Aoei ongkei Bou matjem ka asatenlabü
Paulei khangenbü lai ka doubü shabü shuong to olinan ditbü müt to leisepeikei. Lubü to matjemjinei jeteibü kümsikei, no himshuong to shedbü sungbuda, hoba lemnam kümsilei shuongei aoyou to shedbü ka apüet—seneibü Bou the achühda, hoba ngühkhüm küman akibü Küksithang shuongei kho maangpon danko natenla thükda.
2 1Khoei no aoyou ong kialepsikei, lubü to matjemjinei no shanga ap kubü aki; aieilausi haoen to matjemjinei no jembü to yuktida, aishanga no kei jeteibü jungeida. 2Tou ho tegü jungeibü shuong thüka Boueibü matjem tükdea louda dogo senei ngeda. 3No kei ho tegü jungeisije, lubü to ho shanga matjembou, no Boueibü matjem ka satenlabü dogo no damda lo? 4Ayingsi Boueibü onouei no maangpon sepeila shanga lamda dogo angeko, nyi haoeibü onou, natenbü hoba lounyu natenbü nyaksinam to mangsenda lo? 5Lausikei no maangpon kaangbü hoba maangpon asepeibü shanga, Boueibü saopobü matjem tang khitlabü khauang chalou shanga, no jembü lolo shanga khauang shaangda. 6Haoei mütpem weko to haoen kümbü thüng angaingoulabü. 7Aoyou natenko maibü yonglambo soneikangbü, nyensang nyenhang hoba ahaibü lamda, haoen la haoei thon akibü langkei kulabü. 8Lausikei jembü kusikhang lambü, ngühmai mangsenbü hoba amaibü sembü shuong thüka khauang hoba aolinbü loulabü. 9Amaibü kümbü müt weko thüka khonsak hoba thushed loulabü—Jihudabü ka khangan, hobaje Grikbü ka, 10lausikei maibü kümbü weko shanga soneikangbü, nyensang nyenhang hoba sangmai loulabü—Jihudabü ka khangan, hobaje Grikbü kei. 11Aishanga Bouei the achühda. 12Ngühkhüm akakko shabü shuongei Ngühkhüm akakko mautilabü; Ngühkhüm phanga kibü shabü shuong Ngühkhümei matjemlabü. 13Aishanga Ngühkhüm ditbü shuong Bou thedanga saopobü aying, lausikei kho jungeibü shuong mat maitilabü. 14Maimaitham, Ngühkhüm akakbü phangshuongei haangei Ngühkhümei mangsühbü kümlaje, haoen Ngühkhüm akisikei, haoen maangpona Ngühkhüm kümda. 15Haoenei Ngühkhüm yonglambü haoeneibü maangpona dokei dogo lenda, haoeneibü seneimaangei aukabü kuda, hoba haoeneibü dambü shuongei cheei che khulimbo aukada ayingsi püetda. 16Bouei Jisu Khrista danko müt weko huphangbü matjemlabü chalou ka ho loulabü—ngeibü Ngühlang Maibü laubü tegü. a a v16 Bou kho matjembou ki, khei yingsikei haoei hao Shou danko matjemda—Bouei matjembü pendou Jisu la kua.
Ngühkhümei no akhümenlabü
17Lausikei no jembü to Jihudabü dogo ngaalonga, Ngühkhüm to mailembo, hoba Bou shanga the lenenlonga, 18Ngühkhümei no lenbü, no Boueibü dambü ngeko hoba aei büngbü ki kho haü laulonga, 19no jembü to nyekthubü shuong shanga leibou, nakthüha kibü shuong shanga ngesakbü, 20ngoubü shuong tangtikubou, shisishousi lenbou, Ngühkhüma hapbüngebü hoba ngühmai shapbü hapbou ki dogo no ngühmaanglanlonga, 21No lubü shuong to lenda—no jembü to alenda lo? No “Tekok” dogo songlenbou—no kokla lo? 22No lubü to “Asangalanbü tejungei” dogo lenbou—no asangalanbü jungeida lo? No heangsho mangsenbü—no heangsho chem to soda lo? 23No Ngühkhüm shanga the lenenbü, no Ngühkhüm leiluko Bou to himou jungeida lo? 24Doan kibü tegü: “Kan shanga phangshuong yoa Boueibü nyen to nyikubü laula.” 25No Ngühkhüm jungeialonga kipan apbü maibü ki, lausikei no kho leilulonga, kaibü kipan apbü kho akipbü la yeilabü. 26Kheijinei akipbü Ngühkhümei mangsühbü jungeialonga, haoeibü akipbü kho kipan apbü tegü haplabü aying lo? 27Phea akipbü Ngühkhüm jungeialonga, no le hoba kipan apbü kiasikei Ngühkhüm leilubü to matjemlabü. 28Aishanga you phanga ong kibüei Jihudabü aying, ayingsi tang ka phanga ong kibüei kipan apbü aying. 29Lausikei maangpona kibou kho Jihudabü ki, hoba maangpon kipbü kho Soushouei kümbü ki, dobü le danko aying; ho müteibü soumo kho müt junga aying, lausikei Bou junga longda.
