Kun Bhi Amar Pitri Laga Bisar Pora Polabo Napare
Prothom adhyay laga list sai kene khushi thaka porha manuh ke Paul ulti kene koi. Dusra ke bisar kori kene nijor bhi etu kaam kora pora tumi nijor ke dushi kore, aru dhorom laga nam-dham pora kunbi bachi jabole napare — amar Pitri kunke bhi pokhyopat nakore, aru kanun napai thaka Gentile khan bhi mon laga bisar pora etu mani bole pare.
2 1Etu nimite, tumi jun bhi hoilebi, dusra ke bisar kora homoi te tumar logote eku bahana nai; kilemane dusra ke bisar kori kene tumi nijor ke doshi bonai ase, kelemane tumi bhi eke kaam khan kori ase. 2Etiya ami jane, eneka kaam kora khan uporte amar Pitri laga bisar thik pora pore. 3Tumi, jun pora eneka kaam khan nimite dusra ke bisar kore aru nijor bhi eneka kore, tumi amar Pitri laga bisar pora polabo paribo koi kene bhabe naki? 4Nahole, amar Pitri laga doya tumi ke mon-ghurabole loijai etu najani kene, Tar laga bisi doya, dhorjo aru shoino laga dhun ke tumi tuchcha kore naki? 5Kintu tumar tan aru mon-noghura mon karone, jun din te amar Pitri laga dharmik bisar prokahit hobo, hei khong laga din nimite tumi nijor karone khong joma kori ase. 6Tai pora sob manuh ke tarkhan kora kaam hisab te badla dibo. 7Jun khan lagatar bhal kaam kori kene mohima, sanman aru namora jivon bisare, Tai pora tarkhan ke ananta jivon dibo. 8Kintu jun khan nijor ke he bisare, hosa ke namane, aru paap kaam laga piche jai, tarkhan uporte khong aru gusha ahhibo. 9Biya kaam kora sob manuh nimite dukh aru kosto—age te Yehudi, titia Yunani, 10kintu bhal kaam kora sob manuh nimite mohima, sanman aru shanti—age te Yehudi, titia Yunani bhi. 11Kilemane amar Pitri kun ke bhi alag-alag nasai. 12Niyom nathaka paapi khan niyom chara he khotom hobo; aru niyom nichete thaka paapi khan niyom pora bisar hobo. 13Kilemane niyom huna khan amar Pitri usor te dharmik nahoi, kintu niyom mana khan dharmik bonai dibo. 14Hosa bhi, jun Porjati khan logote niyom nai, tarkhan nijor sobhab pora niyom ki mange etu kore, titia tarkhan logote niyom nathakile bhi, niyom tarkhan bhitorte kaam kori ase. 15Tarkhan laga monte likha niyom laga kaam tarkhan dikhai ase, tarkhan laga bibek gawahi di ase, aru tarkhan laga lorai-jhagara kora bhabona khan kitia doshi lagai aru kitia bachai. 16Jun din te amar Pitri pora Jisu Khrista dwara sob manuh laga lukai thaka kotha khan bisar koribo, hei din te eneka hobo—eneka moi laga susamachar koi ase. a a v16 Amar Pitri he bisar-korta ase, hoilebi Tai Tar laga Putro dwara bisar kore—Pitri pora sob bisar Jisu ke di dise.
Niyom Pora Tumi Ke Bachabo Na Paribo
17Kintu jodi tumi nijor ke Yehudi koi, niyom uporte bhorsa kore, aru amar Pitri te phutani kore, 18jodi tumi amar Pitri laga itcha jane aru niyom pora sikhai luwa karone ki sob pora bhal ase etu bachi loi, 19jodi tumi nijor ke andha khan laga rasta-dikhai, andhera te thaka khan laga ujala, 20murkho khan ke thik-kora, gyaan nathaka khan laga guru, aru niyom bhitorte gyaan aru hosa laga rup dhori thaka ase koi kene mon te thik bhabe— 21Tumi dusra ke sikhai—kintu nijor ke nasikhai naki? Tumi churi nakoribi koi kene prachar kore—kintu nijor churi kore naki? 22Tumi jun dusra ke bebichar nakoribi koi—kintu nijor bebichar kore naki? Tumi jun murti ke ghin kore—kintu mondir khan ke churi kore naki? 23Tumi jun niyom te phutani kore, niyom bhangai kene amar Pitri ke beijjati kore naki? 24Jineka likha ase: “Tumikhan laga karone Porjati khan majote amar Pitri laga nam ninda kore.” 25Jodi tumi niyom mane, tenehale sunnot pora modot kore; kintu niyom bhangaile, tumar sunnot tu sunnot nakora nisena hoi jai. 26Etu nimite jodi sunnot nakora manuh niyom laga hukum khan mane, tenehale tarkhan laga sunnot nakora tu sunnot nisena ginti nakoribo naki? 27Gaw te sunnot nakora hoilebi niyom mana manuh pora, akhor aru sunnot thaki kene niyom bhanga tumi ke bisar koribo. 28Kilemane bahar te thaka pora he Yehudi nahoi, aru gaw te kora pora he sunnot nahoi. 29Kintu bhitorte thaka pora he Yehudi ase, aru mon laga sunnot, Atma pora, likha niyom pora nahoi; eneka manuh laga prosansa manuh pora nahoi, kintu amar Pitri pora ase.