ሮሜ 2

2 ¹ስለዚህ አንተ ማንም ሁን፣ ሌላውን በምትፈርድበት ጊዜ ምንም ምክንያት የለህም፤ በመፍረድህ ራስህን ትኰንናለህ፤ አንተ ደግሞ እነዚያኑ ነገሮች ታደርጋለህና። ²እንደዚህ ያሉትን በሚያደርጉት ላይ የአባታችን ፍርድ በእውነት እንደሚሆን እናውቃለን። ³እንደዚህ ያሉትን በራስህ እያደረግህ ሌሎችን የምትፈርድ አንተ፣ ከአባታችን ፍርድ የምታመልጥ ይመስልሃልን? ⁴ወይስ የአባታችን ቸርነት ወደ ንስሓ ሊመራህ እንዳለው ሳታስተውል፣ የቸርነቱን፣ የመቻቻሉንና የትዕግሥቱን ባለጠግነት ትንቃለህን? ⁵ነገር ግን በጠጣርና ንስሓ በማይገባ ልብህ ምክንያት፣ የአባታችን ጽድቅ ፍርድ በሚገለጥበት በቍጣው ቀን ለራስህ ቍጣን ታከማቻለህ። ⁶ለእያንዳንዱ እንደ ሥራው ይከፍለዋል። ⁷በበጎ ሥራ ጸንተው ክብርን፣ ሞገስንና የማይጠፋ ሕይወት ለሚፈልጉ የዘላለምን ሕይወት ይሰጣቸዋል። ⁸ራሳቸውን ለሚፈልጉ፣ እውነትን ለሚጥሉና ክፋትን ለሚከተሉ ግን ቍጣና መዓት ይሆንባቸዋል። ⁹ክፉ ለሚያደርግ ሰው ሁሉ መከራና ጭንቀት ይሆንበታል፤ አስቀድሞ ለአይሁዳዊ፣ ቀጥሎም ለግሪክ፤ ¹⁰በጎ ለሚያደርግ ሁሉ ግን ክብር፣ ሞገስና ሰላም ይሆንለታል፤ አስቀድሞ ለአይሁዳዊ፣ ቀጥሎም ለግሪክ። ¹¹አባታችን አድልዎ አያደርግምና። ¹²ሕግ ሳይኖራቸው ኀጢአት የሠሩ ያለ ሕግ ደግሞ ይጠፋሉ፤ ከሕግ በታች ሆነው ኀጢአት የሠሩ በሕግ ይፈረድባቸዋል። ¹³ሕግን የሚሰሙ በአባታችን ፊት ጻድቃን አይደሉምና፤ ሕግን የሚያደርጉ ግን ይጸድቃሉ። ¹⁴በርግጥ ሕግ የሌላቸው አሕዛብ ሕግ የሚያዝዘውን በባሕርያቸው ሲያደርጉ፣ ሕግ ባይኖራቸውም እንኳ ሕጉ በውስጣቸው ይሠራል። ¹⁵የሕጉ ሥራ በልባቸው ተጽፎ እንዳለ ያሳያሉ፤ ኅሊናቸውም ይመሰክራል፤ የሚጋጩ ሐሳቦቻቸውም ይከሷቸዋል ወይም ይከላከሉላቸዋል። ¹⁶ይህም አባታችን በኢየሱስ ክርስቶስ በኩል የሁሉን ምስጢር በሚፈርድበት ቀን ይሆናል፤ ወንጌሌ እንደሚለው። ^a a v16 ፈራጁ አባታችን ነው፤ ነገር ግን በልጁ በኩል ይፈርዳል፤ አብ ፍርድን ሁሉ ለኢየሱስ አደራ ሰጥቷልና።

ሕጉ አያድንህም

¹⁷አንተ ግን አይሁዳዊ ነኝ ብለህ ብትጠራ፣ በሕግ ብትደገፍ፣ በአባታችንም ብትመካ፣ ¹⁸የአባታችንን ፈቃድ ብታውቅ፣ ከሕግም ተምረህ የሚበልጠውን ብትመርጥ፣ ¹⁹ለዕውሮች መሪ፣ በጨለማም ላሉ ብርሃን እንደ ሆንህ ብታምን፣ ²⁰የሰነፎች አቅኚ፣ የሕፃናትም አስተማሪ፣ በሕግ ውስጥ የዕውቀትና የእውነት መልክ እንዳለህ ብትተማመን፤ ²¹ሌሎችን የምታስተምር አንተ፣ ራስህን አታስተምርምን? አትስረቅ ብለህ የምትሰብክ፣ አንተ ትሰርቃለህን? ²²አታመንዝር የምትል አንተ፣ ታመነዝራለህን? ጣዖትን የምትጸየፍ አንተ፣ ቤተ መቅደሶችን ትዘርፋለህን? ²³በሕግ የምትመካ አንተ፣ ሕግን በመተላለፍ አባታችንን ታዋርዳለህን? ²⁴እንዲህ ተብሎ እንደ ተጻፈ፦ “በእናንተ ምክንያት የአባታችን ስም በአሕዛብ መካከል ይሰደባል።” ²⁵ሕግን ብትጠብቅ መገረዝ ይጠቅማል፤ ሕግን ብትተላለፍ ግን መገረዝህ አለመገረዝ ይሆናል። ²⁶እንግዲህ ያልተገረዘ ሰው የሕግን ትእዛዛት ቢጠብቅ፣ አለመገረዙ እንደ መገረዝ አይቈጠርለትምን? ²⁷በሥጋው ያልተገረዘ ሆኖ ሕግን የሚጠብቅ፣ ፊደልና መገረዝ ኖሮህ ሕግን በምትተላለፍ በአንተ ላይ ይፈርዳል። ²⁸አይሁዳዊ መሆን በውጭ ብቻ አይደለምና፤ መገረዝም በሥጋ ብቻ አይደለም። ²⁹ነገር ግን በውስጡ አይሁዳዊ የሆነ አይሁዳዊ ነው፤ መገረዝም በተጻፈው ሕግ ሳይሆን በመንፈስ የልብ ነው፤ የእንደዚህ ዓይነቱ ሰው ምስጋና ከሰዎች ሳይሆን ከአባታችን ነው።