ሮሜ 1

1 ¹ጳውሎስ፣ የክርስቶስ ኢየሱስ ባሪያ፣ ሐዋርያ ሊሆን የተጠራ፣ ለአባታችን ወንጌል የተለየ፣ ²ይህም ወንጌል በቅዱሳት መጻሕፍት በነቢያቱ በኩል አስቀድሞ ተስፋ የሰጠው ነው፤ ³ይህም ስለ ልጁ ነው፤ እርሱም በምድራዊ ሕይወቱ ከዳዊት ዘር የተወለደ፣ ⁴በቅድስና መንፈስ መሠረት ከሙታን በመነሣቱ የአባታችን ልጅ መሆኑ በኀይል የተገለጠ፤ እርሱም ጌታችን ኢየሱስ ክርስቶስ ነው። ⁵ስለ ስሙ በአሕዛብ ሁሉ መካከል ለእምነት መታዘዝ ጸጋንና ሐዋርያነትን በእርሱ በኩል ተቀበልን፤ ⁶እናንተም የኢየሱስ ክርስቶስ ለመሆን ከተጠሩት መካከል ናችሁ። ⁷በሮም ላሉት ሁሉ፣ በአባታችን ለተወደዳችሁና ቅዱስ ሕዝቡ ልትሆኑ ለተጠራችሁ፤ ከአባታችንና ከጌታ ኢየሱስ ክርስቶስ ጸጋና ሰላም ለእናንተ ይሁን።

ወንጌልን ለማድረስ መጓጓት

⁸በመጀመሪያ፣ እምነታችሁ በዓለም ሁሉ ስለሚነገር፣ ስለ ሁላችሁ በኢየሱስ ክርስቶስ በኩል አባቴን አመሰግናለሁ። ⁹በልጁ ወንጌል በመንፈሴ የማገለግለው አባታችን፣ ሁልጊዜ በጸሎቴ እንደማስባችሁ ምስክሬ ነውና፤ ¹⁰በአባታችን ፈቃድ እንደ ምንም ቢሆን አሁን በመጨረሻ ወደ እናንተ ለመምጣት እንዲሳካልኝ እለምናለሁ። ¹¹የሚያጠነክራችሁን መንፈሳዊ ስጦታ እንዳካፍላችሁ ላያችሁ እናፍቃለሁና፤ ¹²ይህም ማለት፣ በእናንተና በእኔ እምነት፣ እርስ በርስ አንዳችን በሌላችን እምነት እንድንጽናና ነው።

¹³ወንድሞችና እኅቶች ሆይ፤ እንደ ቀሩት አሕዛብ ሁሉ በእናንተም መካከል ፍሬ እንዳገኝ ወደ እናንተ ልመጣ ብዙ ጊዜ አስቤ እንደ ነበር፣ ነገር ግን እስከ አሁን እንደ ተከለከልሁ ታውቁ ዘንድ እወዳለሁ። ¹⁴ለግሪኮችና ለግሪክ ላልሆኑት፣ ለጥበበኞችና ለሞኞች ዕዳ አለብኝ። ¹⁵ስለዚህ በሮም ላላችሁ ለእናንተም ወንጌልን ለመስበክ እጓጓለሁ።

¹⁶በወንጌል አላፍርም፤ ለሚያምን ሁሉ፣ አስቀድሞ ለአይሁዳዊ፣ ደግሞም ለግሪክ፣ ለድነት የአባታችን ኀይል ነውና።

¹⁷የአባታችን ጽድቅ ከእምነት ወደ እምነት በእርሱ ይገለጣልና፤ “ጻድቅ በእምነት ይኖራል” ተብሎ እንደ ተጻፈ። ^a a v17 “ከእምነት ወደ እምነት”፦ ወንጌል ከመጀመሪያው እስከ መጨረሻው ድረስ ሙሉ በሙሉ በእምነት ኀይል ያገኛል።

