KwabaseRoma 3

3 ¹Pho, yibuphi ubuhle umJuda analabo? Noma luyini usizo lokusoka? ²Lukhulu ngazo zonke izindlela. Okokuqala, baphathiswa amazwi kaBaba wethu uqobo lwawo. ³Pho, kuthiwani? Uma abanye bengathembekanga, kungabe ukungathembeki kwabo kuyakuyichitha yini ukuthembeka kukaBaba wethu? ⁴Akunjalo! UBaba wethu makabe ngoqinisileyo, nakuba wonke umuntu engumqambimanga. Njengokuba kulotshiwe ukuthi: “Ufakazeleka ulungile emazwini akho, uyanqoba lapho wahlulelwa.”

⁵Kodwa uma ukona kwethu kukhanyisa ukulunga kukaBaba wethu, sithini na? Kungabe uBaba wethu akalungile ngokusehlisela intukuthelo na? (Ngikhuluma ngokomuntu.). ⁶Lutho neze! Ngokuba uma kunjalo uBaba wethu angaluwahlulela kanjani izwe na? ⁷Kodwa uma amanga ami enza iqiniso likaBaba wethu lichichime kube yinkazimulo yakhe, kungani ngisewahlulelwa njengesoni na? ⁸Kungani singasho sithi, njengokuba abanye besihleba bethi sisho kanjalo, “Masenze okubi ukuze kuvele okuhle”? Ukwahlulelwa kwabo kubafanele.

Akekho Olungileyo

⁹Pho, kuthiwani? Singcono yini? Lutho neze—sesibabekile icala abaJuda namaGreki ngokufanayo ukuthi bonke bangaphansi kombuso wesono, ¹⁰njengokuba kulotshiwe ukuthi: “Akekho olungileyo, ngisho noyedwa; ¹¹akekho oqondisisayo; akekho ofuna uBaba wethu. ¹²Bonke baphambukile; ndawonye sebeyize; akekho owenza okuhle, ngisho noyedwa. ¹³Umphimbo wabo ulithuna elivulekileyo; basebenzisa izilimi zabo ukukhohlisa.” “Ubuthi bezinyoka bungaphansi kwezindebe zabo. ¹⁴Umlomo wabo ugcwele iziqalekiso nokubaba. ¹⁵Izinyawo zabo ziyaphuthuma ukuchitha igazi; ¹⁶incithakalo nosizi kuphawula izindlela zabo, ¹⁷nendlela yokuthula abayazanga. ¹⁸Akukho kwesaba uBaba wethu phambi kwamehlo abo.”

¹⁹Siyazi ukuthi konke umthetho okushoyo kuqondene nalabo abangaphansi kwawo, ukuze yonke imilomo ithuliswe futhi izwe lonke lime libekwa icala kuBaba wethu. ²⁰Akekho olungisiswayo phambi kwakhe ngemisebenzi yomthetho; umthetho uletha ukuqwashisa ngesono.

Ukulungisiswa Ngokholo KuJesu

²¹Kodwa manje, ngaphandle komthetho, ukulunga kukaBaba wethu kwembuliwe, kufakazelwa nguMthetho nabaProfethi. ²²Lokhu kulunga kukaBaba wethu kuza ngokholo kuJesu Khristu, kubo bonke abakholwayo, ngokuba akukho mehluko, ²³njengoba bonke bonile, basilalela inkazimulo kaBaba wethu, ²⁴balungisiswa ngesihle ngomusa wakhe ngokuhlengwa okukuKhristu uJesu. ²⁵UBaba wethu wamnikela njengomhlatshelo wokubuyisana, ngokholo egazini lakhe, ukuze abonakalise ukulunga kwakhe, ngokuba ngokubekezela kwakhe wayewadlulisile izono ezazenziwe ngaphambili, ²⁶ukuze abonakalise ukulunga kwakhe manje, ukuze yena abe ngolungileyo nolungisisayo lowo okholwa nguJesu.

²⁷Pho, buphi ukuzibonga? Kususiwe. Ngamuphi umthetho? Owemisebenzi? Qha—ngomthetho wokholo. ²⁸Ngokuba siyagcizelela ukuthi umuntu ulungisiswa ngokholo ngaphandle kwemisebenzi yomthetho. ²⁹Noma kungabe uBaba wethu unguBaba wabaJuda bodwa na? Akasuye uBaba wabeZizwe nabo na? Yebo, nowabeZizwe futhi, ³⁰njengoba uBaba wethu emunye, uyakubalungisisa abasokileyo ngokholo nabangasokile ngokholo.

³¹Kungabe siyawuchitha umthetho ngalolu kholo na? Neze—siyawuqinisa umthetho.