Romu 3

3 ¹Kí ni àǹfààní tí Júù ní wá nígbà náà? Tàbí kí ni ìwúlò ìkọlà? ²Ó pọ̀ ní gbogbo ọ̀nà. Lákọ̀ọ́kọ́ ọ̀rọ̀ gbogbo, a fi ọ̀rọ̀ Baba wa gan-an lé wọn lọ́wọ́. ³Kí ló wá kù? Bí àwọn kan kò bá ṣe olóòótọ́, ǹjẹ́ àìṣòótọ́ wọn yóò ha mú òtítọ́ Baba wa di asán bí? ⁴Rárá! Jẹ́ kí Baba wa jẹ́ olóòótọ́, bí ó tilẹ̀ jẹ́ pé òpùrọ́ ni gbogbo ènìyàn. Gẹ́gẹ́ bí a ti kọ ọ́ pé: “A fihàn ọ́ ní olóòótọ́ nínú ọ̀rọ̀ rẹ, ìwọ sì ṣẹ́gun nígbà tí a bá dá ọ lẹ́jọ́.”

⁵Ṣùgbọ́n bí àìṣòdodo wa bá mú òdodo Baba wa hàn kedere, kí ni àwa yóò wí? Ǹjẹ́ Baba wa ṣe aláìṣòdodo láti mú ìbínú wá sórí wa bí? (Bí ènìyàn ni mo ń sọ̀rọ̀.). ⁶Rárá o! Nítorí báwo ni Baba wa yóò ṣe lè dá ayé lẹ́jọ́? ⁷Ṣùgbọ́n bí irọ́ mi bá mú kí òtítọ́ Baba wa pọ̀ yanturu sí ògo rẹ̀, èéṣe tí a fi ń dá mi lẹ́jọ́ síbẹ̀ gẹ́gẹ́ bí ẹlẹ́ṣẹ̀? ⁸Èéṣe tí a kò fi wí—gẹ́gẹ́ bí àwọn kan ti ń fi ẹ̀sùn kàn wá pé àwa ń wí—pé, “Ẹ jẹ́ kí a ṣe búburú kí rere lè dé”? Ìdájọ́ wọn tọ́ sí wọn.

Kò Sí Ẹni Tí Ó Jẹ́ Olódodo

⁹Kí ló wá kù? Ǹjẹ́ àwa sàn ju wọn lọ bí? Rárá rárá—nítorí àwa ti fi ẹ̀sùn kàn wọ́n tẹ́lẹ̀ pé àwọn Júù àti àwọn Griki, gbogbo wọn wà lábẹ́ agbára ẹ̀ṣẹ̀, ¹⁰gẹ́gẹ́ bí a ti kọ ọ́ pé: “Kò sí ẹni tí ó jẹ́ olódodo, kò tiẹ̀ sí ẹnìkan; ¹¹kò sí ẹni tí ó ní òye; kò sí ẹni tí ń wá Baba wa. ¹²Gbogbo wọn ti yà kúrò; papọ̀ ni wọ́n ti di aláìníláárí; kò sí ẹni tí ń ṣe rere, kò tiẹ̀ sí ẹnìkan. ¹³Ọ̀fun wọn jẹ́ isà òkú tí ó ṣí sílẹ̀; wọ́n ń fi ahọ́n wọn tannijẹ.” “Oró ejò ń bẹ lábẹ́ ètè wọn. ¹⁴Ẹnu wọn kún fún ègún àti ìkorò. ¹⁵Ẹsẹ̀ wọn yára láti ta ẹ̀jẹ̀ sílẹ̀; ¹⁶ìparun àti ìpọ́njú ni ó samisi ọ̀nà wọn, ¹⁷ọ̀nà àlàáfíà ni wọn kò sì mọ̀. ¹⁸Kò sí ìbẹ̀rù Baba wa níwájú ojú wọn.”

¹⁹Àwa mọ̀ pé ohunkóhun tí òfin bá wí, ó wí fún àwọn tí ń bẹ lábẹ́ rẹ̀, kí a lè pa gbogbo ẹnu mọ́, kí gbogbo ayé sì jẹ́ ẹni tí ó ní láti jíhìn fún Baba wa. ²⁰Kò sí ẹnìkan tí a ó dá láre níwájú rẹ̀ nípa iṣẹ́ òfin; òfin ń mú ìmọ̀ ẹ̀ṣẹ̀ wá.

A Dá Ni Láre Nípasẹ̀ Ìgbàgbọ́ Nínú Jesu

²¹Ṣùgbọ́n nísinsìnyí, lọ́tọ̀ kúrò lọ́dọ̀ òfin, a ti fi òdodo Baba wa hàn, èyí tí Òfin àti àwọn Wòlíì jẹ́rìí sí. ²²Òdodo Baba wa yìí wá nípasẹ̀ ìgbàgbọ́ nínú Jesu Kristi, fún gbogbo àwọn tí ó gbàgbọ́, nítorí kò sí ìyàtọ̀, ²³nítorí gbogbo ènìyàn ti ṣẹ̀, wọ́n sì ti kùnà fún ògo Baba wa, ²⁴a sì dá wọn láre lọ́fẹ̀ẹ́ nípa oore-ọ̀fẹ́ rẹ̀ nípasẹ̀ ìràpadà tí ó wà nínú Kristi Jesu. ²⁵Baba wa fi í hàn gẹ́gẹ́ bí ẹbọ ètùtù, nípasẹ̀ ìgbàgbọ́ nínú ẹ̀jẹ̀ rẹ̀, láti fi òdodo rẹ̀ hàn, nítorí nínú sùúrù rẹ̀ ó ti fojú fo àwọn ẹ̀ṣẹ̀ tí a ti dá ṣáájú, ²⁶láti fi òdodo rẹ̀ hàn nísinsìnyí, kí ó lè jẹ́ olódodo àti ẹni tí ń dá ẹnikẹ́ni tí ó bá gbẹ́kẹ̀lé Jesu láre.

²⁷Níbo wá ni ìfọ́nnu wà? A ti yọ ọ́ kúrò. Nípa òfin wo? Ti iṣẹ́ bí? Rárá—nípa òfin ìgbàgbọ́. ²⁸Nítorí àwa fìdí rẹ̀ múlẹ̀ pé a dá ènìyàn láre nípa ìgbàgbọ́, lọ́tọ̀ kúrò nínú iṣẹ́ òfin. ²⁹Tàbí Baba wa ha jẹ́ Baba àwọn Júù nìkan bí? Kì í ha ṣe Baba àwọn Kèfèrí pẹ̀lú? Bẹ́ẹ̀ ni, ti àwọn Kèfèrí pẹ̀lú, ³⁰nítorí Baba wa jẹ́ ọ̀kan, òun yóò dá àwọn onílà láre nípa ìgbàgbọ́, àti àwọn aláìkọlà nípasẹ̀ ìgbàgbọ́.

³¹Ǹjẹ́ àwa ha ń mú òfin di asán nípasẹ̀ ìgbàgbọ́ yìí bí? Rárá o—àwa fìdí òfin múlẹ̀.