Warumi 2

2 ¹Kwa hiyo hauna udhuru, wewe uwaye yote, unapomhukumu mwingine—kwa kumhukumu yeye unajihukumu mwenyewe, kwa kuwa nawe unafanya mambo yayo hayo. ²Basi twajua ya kuwa hukumu ya Baba yetu huwapata kwa haki wale wafanyao mambo kama hayo. ³Je, wadhani, wewe umhukumuye mwingine kwa mambo kama hayo hali nawe unayafanya, kwamba utaiepuka hukumu ya Baba yetu? ⁴Au je, wayadharau wingi wa wema wake na uvumilivu wake na ustahimili wake, bila kutambua ya kuwa wema wa Baba yetu wakuvuta uje kwenye toba? ⁵Lakini kwa moyo wako mgumu usiotaka kutubu, wajilundikia ghadhabu nafsi yako, kwa siku ile ya ghadhabu ambapo hukumu ya haki ya Baba yetu itafunuliwa. ⁶Yeye atamlipa kila mtu sawasawa na matendo yake. ⁷Kwa wale ambao kwa saburi katika kutenda mema hutafuta utukufu, na heshima, na kutokufa, atawapa uzima wa milele. ⁸Bali wale wajitafutao wenyewe, na kuikataa kweli, na kuifuata uovu, watapata ghadhabu na hasira. ⁹Dhiki na shida kwa kila mtu atendaye maovu—Myahudi kwanza, kisha Myunani, ¹⁰bali utukufu, na heshima, na amani kwa kila mtu atendaye mema—Myahudi kwanza, kisha Myunani pia. ¹¹Kwa maana Baba yetu hana upendeleo. ¹²Wenye dhambi wasio na sheria nao huangamia pasipo sheria; wenye dhambi walio chini ya sheria watahukumiwa kwa sheria. ¹³Kwa maana si wale waisikiao sheria walio wenye haki mbele za Baba yetu, bali wale waitiio ndio watakaohesabiwa haki. ¹⁴Naam, hapo Mataifa wasio na sheria wafanyapo kwa asili yaliyo ya sheria, hao wasio na sheria wanakuwa sheria kwa nafsi zao, hata wasipokuwa na sheria. ¹⁵Waonyesha kazi ya sheria imeandikwa mioyoni mwao, dhamiri yao ikishuhudia, na mawazo yao yakigombana kwa kushtakiana au kutetiana. ¹⁶Jambo hili hutokea siku ile ambapo Baba yetu atazihukumu siri za watu wote kwa njia ya Yesu Kristo—kama isemavyo injili yangu. ^a a v16 Baba yetu ndiye mwamuzi, lakini ahukumu kwa njia ya Mwanawe—Baba amemkabidhi Yesu hukumu yote.

Sheria Haitakuokoa

¹⁷Lakini ikiwa wewe wajiita Myahudi, na kuitegemea sheria, na kujisifu katika Baba yetu, ¹⁸kama wayajua mapenzi ya Baba yetu na kuyakubali yaliyo bora kwa sababu umefundishwa na sheria, ¹⁹kama umejisadikisha ya kuwa wewe ni kiongozi wa vipofu, na nuru yao w*aliomo* gizani, ²⁰mrekebishaji wa wapumbavu, mwalimu wa watoto wachanga, ukishika katika sheria mfano wa maarifa na wa kweli. ²¹Wewe uwafundishaye wengine—je, hujifundishi mwenyewe? Wewe uhubiriye kwamba mtu asiibe—je, wewe waiba? ²²Wewe uwaambiaye wengine wasizini—je, wewe wazini? Wewe uzichukiaye sanamu—je, wewe wayateka mahekalu? ²³Wewe ujisifuye katika sheria, je, wamvunjia Baba yetu heshima kwa kuivunja sheria? ²⁴Kama ilivyoandikwa: "Jina la Baba yetu latukanwa katika Mataifa kwa sababu yenu." ²⁵Kutahiriwa kwafaa kama unaishika sheria; lakini ukiivunja, kutahiriwa kwako kwakuwa kutokutahiriwa. ²⁶Basi ikiwa asiyetahiriwa anayashika matakwa ya sheria, je, kutokutahiriwa kwake hakutahesabiwa kuwa ni kutahiriwa? ²⁷Naye asiyetahiriwa kwa asili aishikaye sheria atakuhukumu wewe, uivunjaye sheria hali una herufi na kutahiriwa. ²⁸Kwa maana Myahudi si yeye aliye Myahudi kwa nje tu, wala kutahiriwa si kule kwa nje mwilini tu. ²⁹Bali Myahudi ni yeye aliye Myahudi kwa ndani, na kutahiriwa ni kule kwa moyoni, katika Roho, si katika andiko; ambaye sifa yake haitoki kwa wanadamu bali kwa Baba yetu.