Warumi 3

3 ¹Basi, Myahudi ana faida gani? Au kutahiriwa kuna thamani gani? ²Kuna faida kubwa kwa kila namna. Kwanza kabisa, walikabidhiwa maneno yenyewe ya Baba yetu. ³Basi, ni nini? Ikiwa baadhi hawakuwa waaminifu, je, kutokuamini kwao kutabatilisha uaminifu wa Baba yetu? ⁴La hasha! Baba yetu na aonekane kuwa wa kweli, ingawa kila mtu ni mwongo. Kama ilivyoandikwa: "Wewe uthibitishwe kuwa mwenye haki katika maneno yako, na ushinde utakapohukumiwa."

⁵Lakini kama uovu wetu unadhihirisha haki ya Baba yetu, tuseme nini? Je, Baba yetu si mwenye haki anapoleta ghadhabu juu yetu? (Nanena kwa jinsi ya kibinadamu.). ⁶Hasha! Kwa maana kama ingekuwa hivyo, Baba yetu angeuhukumuje ulimwengu? ⁷Lakini kama uongo wangu unaifanya kweli ya Baba yetu kuzidi kwa utukufu wake, kwa nini bado ninahukumiwa kama mwenye dhambi? ⁸Kwa nini tusiseme, kama wengine wanavyotusingizia kuwa twasema, "Na tutende maovu ili mema yapate kuja"? Hukumu yao ni ya haki.

Hakuna Mwenye Haki

⁹Basi, ni nini? Je, sisi tu bora zaidi? La, hata kidogo—kwa maana tayari tumewashtaki Wayahudi na Wayunani kwamba wote wako chini ya nguvu ya dhambi, ¹⁰kama ilivyoandikwa: "Hakuna mwenye haki, hata mmoja; ¹¹hakuna afahamuye; hakuna amtafutaye Baba yetu. ¹²Wote wamepotoka; kwa pamoja wamekuwa wasiofaa; hakuna atendaye mema, hata mmoja. ¹³Koo lao ni kaburi wazi; kwa ndimi zao wanadanganya." "Sumu ya nyoka i chini ya midomo yao. ¹⁴Vinywa vyao vimejaa laana na uchungu. ¹⁵Miguu yao ina wepesi kumwaga damu; ¹⁶uharibifu na taabu zi katika njia zao, ¹⁷wala njia ya amani hawakuijua. ¹⁸Hakuna hofu ya Baba yetu mbele ya macho yao."

¹⁹Nasi twajua ya kuwa yote isemayo sheria huwaambia wale walio chini ya sheria, ili kila kinywa kifumbwe, na ulimwengu wote uwe chini ya hukumu ya Baba yetu. ²⁰Hakuna mtu atakayehesabiwa haki mbele zake kwa matendo ya sheria; kwa maana sheria huleta utambuzi wa dhambi.

Kufanywa Wenye Haki kwa Imani katika Yesu

²¹Lakini sasa, pasipo sheria, haki ya Baba yetu imedhihirishwa, ikishuhudiwa na Torati na Manabii. ²²Haki hii ya Baba yetu huja kwa njia ya imani katika Yesu Kristo, kwa wote waaminio, kwa maana hakuna tofauti, ²³kwa sababu wote wamefanya dhambi na kupungukiwa na utukufu wa Baba yetu, ²⁴nao wanahesabiwa haki bure kwa neema yake kwa njia ya ukombozi ulio katika Kristo Yesu. ²⁵Baba yetu alimtoa yeye awe dhabihu ya upatanisho, kwa njia ya imani katika damu yake, ili aidhihirishe haki yake, kwa sababu katika uvumilivu wake aliziachilia dhambi zilizotangulia kutendwa, ²⁶ili kuidhihirisha haki yake sasa, hata yeye awe mwenye haki naye ni mwenye kumhesabia haki kila amwaminiye Yesu.

²⁷Basi, kujisifu kuko wapi? Kumefungiwa nje. Kwa sheria gani? Ya matendo? La—bali kwa sheria ya imani. ²⁸Kwa maana twaona ya kuwa mtu huhesabiwa haki kwa imani pasipo matendo ya sheria. ²⁹Au je, Baba yetu ni Baba wa Wayahudi peke yao? Si Baba wa watu wa Mataifa pia? Naam, wa watu wa Mataifa pia, ³⁰kwa sababu Baba yetu ni mmoja, naye atawahesabia haki waliotahiriwa kwa imani, na wasiotahiriwa kwa njia ya imani.

³¹Je, twaibatilisha sheria kwa imani hiyo? Hasha—bali twaithibitisha sheria.