Romu 1

1 ¹Paulu, ìránṣẹ́ Kristi Jesu, ẹni tí a pè láti jẹ́ aposteli, tí a yà sọ́tọ̀ fún ìhìnrere Baba wa, ²ìhìnrere tí ó ti ṣèlérí ṣáájú láti ẹnu àwọn wòlíì rẹ̀ nínú Ìwé Mímọ́, ³ní ti Ọmọ rẹ̀, ẹni tí, ní ti ìgbé ayé rẹ̀ lórí ilẹ̀ ayé, ó ti ìran Dafidi wá, ⁴tí a sì fihàn pé ó ni Ọmọ Baba wa pẹ̀lú agbára, gẹ́gẹ́ bí Ẹ̀mí ìwà mímọ́, nípa àjíǹde rẹ̀ kúrò nínú òkú—Jesu Kristi Olúwa wa. ⁵Nípasẹ̀ rẹ̀ ni àwa gbà oore-ọ̀fẹ́ àti ipò aposteli, fún ìgbọràn ìgbàgbọ́ láàrin gbogbo àwọn orílẹ̀-èdè, nítorí orúkọ rẹ̀, ⁶ẹ̀yin pẹ̀lú sì wà lára àwọn tí a pè láti jẹ́ ti Jesu Kristi. ⁷Sí gbogbo yín tí ẹ wà ní Romu, àwọn tí Baba wa fẹ́ràn, tí a sì pè láti jẹ́ ènìyàn mímọ́ rẹ̀: Oore-ọ̀fẹ́ àti àlàáfíà fún yín láti ọ̀dọ̀ Baba wa àti Olúwa Jesu Kristi.

Ìtara Láti Mú Ìhìnrere Wá

⁸Lákọ̀ọ́kọ́, mo dúpẹ́ lọ́wọ́ Baba mi nípasẹ̀ Jesu Kristi nítorí gbogbo yín, nítorí a ń ròyìn ìgbàgbọ́ yín káàkiri ayé. ⁹Nítorí Baba wa ni ẹlẹ́rìí mi, ẹni tí mo ń fi ẹ̀mí mi sìn nínú ìhìnrere Ọmọ rẹ̀, pé mo ń rántí yín nígbà gbogbo nínú àdúrà mi, ¹⁰tí mo ń bèèrè pé bóyá nípa ìfẹ́ Baba wa, mo lè nígbẹ̀yìngbẹ́yín ṣàṣeyọrí láti wá sọ́dọ̀ yín nísinsìnyí. ¹¹Nítorí mo ń ṣàfẹ́rí láti rí yín, láti pín ẹ̀bùn tẹ̀mí kan fún yín tí yóò fún yín lókun, ¹²èyí ni pé, kí àwa lè gba ìwúrí fún ara wa nípa ìgbàgbọ́ ara wa, ti yín àti ti èmi.

¹³Mo fẹ́ kí ẹ mọ̀, ẹ̀yin ará: Nígbà púpọ̀ ni mo ti pète láti wá bẹ̀ yín wò, ṣùgbọ́n a dí mi lọ́wọ́ títí di ìsinsìnyí—kí èmi lè kórè díẹ̀ láàrin yín pẹ̀lú, gẹ́gẹ́ bí láàrin àwọn orílẹ̀-èdè yòókù. ¹⁴Mo jẹ gbèsè fún àwọn Giriki àti àwọn tí kì í ṣe Giriki, fún ọlọ́gbọ́n àti aṣiwèrè. ¹⁵Nítorí náà, mo ní ìtara láti wàásù ìhìnrere fún ẹ̀yin pẹ̀lú tí ẹ wà ní Romu.

¹⁶Ojú kì í tì mí nítorí ìhìnrere—agbára Baba wa ni fún ìgbàlà sí olúkúlùkù ẹni tí ó bá gbàgbọ́, sí Júù ní àkọ́kọ́, àti sí Giriki pẹ̀lú.

¹⁷Nítorí nínú rẹ̀ ni a ti fi òdodo Baba wa hàn, láti ìgbàgbọ́ dé ìgbàgbọ́, gẹ́gẹ́ bí a ti kọ ọ́ pé: “Olódodo yóò wà láàyè nípa ìgbàgbọ́.” ^a a v17 “Láti ìgbàgbọ́ dé ìgbàgbọ́”: ìgbàgbọ́ ni ó ń fún ìhìnrere lókun ní gbogbo ọ̀nà—láti ìbẹ̀rẹ̀ dé òpin.

