne yaach eng' piikyok anan pitonwegap kwanisyekyok, kigooket ani ko uu chiito ne mi korgoreet kong'eetyee Jerusalem koinde eunegap Romaik. 18Kingo kagiljigwa, komachei koounda ani, amu ma atinye kiy ne nyoljin meet. 19Kingo kang'eren Yahudik, ki kiwolwa ale ariirchigei Caesar—agot ma atinye kiy ne amwachi pororyennyu. 20Nooto ne si asoom ale ageerok ak ang'alaalji okweek—amu araatkei sirimdoni amu geniseetap Israel.”
21Koleenji icheek, “Ma king'wooch echeek paronok che punu Judea agobo inyee, ago ma mi tupchennyo age ne konyoonu ne komwa anan ne kamwa kiy ne yaach agobo inyee. 22Kimache kegas ne ibwaati inyee, amu kingen kole ng'alaalchinigei pororyoni komoswek tugul.”
23Kigonde peet, konyoonu eng' kootap toek ne kimenyei ineendet, piik che chaang'. Kong'eetyee mornet agoi koskoleny, koamdoi ak koterter, kobaoreni laitornatetap Kwandanyo ak kotyem kogaigai icheek agobo Jeso kong'eetyee Ng'atuutigap Musa ak Maotik. 24Kiyan alak ng'aleek che kamwa, ago ma yan alak. 25Kingo ma kochobsegei icheek, koba kingo kagoteschi Paulo ng'olyoot age ne po let, “Kamwa iman Kabuuset ne Tiliil eng' kwanisyekwok eng' maotyot Isaiah, koleen,
26‘Wendi pichu ak imwaite: Ogase iman ago ma onai, ak ogeer iman ago ma onyooru.
27Amu kagoiut muguleldap pichu, ak itiikwak kagoiut kogas, ak kagiger konyekwak—si ma koger eng' konyekwak, ak kogas eng' itiikwak, ak konai eng' muguleldanywa, ak koweekyigei, ak asoop icheek.’
28Nooto onai: kiyookto sorutietap Kwandanyo pororyosyek—kingasei icheek.” a a v28 Ma tinyei siruutik che po tai aratuut 29 yu; ak tesei siruutik che po let kole: "Kingo komwa niito, koba Yahudik kong'alaalchinegei miising' icheek kewai."
30Ki tebi Paulo kenyiisyek aeng' komugul eng' koonnyi ne ki iyaali inegei, ak kotaach tugul che konyoonji ineendet, 31koamdoi laitornatetap Kwandanyo ak koneeti agobo Kiptaiyat Jeso Kristo, eng' kimnateet ak ma mi ne terei ineendet.