Romnao 2

2 ¹Chiwui vang eina na khipānakha jilala, mi kateili bichar sā tharan na phayatkhui khavai apong maleimana. Kaja athumli bichar sā tharan na khalatta yonngasaka, khikhalajila na khalattala chikathā ot chi sai. ²Chikathā ot kasābingtungli ithumwui Avāwui bichar khamashung eina rāhaira kaji ara ithumna thei. ³Na khalattala chikathā ot sālaga mi kateili bichar sā mi, na ithumwui Avāwui bicharwui eina yāmshokra da na phaninglā? ⁴Lah, awui lukhamashan kala khāngmi kala khāngsānwui kashāng chi na ningkachailā, ithumwui Avāwui lukhamashana nali ning ngateikhui khavai thānmi kaji na matheimala? ⁵Kha na ning kamarar, ning mangatei kahaiwui vang, ithumwui Avāwui khamashung bichar phongmithang, malungkhavātwui thangwui vang, na khalattawui vang malungkhavāt phaishoksangda lei. ⁶Ana mi kachiva̱li kachichāna sākahai chiwui athishurda runmira. ⁷Atam kachida kaphā ot sālaga tekhamatei, khayākakā, kala makathi mirin phabing chili, ana katang makhavai kharing mira. ⁸Kha khalatta phākhavai phāda, khamashung horda, makaphā shurbing chili malungkhavāt kala malungvāt rāra. ⁹Makaphā kasā mi kachiva̱li, rimeikapta Jihudili chiwui thili Greeklila, kakhanang kala ningkachot rāra; ¹⁰kha kaphā kasā mi kachiva̱li, rimeikapta Jihudili chiwui thili Greeklila, tekhamatei, khayākakā kala chingri kahai rāra. ¹¹Kaja ithumwui Avā hiya mimai mayangmana. ¹²Ain makhalei morei kaphungbing chi ain makhaleiana shimānra; ain azingli khalei morei kaphungbing chi ain eina bichar sāmira. ¹³Kaja ain shākhamebing chi ithumwui Avāwui miktāli khamashung maningmana, kha ain nganābingli mashung ngasakra. ¹⁴Kachangkhat eina, ain makhalei Gentilebingna khangachā eina ainna kahāng chi sā tharan, athum ain makhaleiana, ain china athumwuitungli ot sāda leili. ¹⁵Athumna ainwui otsak athumwui wuklungli kapihai chi theingasaka, athumwui mashun-makhuina shākhi sāda, kala athumwui ngayātnā kaphaningna athumli apong phenmi lah phayatmira. ¹⁶Hi ithumwui Avāna Jishu Khristawui mangā eina mi kachiva̱wui khangathum chi bichar sāthang shokra. Iwui paokaphāna chithada hānga. ^a a v16 Ithumwui Avā chi bichar kasāna, chithālala ana Anaomayarawui mangā eina bichar sai—Avāna bichar saikora Jishuli horsangmihaira.

Ainna nathumli mahuimira

¹⁷Kha na khalattali Jihudi da hoda, ainli chihānda, kala ithumwui Avāwui vang lāngsoakha, ¹⁸nana ainna tamchithei kahaiwui vang ithumwui Avāwui kaphaning chi theida khamathā hakmeikap chi mayākha, ¹⁹nakhalatta mik khangapeobingwui thanme, tangkhamangli khaleibingwui kahor, ²⁰mangkhama̱bingwui chishutme, matheishingkhuibingwui tamchitheime, ainli theikakhui kala khamashungwui akor chi kasinga mina da shitsangchaoakha, ²¹Nana kateibingli tamchithei, kha nakhalatta matamchitheimalā? Nana "maleepaimana" da hāshok, kha nakhalatta leelā? ²²Kateibingli "maphophāpaimana" da kahānga na, nakhalatta phophālā? Meoma̱li ningkachaikasā na, khorumshimlungli nana ngapaipā? ²³Ainli lāngsokasā na, ain sākhaida ithumwui Avāli nana maishi ngasakpā? ²⁴Hithada kapihaida lei: "Nathumwui vang eina ithumwui Avāwui ming chi miyurbingwui alungli chipat kahaina." ²⁵Nana ain mayonakha ahui rimkashokna kānkhanā lei; kha nana ain sākhaida leiakha, nawui ahui rimkashok chi ahui marimkashok ngasāhaora. ²⁶Chiwui vang eina ahui marimkashoka mina ainwui kakaso mayonakha, athumwui ahui marimkashok chi ahui rimkashok thāda mashānmaralā? ²⁷Phasāli ahui marimkashoka mina ain mayonlaga, kapi kahai tui kala ahui rimkashok leilala ain sākhai kasā nathumli bichar sāra. ²⁸Kaja Jihudi sā chi ayarwui vangmāng maningmana, kala ahui rimkashok chi phasāwui vangmāng maningmana. ²⁹Kha, mi akha chi wuklungli Jihudi akachangana; ahui rimkashok chi wuklungwui, Manglā eina, kapi kahai ain eina maningmana; chikathā miwui masot chi mikumowui eina maningla ithumwui Avāwui eina kharāna.