Ìbínú Baba Wa Sí Ẹ̀ṣẹ̀

¹⁸Nítorí a ti fi ìbínú Baba wa hàn láti ọ̀run wá sí gbogbo àìwà-bí-Ọlọ́run àti àìṣòdodo ènìyàn, àwọn tí ń fi àìṣòdodo tẹ òtítọ́ mọ́lẹ̀. ¹⁹Ohun tí a lè mọ̀ nípa Baba wa hàn gbangba sí wọn, nítorí òun ti sọ ọ́ di gbangba fún wọn. ²⁰Láti ìgbà dídá ayé, àwọn ànímọ́ rẹ̀ tí a kò lè fojú rí—agbára àìnípẹ̀kun àti ìwà Ọlọ́run rẹ̀—ni a ń rí kedere, tí a sì ń mòye wọn nínú ohun tí ó dá. Nítorí náà, wọn kò ní àwáwí. ²¹Bí ó tilẹ̀ jẹ́ pé wọ́n mọ Baba wa, wọn kò bọlá fún un gẹ́gẹ́ bí Ọlọ́run, bẹ́ẹ̀ ni wọn kò sì dúpẹ́ lọ́wọ́ rẹ̀—dípò bẹ́ẹ̀, èrò wọn di asán, ọkàn wọn aláìlóye sì ṣú. ²²Bí wọ́n ti ń pe ara wọn ní ọlọ́gbọ́n, wọ́n di aṣiwèrè, ²³wọ́n sì fi ògo Baba wa tí kì í kú pààrọ̀ àwòrán tí a mọ bí ènìyàn tí ń kú àti àwọn ẹyẹ àti ẹranko àti ohun afàyàfà. ²⁴Nítorí náà, Baba wa fà wọ́n lé ìfẹ́kúfẹ̀ẹ́ ọkàn wọn lọ́wọ́, sí ìwà àìmọ́, láti máa dójútì ara wọn láàrin ara wọn, ²⁵nítorí tí wọ́n fi òtítọ́ nípa Baba wa pààrọ̀ irọ́, tí wọ́n ń foríbalẹ̀ fún tí wọ́n sì ń sìn ẹ̀dá dípò Ẹlẹ́dàá, ẹni tí ó ni ìbùkún títí láéláé. Àmín.

²⁶Nítorí èyí, Baba wa fà wọ́n lé ìfẹ́kúfẹ̀ẹ́ ìtìjú lọ́wọ́. Àwọn obìnrin wọn fi ìbáṣepọ̀ ẹ̀dá pààrọ̀ èyí tí kì í ṣe ti ẹ̀dá. ²⁷Bákan náà, àwọn ọkùnrin pẹ̀lú kọ ìbáṣepọ̀ ẹ̀dá pẹ̀lú obìnrin sílẹ̀, tí ìfẹ́kúfẹ̀ẹ́ ń jó wọn fún ara wọn—àwọn ọkùnrin ń bá ọkùnrin ṣe ohun ìtìjú, tí wọ́n sì ń gba èrè tí ó tọ́ sí àṣìṣe wọn nínú ara wọn. ²⁸Níwọ̀n bí wọ́n ti kọ̀ láti pa Baba wa mọ́ nínú ìmọ̀ wọn, ó fà wọ́n lé èrò-inú tí kò yẹ lọ́wọ́, láti máa ṣe ohun tí kò tọ́. ²⁹Wọ́n kún fún gbogbo àìṣòdodo, ìwà búburú, ìwọra, àti àrankàn; wọ́n kún fún ìlara, ìpànìyàn, ìjà, ẹ̀tàn, àti ọkàn búburú; wọ́n jẹ́ afọ̀rọ̀kẹ́lẹ́, ³⁰abanijẹ́, akórìíra Baba wa, afojúdi ènìyàn, agbéraga, aṣẹ̀fọ́nnu, àwọn tí ń hùmọ̀ ibi, aṣàìgbọràn sí àwọn òbí wọn, ³¹aláìgbọ́n, aláìnígbàgbọ́, aláìnífẹ̀ẹ́, aláìláàánú. ³²Bí ó tilẹ̀ jẹ́ pé wọ́n mọ àṣẹ òdodo Baba wa pé àwọn tí ń ṣe irú nǹkan bẹ́ẹ̀ tọ́ sí ikú, wọn kì í ṣe pé wọ́n ń ṣe wọ́n nìkan, ṣùgbọ́n wọ́n tún ń gbóríyìn fún àwọn tí ń ṣe wọ́n.