የአባታችን ቍጣ በኀጢአት ላይ

¹⁸የአባታችን ቍጣ እውነትን በዐመፅ በሚያፍኑ ሰዎች፣ በሰዎች ኀጢአተኝነትና ዐመፅ ሁሉ ላይ ከሰማይ ይገለጣልና። ¹⁹ስለ አባታችን ሊታወቅ የሚቻለው ነገር ለእነርሱ የተገለጠ ነውና፤ አባታችን ራሱ ገልጦላቸዋልና። ²⁰ዓለም ከተፈጠረ ጀምሮ፣ የማይታዩ ባሕርያቱ፣ ይኸውም የዘላለም ኀይሉና መለኮታዊ ባሕርዩ፣ ከተፈጠሩት ነገሮች ተረድተው በግልጥ ይታያሉ። ስለዚህ ምክንያት የላቸውም። ²¹አባታችንን ቢያውቁም፣ እንደ አምላክ አላከበሩትም፤ አላመሰገኑትም፤ ይልቁንም አሳባቸው ከንቱ ሆነ፤ ማስተዋል የጐደለው ልባቸውም ጨለመ። ²²ጥበበኞች ነን እያሉ ሞኞች ሆኑ፤ ²³የማይሞተውን የአባታችንን ክብር በሚሞት ሰው፣ በወፎች፣ በእንስሳትና በሚሳቡ ፍጥረታት መልክ በተሠሩ ምስሎች ለወጡ። ²⁴ስለዚህ አባታችን በልባቸው ምኞት መሠረት ሰውነታቸውን እርስ በርሳቸው ያዋርዱ ዘንድ ለርኵሰት አሳልፎ ሰጣቸው፤ ²⁵ስለ አባታችን ያለውን እውነት በውሸት ስለ ለወጡ፣ ከፈጣሪ ይልቅ ፍጥረትን አመለኩ፤ አገለገሉም፤ ፈጣሪው ለዘላለም የተባረከ ነው። አሜን።

²⁶በዚህ ምክንያት አባታችን ለሚያሳፍር ምኞት አሳልፎ ሰጣቸው። ሴቶቻቸው ተፈጥሯዊ ግንኙነትን ከተፈጥሮ ውጭ በሆነ ለወጡ። ²⁷እንደዚሁም ወንዶች ደግሞ ከሴቶች ጋራ ያለውን ተፈጥሯዊ ግንኙነት ትተው እርስ በርሳቸው በፍትወት ተቃጠሉ፤ ወንዶች ከወንዶች ጋራ ነውር ፈጸሙ፤ ለስሕተታቸውም የሚገባውን ቅጣት በራሳቸው ተቀበሉ። ²⁸አባታችንን በእውቀታቸው ለማቆየት እንቢ ስላሉ፣ የማይገባውን ነገር ያደርጉ ዘንድ ለማይረባ አእምሮ አሳልፎ ሰጣቸው። ²⁹ዐመፅ፣ ክፋት፣ መጐምጀትና ተንኰል ሁሉ ሞላባቸው፤ በቅናት፣ በነፍስ ግድያ፣ በጠብ፣ በማታለልና በመጥፎ ዐሳብ ተሞሉ፤ አሜናባዮች፣ ³⁰ስም አጥፊዎች፣ አባታችንን የሚጠሉ፣ ድፍረተኞች፣ ትዕቢተኞች፣ ጉረኞች፣ ክፋትን የሚፈጥሩ፣ ለወላጆቻቸው የማይታዘዙ፣ ³¹የማያስተውሉ፣ ቃል የማያከብሩ፣ ፍቅር የሌላቸው፣ ምሕረት የሌላቸው ናቸው። ³²እንደዚህ ያሉትን የሚያደርጉ ሞት እንደሚገባቸው የአባታችንን የጽድቅ ሕግ እያወቁ፣ እነርሱ ራሳቸው ከማድረግ አልፈው የሚያደርጉትን ሰዎች ያወድሳሉ።