Nkhabe Munthu Anathawa Kutongwa kwa Baba Wathu
Paulo asabweresera mafala kuna nyakuwerenga akhakomerwa na ndandanda ya cigawo cakutoma. Kutonga anango mbucita pinthu pibodzi pyene kusakutonga iwe ekhene, na udindo wa cipembedzo nkhabe kutsudzula munthu tayu — Baba wathu nkhabe kusankhula anthu, na amitundu akhonda kukhala na mwambo anakwanisa kuusunga na cikumbumtima cawo.
2 1Na tenepo, iwe unatonga ndzako, iwe nkhabe cakutetezera, khala ndiwe ani. Mukutonga iye, usapasa mulandu iwe ekhene, thangwi usacita pinthu pibodzi pene. 2Tisadziwa kuti kutongwa kwa Baba wathu kusagwera mwakulungama anthu ale anacita pinthu pyenepi. 3Iwe, unatonga anango thangwi ya pinthu pyenepi mbwenye ukupicitambo iwe ekhene, usanyerezera kuti unadzathawa kutongwa kwa Baba wathu? 4Peno usapwaza upfumi wa kukoma ntima kwace, na kulindirira kwace, na kupirira kwace, mbukhonda kudziwa kuti kukoma ntima kwa Baba wathu kusafuna kukutsogolera ku kutcunyuka? 5Mbwenye thangwi ya ntima wako wakuuma, wakukhonda kutcunyuka, iwe usabvungazira iwe ekhene ukali, toera ntsiku ya ukali, pinadzapangizwa kutongwa kwakulungama kwa Baba wathu. 6Iye anadzalipa munthu m'bodzi na m'bodzi mwakubverana na pinthu pidacita iye. 7Kuna ale anasaka mbiri, na cilemedzo, na umaso wakukhonda kufa, mukupitiriza kucita pyadidi, iye anadzaapasa upulumuki wakukhonda kumala. 8Mbwenye ale anafuna pyawo basi, mbakhonda undimo mwene, mbatowera pyakuipa, anadzagumana ukali na kuipirwa kukulu. 9Nyatwa na kutsukwala kuna munthu onsene anacita pyakuipa—Muyuda pakutoma, buluka penepo Mugerego, 10mbwenye mbiri, na cilemedzo, na ntendere kuna onsene anacita pyadidi—Muyuda pakutoma, buluka penepo Mugerego pontho. 11Thangwi Baba wathu nkhabe kusankhula anthu. 12Anyakudawa akusowa mwambo anadzafudzikambo mwakusowa mwambo; anyakudawa ali pantsi pa mwambo anadzatongwa na mwambo. 13Thangwi si ale anabva mwambo ndi akulungama pamaso pa Baba wathu tayu, mbwenye ale anabvera mwambo ndiwo anadzalungamiswa. 14Mwandimomwene, anthu a madzinza, akuti nkhabe mwambo, angacita mwacibaliro pinafuna mwambo, iwo ene ndi mwambo kuna iwo, maseze nkhabe mwambo. 15Iwo asapangiza basa ya mwambo yakulembwa m'mitima mwawo, cikumbuntima cawo mbacipereka umboni, na manyerezero awo akuketesana mbaapasa mulandu peno kuakhotcerera. 16Pyenepi pinadzacitika ntsiku inadzatonga Baba wathu pinthu pyakubisika pya munthu onsene kubulukira mwa Yezu Kirixtu—ninga munalongera Mphangwa Zadidi zanga. a a v16 Baba wathu ndiye nyakutonga, mbwenye asatonga kubulukira mwa Mwana wace — Baba apereka kutonga konsene kuna Yezu.
Mwambo Nkhabe Kudzakupulumusani
17Mbwenye iwe ungacemera ekhene Muyuda, mbunyindira mwambo, mbugaya mwa Baba wathu, 18ungadziwa cifuno ca Baba wathu, mbusankhula pinthu pyadidi kakamwe thangwi usapfundziswa na mwambo, 19unganyindika kuti ndiwe nyakutsogolera anthu akhabe kuona, ceza kuna ale ali n'cidima, 20nyakusasanyira apswiru, mpfundzisi wa ana, wakukhala na maonekero a cidziwiso na undimo mwene mu mwambo. 21Iwe usapfundzisa anango—kodi nkhabe kupfundzisa iwe ekhene? Usamwaza mphangwa zakukhonda kuba—kodi iwe usaba? 22Iwe unapanga anango kuti akhonde kucita upombo—kodi iwe usacita upombo? Iwe unaida milungu yauthambi—kodi usaba pinthu m'nyumba zace? 23Iwe unagaya mu mwambo, kodi usacitira Baba wathu manyadzo mukuswa mwambo? 24Ninga mudalemberwa: “Dzina ya Baba wathu isanyozwa pakati pa madzinza thangwi ya imwe.” 25Kusidzwa kusaphedza ungabvera mwambo; mbwenye ungaswa mwambo, kusidzwa kwako kusakhala ninga kukhonda kusidzwa. 26Na tenepo, ule adakhonda kusidzwa angabvera pinthu pinafuna mwambo, kodi kukhonda kusidzwa kwace nkhabe kudzalengeswa ninga kusidzwa? 27Ule adakhonda kusidzwa m'manungo mbabvera mwambo, anadzakutonga iwe, iwe uli na malemba na kusidzwa, mbuswa mwambo. 28Thangwi kukhala Muyuda nkhabe kuoneka kunja kokha tayu, nee kusidzwa ndi kwa manungo kokha tayu. 29Mbwenye, munthu ndi Muyuda mukati mwace, na kusidzwa ndi kwa ntima, kubulukira mwa Nzimu, si na cinembo tayu; kusimbwa kwa munthu unoyu nkhabe kubuluka kwa anthu tayu, mbwenye kuna Baba wathu.
