ሮሜ 3

3 ¹እንግዲህ አይሁዳዊ ምን ይጠቅመዋል? ወይስ መገረዝ ምን ይረባል? ²በሁሉም መንገድ ብዙ ነው። ከሁሉ አስቀድሞ የአባታችን ቃል ራሱ በአደራ ተሰጥቷቸዋል። ³ታዲያ ምን ይሆናል? አንዳንዶቹ ታማኝ ባይሆኑስ፣ ታማኝ አለመሆናቸው የአባታችንን ታማኝነት ያስቀራልን? ⁴ከቶ አይሁን! ሰው ሁሉ ውሸታም ቢሆንም፣ አባታችን እውነተኛ ይሁን። እንዲህ ተብሎ ተጽፎአልና፦ “በቃልህ ጻድቅ ሆነህ ትገኛለህ፣ በምትፈረድበትም ጊዜ ታሸንፋለህ።”

⁵ነገር ግን ዐመፃችን የአባታችንን ጽድቅ የሚያጎላ ከሆነ፣ ምን እንላለን? ቍጣን በእኛ ላይ የሚያመጣው አባታችን ዐመፀኛ ነውን? (በሰው አነጋገር እናገራለሁ።) ⁶ከቶ አይደለም! እንዲህ ቢሆንማ አባታችን በዓለም ላይ እንዴት ይፈርዳል? ⁷ነገር ግን ውሸቴ የአባታችንን እውነት ለክብሩ የሚያበዛ ከሆነ፣ ለምን እስከ አሁን እንደ ኀጢአተኛ እፈረድብኛለሁ? ⁸አንዳንዶች እንደምንል አድርገው እንደሚሳደቡብን፣ “በጎ ነገር እንዲመጣ ክፉ እናድርግ” ለምን አንልም? የእነርሱ ፍርድ የተገባ ነው።

ጻድቅ ማንም የለም

⁹ታዲያ ምን ይሆናል? እኛ እንበልጣለንን? ከቶ አይደለም፤ አይሁድም ሆኑ ግሪኮች ሁሉም በኀጢአት ቍጥጥር ሥር እንዳሉ አስቀድመን ከሰናልና፤ ¹⁰እንዲህ ተብሎ ተጽፎአልና፦ “ጻድቅ የለም፣ አንድ ስንኳ የለም፤ ¹¹አስተዋይ የለም፤ አባታችንን የሚፈልግ የለም። ¹²ሁሉም ተሳስተዋል፤ በአንድነት ከንቱ ሆነዋል፤ መልካም የሚያደርግ የለም፤ አንድ ስንኳ የለም። ¹³ጕሮሮአቸው የተከፈተ መቃብር ነው፤ በምላሳቸው ያታልላሉ።” “የእባቦች መርዝ ከከናፍራቸው በታች ነው። ¹⁴አፋቸው በእርግማንና በመረረት ተሞልቷል። ¹⁵እግሮቻቸው ደም ለማፍሰስ ፈጣኖች ናቸው፤ ¹⁶ጥፋትና ጭንቅ በመንገዶቻቸው ይገኛሉ፤ ¹⁷የሰላምንም መንገድ አላወቁም። ¹⁸በዐይኖቻቸው ፊት የአባታችን ፍርሃት የለም።”

¹⁹ሕግ የሚለውን ሁሉ ከሕግ በታች ላሉት እንደሚናገር እናውቃለን፤ ይህም አፍ ሁሉ ዝም እንዲል፣ ዓለምም ሁሉ በአባታችን ፊት ተጠያቂ እንዲሆን ነው። ²⁰በሕግ ሥራ በፊቱ ጻድቅ የሚሆን ማንም የለም፤ ሕግ የኀጢአትን ዕውቀት ያመጣልና።

በኢየሱስ በማመን ጻድቅ መሆን

²¹አሁን ግን ከሕግ ውጭ የአባታችን ጽድቅ ተገልጧል፤ በሕግና በነቢያትም ተመስክሮለታል። ²²ይህም የአባታችን ጽድቅ በኢየሱስ ክርስቶስ በማመን ለሚያምኑ ሁሉ ይሆናል፤ ልዩነት የለምና፤ ²³ሁሉ ኀጢአትን ሠርተዋልና፣ የአባታችንም ክብር ጎድሎአቸዋል፤ ²⁴በክርስቶስ ኢየሱስ ባለው ቤዛነት በኩል በጸጋው እንዲያው ይጸድቃሉ። ²⁵አባታችን በደሙ በማመን በኩል የማስተስረያ መሥዋዕት አድርጎ አቀረበው፤ ይህም በትዕግሥቱ አስቀድሞ የተሠሩትን ኀጢአቶች ስለ ተወ ጽድቁን ለማሳየት ነው፤ ²⁶ይህም አሁን ጽድቁን ለማሳየት ነው፤ እርሱ ራሱ ጻድቅ እንዲሆን፣ በኢየሱስም የሚያምነውን የሚያጸድቅ እንዲሆን ነው።

²⁷እንግዲህ ትምክህት ወዴት አለ? ተከልክሏል። በየትኛው ሕግ ነው? በሥራ ሕግ ነውን? አይደለም፤ በእምነት ሕግ ነው እንጂ። ²⁸ሰው ከሕግ ሥራ ተለይቶ በእምነት እንዲጸድቅ እናረጋግጣለንና። ²⁹ወይስ አባታችን የአይሁድ ብቻ አባት ነውን? የአሕዛብስ ደግሞ አባት አይደለምን? አዎን፣ የአሕዛብም ደግሞ ነው፤ ³⁰አባታችን አንድ ስለ ሆነ፣ የተገረዙትን በእምነት፣ ያልተገረዙትንም በእምነት ያጸድቃልና።

³¹እንግዲህ በዚህ እምነት ሕግን እንሽራለንን? ከቶ አይደለም፤ ሕግን እናጸናለን እንጂ።