An Karɓe Mu a Malta

Maciji ya sari Bulus a Malita, mutanen tsibirin suka jira ya faɗi, sa'an nan suka ɗauka shi wani allah ne. A Roma ya yi hayar wuri, an ɗaure shi da soja mai gadi, yana bayyana mulkin Ubanmu da Yesu ga shugabannin Yahudawa. Waɗansu sun gaskata, waɗansu ba su gaskata ba, labarin kuma ya tsaya kawai.

Babi na 28.

Da muka tsira lafiya, sai muka gane cewa ana kiran tsibirin Malta. Mutanen wurin suka nuna mana kirki na ban mamaki; suka hura wuta suka karɓe mu duka, domin ruwan sama ya fara sauka ana kuma sanyi. Da Bulus ya tara dammun itace ya sa a wuta, sai wani maciji mai dafi ya fito saboda zafi, ya manne a hannunsa. Da mutanen wurin suka ga macijin yana rataye a hannunsa, sai suka ce wa juna, “Lalle wannan mutum mai kisankai ne. Ko da yake ya tsira daga teku, Adalci ba zai bar shi da rai ba.” Amma ya karkaɗe macijin cikin wuta, bai kuwa ji wata cuta ba. Suna tsammani zai kumbura ko kuma farat ɗaya ya fāɗi ya mutu. Amma bayan sun daɗe suna kallo ba su ga wani abu mummuna ya same shi ba, sai suka sāke tunaninsu, suka ce shi wani allah ne.

Kusa da wurin nan akwai gonaki na shugaban tsibirin, mai suna Fubuliyus, wanda ya karɓe mu ya kuma yi mana baƙunci da kirki har kwana uku. Mahaifin Fubuliyus yana kwance da ciwo, yana fama da zazzaɓi da atuni. Bulus ya shiga wurinsa, ya yi addu'a, ya ɗora masa hannu, ya warkar da shi. Bayan haka, sauran marasa lafiya a tsibirin suka zo aka kuma warkar da su. Suka girmama mu ƙwarai, kuma sa'ad da za mu tashi, suka yi mana tanadin duk abin da muke bukata.

Bulus Ya Isa Roma

Bayan wata uku, sai muka tashi a cikin wani jirgin ruwa na Iskandariya wanda ya ci damina a tsibirin, mai alamar Tagwayen 'Yan'uwa. Muka sauka a Sirakus, muka zauna a can kwana uku. Daga can muka kewaye muka isa Regiyum. Bayan kwana ɗaya, sai iskar kudu ta taso, a rana ta biyu kuma muka isa Futiyoli. A can muka sami 'yan'uwa, suka roƙe mu mu zauna da su kwana bakwai; sa'an nan muka iso Roma. 'Yan'uwa na can suka ji labarinmu, suka fito don su tarye mu har Kasuwar Afiyus da Masauki Uku. Da Bulus ya gan su, sai ya gode wa Ubanmu, ya kuma sami ƙarfin zuciya.

Bulus Ya Yi Shelar Mulki

Da muka shiga Roma, aka yardar wa Bulus ya zauna shi kaɗai, tare da sojan da yake tsaron sa.

Bayan kwana uku, sai ya tara shugabannin Yahudawa. Da suka taru, sai ya ce musu, “'Yan'uwa, ko da yake ban yi wani abu game da mutanenmu ko al'adun kakanninmu ba, duk da haka an bashe ni a matsayin ɗan kurkuku daga Urushalima a hannun Romawa. Bayan sun bincike ni, suka so su sake ni, domin ban da wani laifin da ya cancanci kisa. Amma da Yahudawa suka ƙi, sai na tilasta kai ƙara gaban Kaisar—ko da yake ba ni da wani laifin da zan kawo a kan al'ummata. Shi ya sa na nemi in gan ku in kuma yi magana da ku—saboda bege na Isra'ila ne nake sanye da wannan sarƙa.”

Suka ce masa, “Ba mu karɓi wasiƙu daga Yahudiya game da kai ba, kuma babu wani ɗan'uwa da ya zo ya ba da labari ko ya faɗi wani mummunan abu game da kai. Muna so mu ji ra'ayinka, domin mun san ana faɗar mugayen abubuwa game da wannan ƙungiya a ko'ina.”

Suka ƙayyade masa rana, suka kuma zo masauƙinsa da yawa fiye da dā. Daga safe har yamma yana musu bayani, yana shaida game da Mulkin Ubanmu, yana kuma ƙoƙari ya rinjaye su game da Yesu daga Dokar Musa da Annabawa. Waɗansu suka gamsu da abin da ya faɗa, amma waɗansu suka ƙi gaskatawa. Da suka kāsa yarda da juna, sai suka tashi bayan Bulus ya ƙara da magana ta ƙarshe guda, ya ce, “Ruhu Mai Tsarki ya yi magana daidai ga kakanninku ta bakin annabi Ishaya, yana cewa,

“‘Ka tafi wurin mutanen nan ka ce: Za ku dinga ji amma ba za ku taɓa ganewa ba, za ku kuma dinga gani amma ba za ku taɓa fahimta ba.

Gama zuciyar mutanen nan ta taurare, kunnuwansu kuma sun kurumce, sun kuma rufe idanunsu—in ba haka ba wata ƙila su gani da idanunsu, su kuma ji da kunnuwansu, su kuma gane da zuciyarsu, su juyo, in kuwa warkar da su.’

Saboda haka ku sani, an aika da ceton Ubanmu ga al'ummai—su kuwa za su saurara.” ^a

Ya zauna shekara biyu cif a wani wurin da ya yi hayarsa, yana kuma karɓan duk waɗanda suka zo wurinsa, yana shelar Mulkin Ubanmu, yana kuma koyarwa game da Ubangiji Yesu Almasihu, gabagaɗi, babu wani abin da ya hana shi.