Mararu Kwandanyo agoi
Ngot ko po tengekto piik tugul, tos koek siiretap Israel kiy ne mami boisyet? Achicha — ago mami chii ne kityachi, ak kotuiyo Paulo ng'aleek che kisir si komwa nooto. Pwoonei walutyet eng' ng'olyoondet ne po tiptem ak agenge: ng'alalda ak Ng'atuutyet, iityin Kwandanyo imanda ko po konunet eng' Kristo, si koma mi komosta ne kotononi kaegeet.
3 1Nee anyun ne siirei ne tinyei Yahudyot? Anan nee alyetap kamuratanet? 2Chaang' eng' ortinwek tugul. Ne tai, ki kigoochi icheek ng'aleegap Kwandanyo ineegei. 3Nee anyun? Ngot ki ma iywei alak, tos iyai kateweernatennywa koek puch lititindap Kwandanyo? 4Achicha! Ingo imanat Kwandanyo, agot ngo kiplembechwa chii age tugul. Ko uu ye kisire: “Ityin imanda ye ing'alaali, ak iboor ye kirwookyin.”
5Ago ngot koboorun yaitwogikyok imandap Kwandanyo, nee ne kemwae? Tos ma po imanda Kwandanyo ye iunech nereegek? (Ang'alaali ko uu chii.) 6Achicha! Amu ngo ki uu nooto, ko imuuchi ano Kwandanyo korwookyin ng'wony? 7Ago ngot kotesak imanitap Kwandanyo eng' lembeennyu kot koek toroornatennyi, ko amu nee si kitesak kirwookyin anee ko uu kiptengekyot? 8Ak amu nee si matkimwa, ko uu ye mwaetaenech alak kole, “Keyaei ne ya si konyo ne myee”? Nyolu kirwoogetap icheek.
Ma Mi Chii Age Tugul Ne Po Imanda
9Nee anyun? Tos kisiirei acheek? Achicha—amu kagicharu kole Yahudik ak Yunanik, kergeitu, ko mi tugul eng' eutap tengekto, 10ko uu ye kisire: “Ma mi chii age tugul ne po imanda, agot ko agenge; 11ma mi ne nai; ma mi ne cheeng'ei Kwandanyo. 12Kagoweek tugul; kaaegu togeng che ma po boisyet; ma mi ne yaei ne myee, agot ko agenge. 13Kaboorto ne yaat kurgeetnywa; boisyeen tongoanikwak si koberberisye.” “Mi ng'wonetap maswetisyek eng' kwenutap kutinnywa. 14Nyiitaat kutinnywa chubisyo ak ng'wanindo. 15Chepcheben keelyekwak kotumda korotiik; 16mi ng'emisyet ak nyalilda eng' ortinwekwak, 17ak ma kagonai ooreetap kaalyeet. 18Ma mi kayweetap Kwandanyo eng' taitap konyekwak.”
19Kingen ile tuguuk tugul che mwaei ng'atuutyet, ko po icheek che mi eng' ng'atuutyet, si kosilem kutit age tugul, ak konam ng'wony komugul chalwokto eng' taitap Kwandanyo. 20Ma kiityi imanda chii age tugul eng' taitap ineendet eng' poisyonigap ng'atuutyet; amu koonu ng'atuutyet naetap tengekto.
Keityini Imanda Eng' Iyanet Ne Po Jeso
21Ago nguno, ki kiboorun imandap Kwandanyo, ne ma namegei ak ng'atuutyet, ne kibaoryanji Ng'atuutyet ak Maotik. 22Imanda ni ne po Kwandanyo konyo eng' iyanet ne po Jeso Kristo, eng' age tugul ne iyani; amu ma mi kiwateet, 23amu ki koyaei tengekto tugul, ak ma koityin toroornatetap Kwandanyo, 24ak kiityi imanda eng' aiyebindo eng' myeeindonyi, eng' katyaget ne mi eng' Kristo Jeso. 25Ki koito Kwandanyo ineendet koek tiseiywot ne atonon, eng' iyanet ne po korotiikyik, si koboorun imandanyi, amu eng' muitaennyi, ki kogaakta tengek che ki kiyaei kobooch, 26si koboorun imandanyi nguno, si koek ineendet ne po imanda, ak ne iityin imanda age tugul ne iyani Jeso.
27Ole mi anyun mogornateet? Kagiistoen. Eng' ng'atuutyet ne ainon? Ne po poisyonik? Achicha—eng' ng'atuutyetap iyanet. 28Amu kibwaate acheek kole kiityi chii imanda eng' iyanet, ne ma namegei ak poisyonigap ng'atuutyet. 29Anan tos Kwandanyo ko Kwandap Yahudik kityo? Tos ma Kwandap Pororyosyek agine? Ee, ne po Pororyosyek agine, 30amu agenge Kwandanyo, ne tuun iityin imanda kamuratanet eng' iyanet, ak che ma kimuratan eng' iyanet.
31Tos keisto ng'atuutyet eng' iyaneni? Achicha—ago kigimit acheek ng'atuutyet.