Gũtirĩ Mũndũ Ũngĩũrĩra Ciira wa Ithe Witũ
Paulo nĩagarũrũkĩra mũthomi ũrĩa wakenaga nĩ mũtaratara wa kĩhinda kĩa mbere. Gũtuĩra arĩa angĩ ciira ũgĩĩka maũndũ o macio nĩgũgũtuĩra iguĩ, na maũndũ ma ũhoro wa ndini matiũmagia mũndũ o na ũmwe — Ithe witũ ndarĩ kĩene, nao Andũ-a-Ndũrĩrĩ matarĩ na watho no maũhingie na thamiri ciao.
2 1Nĩ ũndũ ũcio ndũrĩ na kĩĩgwatio, o wee ũrĩa ũrĩ wothe, rĩrĩa ũgũtuĩra ũngĩ ciira—amu ũkĩmũtuĩra ciira nĩwe mwene weĩtuĩraga ciira, tondũ wĩkaga o maũndũ macio. 2Na rĩĩrĩ, nĩtũũĩ atĩ ciira wa Ithe witũ ũkoragĩrĩra na kĩhooto arĩa mekaga maũndũ ta macio. 3Wee ũrĩa ũtuĩragĩra andũ angĩ ciira nĩ ũndũ wa maũndũ ta macio, na no wĩkaga o mo, nĩ ũgwĩciiria atĩ nĩũkeeteera ciira wa Ithe witũ? 4Kana nĩũmenete ũtonga wa ũtugi wake, na kwĩnyiihia, na gũkirĩrĩria, ũtekũmenya atĩ ũtugi wa Ithe witũ ũrĩ ho nĩguo ũgũtongorie ũkĩĩrira? 5No tondũ wa ngoro yaku nyũmũ, ĩtangĩĩrira, wee mwene nĩwĩigĩĩraga marakara, nĩ ũndũ wa mũthenya wa marakara, rĩrĩa ciira mũthingu wa Ithe witũ ũkaaguũranĩrio. 6Nĩakarĩha o mũndũ kũringana na ũrĩa eekĩte. 7Arĩa macaragia riiri, na gĩtĩĩo, na kwaga gũkua, na njĩra ya gwĩka wega matekũnoga, nĩakamahe muoyo wa tene na tene. 8No arĩa meyendagĩra o ene, makarega ũhoro wa ma, na makarũmĩrĩra waganu, nĩmakona marakara na mangʼũrĩ. 9Thĩĩna na ruo nĩ cia o mũndũ wothe ũrĩa wĩkaga ũũru—Mũyahudi mbere, gĩcooka Mũyunani, 10no riiri, na gĩtĩĩo, na thaayũ nĩ cia arĩa othe mekaga wega—Mũyahudi mbere, gĩcooka o na Mũyunani. 11Amu Ithe witũ ndarĩ mũthũũkano wa andũ. 12Arĩa mehĩtie matarĩ na watho nĩmagaathira o matarĩ na watho; nao arĩa mehĩtie marĩ rungu rwa watho nĩmagaatuĩrwo ciira na watho ũcio. 13Amu ti arĩa maiguaga watho arĩa athingu mbere ya Ithe witũ, no nĩ arĩa maũathĩkagĩra nĩo magaatuuo athingu. 14Na ma, rĩrĩa andũ-a-Ndũrĩrĩ, arĩa matarĩ na watho, mekaga na kĩĩyũmbe maũndũ marĩa watho wendaga, watho ũcio ũrĩ wĩra thĩinĩ wao, o na gũtuĩka matirĩ na watho. 15Nĩmonanagia wĩra wa watho wandĩkĩtwo ngoro-inĩ ciao, thamiri ciao igĩtuĩka mũira, na meciiria mao marĩa makararanagia makĩmathitangaga kana makĩmagitĩra. 16Ũndũ ũyũ ũgaakorwo mũthenya ũrĩa Ithe witũ agaatuĩra ciira maũndũ ma hitho ma andũ othe na njĩra ya Jesũ Kristũ—o ta ũrĩa Ũhoro-Mwega wakwa uugaga. a a v16 Ithe witũ nĩ we mũtuĩri wa ciira, no nĩatuĩragĩra ciira na njĩra ya Mũũriũ wake — Ithe nĩehokeire Jesũ ũtuanĩri wa ciira wothe.
Watho Ndũngĩkũhonokia
17No angĩkorwo wee wĩĩtaga Mũyahudi, na wĩhoka watho, na wĩraahaga nĩ ũndũ wa Ithe witũ, 18angĩkorwo nĩũĩ wendi wa Ithe witũ, na wĩtĩkagĩra maũndũ marĩa mega mũno tondũ nĩwarutĩirwo nĩ watho, 19angĩkorwo nĩwĩhokete atĩ wee ũrĩ mũtongoria wa atumumu, na ũtheri wa arĩa marĩ nduma-inĩ, 20mũrũũngaria wa arĩa akĩĩgu, mũrutani wa arĩa matakũrĩte, ũkenyiitĩrĩra thĩinĩ wa watho mũhianĩre wa ũmenyo na ũhoro wa ma. 21Wee ũrutaga andũ angĩ—kaĩ ũtangĩĩruta wee mwene? Wee ũhunjagia atĩ mũndũ ndakae kũiya—wee nĩũiyaga? 22Wee ũrĩa wĩraga andũ angĩ matigatharie—wee nĩũtharagia? Wee ũrĩa ũthũire mĩhianano—wee nĩũtahaga hekarũ? 23Wee ũrĩa wĩraahaga nĩ ũndũ wa watho, nĩũconoragia Ithe witũ na kũagarara watho? 24O ta ũrĩa kwandĩkĩtwo atĩrĩ: “Rĩĩtwa rĩa Ithe witũ nĩrĩrumagwo ndũũrĩrĩ-inĩ nĩ ũndũ wanyu.” 25Ũruu nĩũteithagia angĩkorwo nĩũrũmagia watho; no ũngĩagarara watho, ũruu waku ũtuĩkaga ta ũrĩa ũtaruĩte. 26Nĩ ũndũ ũcio angĩkorwo mũndũ ũrĩa ũtaruĩte nĩarũmagia maũndũ marĩa watho wendaga, githĩ kwaga kũrua gwake gũtigaatuuo ta ũruu? 27Nake ũrĩa ũtaruĩte mwĩrĩ, no akarũmia watho, nĩagagũtuĩra ciira wee ũrĩ na maandĩko na ũruu, no ũkaagarara watho. 28Amu mũndũ ti Mũyahudi nĩ ũndũ wa maũndũ ma nja moonekaga, o na ũruu ti wa mwĩrĩ tu. 29No mũndũ nĩ Mũyahudi na thĩinĩ wake, naguo ũruu nĩ wa ngoro, na njĩra ya Roho, no ti na watho wandĩke; nake mũndũ ũcio ũgooci wake ndoimaga kũrĩ andũ no uumaga kũrĩ Ithe witũ.