د عيسىٰ مسيح کېدلو دپاره بلل شوى

د زېري په اړه د پولوس تر ټولو بشپړه تشریح: د انسان ګناه، د خدای صداقت، او د ایمان له لارې په فضل سره نجات. هغه لیک چې کلیسا یې تر هر بل لیک ډېره بڼه کړې ده.

څپرکی 1.

پولوس، چې د عيسىٰ مسيح يو خادم دے، د رسول کېدو دپاره بلل شوے او د زمونږ پلار د اِنجيل دپاره بېل کړے شوے، هغه اِنجيل چې هغۀ د مخکښې نه د خپلو نبيانو په وسيله په پاکو صحيفو کښې وعده کړے وو، د هغۀ د زوئ په حقله، چې د خپل زمکنى ژوند په لحاظ د داؤد د نسل نه وو، او د پاکوالى د روح په لحاظ، د مرګ نه د هغۀ د بيا راژوندى کېدو په وسيله په قدرت سره د زمونږ پلار زوئ قرار ورکړے شو، يعنې زمونږ مالِک عيسىٰ مسيح. د هغۀ په وسيله مونږ ته فضل او رسالت ملاو شو، دې دپاره چې د هغۀ د نوم په خاطر په ټولو قومونو کښې د ايمان فرمانبردارى پېدا شى، او تاسو هم په هغه خلقو کښې يئ چې د عيسىٰ مسيح کېدلو دپاره بلل شوى دى. دا خط هغه ټولو ته دے چې په روم کښې دى، چې د زمونږ پلار محبوبان دى او د هغۀ د مُقدس قوم کېدو دپاره بلل شوى دى: پر تاسو باندې دې د زمونږ پلار او د مالِک عيسىٰ مسيح له خوا فضل او سلامتى وى.

د اِنجيل رسولو دپاره بې‌تابى

اول، زۀ د عيسىٰ مسيح په وسيله ستاسو ټولو دپاره د خپل پلار شکر اداء کوم، ځکه چې ستاسو د ايمان خبره په ټوله دُنيا کښې مشهوره شوې ده. ځکه چې زمونږ پلار زما ګواه دے، چې زۀ يې د هغۀ د زوئ په اِنجيل کښې په خپل روح سره خدمت کوم، چې زۀ تاسو تل په خپلو دُعاګانو کښې يادوم، او دا غواړم چې کۀ څنګه د زمونږ پلار په رضا اوس بالاخره زۀ ستاسو ته په راتلو کښې کامياب شم. ځکه چې زۀ ستاسو د ليدو ارمان لرم، چې کوم روحانى نعمت تاسو ته طاقت درکوى هغه درسره شريک کړم، يعنې دا چې مونږ د يو بل د ايمان په وسيله، ستاسو او زما دواړو، يو بل ته حوصله ورکړو.

اے وروڼو او خويندو، زۀ غواړم چې تاسو ته معلومه وى چې ما ډېر ځله اراده کړې وه چې ستاسو ليدو ته راشم، خو تر اوسه پورې زۀ ترې منع شوم، دې دپاره چې لکه څنګه چې په نورو قومونو کښې، هم هغه شان په تاسو کښې هم څۀ فصل حاصل کړم. زۀ د يونانيانو او غير يونانيانو، د عقلمندو او بې‌عقلو پوروړے يم. نو ځکه زۀ تيار يم چې تاسو ته هم، چې په روم کښې يئ، د اِنجيل منادى وکړم.

زۀ د اِنجيل نه شرمنده نۀ يم، ځکه چې دا د زمونږ پلار هغه قدرت دے چې هر چا ته چې ايمان راوړى د خلاصون دپاره دے، اول يهوديانو ته او بيا يونانيانو ته هم.

ځکه چې په دې کښې د زمونږ پلار صداقت څرګنديږى، د ايمان نه ايمان ته، لکه څنګه چې ليکلے شوے دے، ”صادق به په ايمان سره ژوندے وى.“ ^a

د ګناه په خلاف د زمونږ پلار غضب

ځکه چې د زمونږ پلار غضب د انسانانو د ټولې بې‌دينۍ او ناانصافۍ په خلاف د آسمان نه څرګنديږى، د هغه خلقو په خلاف چې په ناانصافۍ سره حق پټوى. ځکه چې د زمونږ پلار په حقله څۀ چې پېژندل کېدے شى هغه هغوئ ته ښکاره دى، ځکه چې هغۀ هغه ورته ښکاره کړى دى. د دُنيا د پېدايښت نه، د هغۀ ناليدونکى صفتونه، يعنې ابدى قدرت او الوهيت، د هغۀ د پېدا کړو شيانو نه ښۀ ښکاره کيږى او پوهېدے شى. نو هغوئ سره هيڅ بهانه نشته. اګر چې هغوئ زمونږ پلار پېژندلو، خو د خُدائ پاک په شان يې د هغۀ عزت ونۀ کړو او نۀ يې شکر اداء کړو، بلکې د هغوئ سوچونه بې‌کاره شول او د هغوئ بې‌عقله زړۀ تاريک شول. هغوئ ځان عقلمند ګڼلو، خو احمقان شول، او د خپل نۀ‌فنا کېدونکى پلار لوئى يې د داسې بُتانو سره بدله کړه چې د فانى انسان، مرغانو، ځناورو او خزندو په شکل وُو. نو ځکه زمونږ پلار هغوئ د زړونو خواهشاتو ته، ناپاکۍ ته وسپارل، چې هغوئ خپل بدنونه د يو بل سره بې‌عزته کړل، ځکه چې هغوئ د زمونږ پلار په حقله حق د دروغو سره بدل کړو، او د خالق په ځائ يې د مخلوق عبادت او خدمت وکړو، هغه خالق چې د تل دپاره مُبارک دے. آمين.

د دې په سبب، زمونږ پلار هغوئ د شرم‌ناکو خواهشاتو ته وسپارل. د هغوئ ښځو خپل طبعى تعلقات د غير طبعى تعلقاتو سره بدل کړل. هم هغه شان، سړو هم د ښځو سره طبعى تعلقات پرېښودل او د يو بل دپاره په شهوت کښې وسوزېدل، سړو د سړو سره بې‌حيائى وکړه او د خپلې غلطۍ مناسبه سزا يې په خپلو ځانونو کښې ومونده. او چونکې هغوئ زمونږ پلار په خپل علم کښې ساتل ونۀ منل، نو هغۀ هغوئ خراب ذهن ته وسپارل چې ناوړه کارونه وکړى. هغوئ د هر قسم ناانصافۍ، بدۍ، لالچ او کينې نه ډک وُو، د حسد، قتل، جګړې، دوکې او بدخواهۍ نه ډک وُو، هغوئ غيبت کوونکى دى، تهمت لګوونکى، د زمونږ پلار دشمنان، بې‌ادبه، مغرور، لافان وهونکى، د بدو کارونو ايجادوونکى، د خپلو مور او پلار نافرمانه، بې‌عقله، بې‌وفا، بې‌مينې او بې‌رحمه دى. اګر چې هغوئ د زمونږ پلار دا صادق حُکم پېژنى چې څوک چې داسې کارونه کوى هغه د مرګ لائق دى، خو هغوئ نۀ يواځې دا کارونه کوى بلکې د هغه کسانو تعريف هم کوى چې دا کارونه کوى.