Romnao 3

3 ¹Chithākha, Jihudinao khi phākhamei leikhala? Lah ahui rimkashokwui kānkhanā khikhala? ²Apong saikorali kachungkha lei. Rimeikapta ithumwui Avāwui tui chotchāng chi athumli misang kahaina. ³Chithākha khikhala? Kaikhana mashitsangakha, athumwui mashitkasang ithumwui Avāwui ning katong chi masākhairarla? ⁴Maningphutmana! Mi kachiva̱ kakapik sāhailala, ithumwui Avā khamashung ngasāranu. Hithada kapihaida lei, "Nawui tuibing eina na mashun mira, kala bichar sātharan na khayui ngasāra."

⁵Kha ithumwui makhamashungna ithumwui Avāwui khamashung khangarong chi chitheingasakakha, ithumna khi hāngra? Ithumtungli malungkhavāt khuirāwui vang ithumwui Avā makhangaronga ngasāhaola? (Mi khanina ina kahāngna.) ⁶Maningphutmana! Chithasi kaje, kathada ithumwui Avāna okathui hi bichar sāshapra? ⁷Kha iwui kakapikna ithumwui Avāwui khamashung chi awui tekhamateiwui vang chungmeida samphangngasakakha, khisāda ina aruila morei kaphunga thada bichar sākahaikhala? ⁸Kaikhana ithumli mashāta thada, "Makaphā sāsa, chithākha kaphā rāra" da khisāda mahāngmala? Athumwui bichar chi khamashungana.

Khangaronga Mi Khipākha Maleimana

⁹Chithākha khikhala? Ithum phāmeila? Maningmana! Jihudibingla Greekbinglila ngarumda saikora moreiwui azingli lei da ithumna rida hāngkahaina, ¹⁰hithada kapihaida lei, "Khangaronga mi khipākha maleimana, akhanidala maleimana; ¹¹khipākha matheishingmana; khipākha ithumwui Avāli maphaimana. ¹²Athum saikora ma̱thuihaira; ngarumda aremana ngasāhaira; kaphā kasā akhala maleimana, akhanidala maleimana. ¹³Athumwui kharok phutkahai chikhurna; athumna male eina kapikta." "Phara̱wui hu chi athumwui morchaizingli lei. ¹⁴Athumwui khamor khonkashi kala kakhā ara̱ eina pema. ¹⁵Athumwui pheina ashee shok khavai thāklaka; ¹⁶kashimān kala sipkasā athumwui shongfali mānga, ¹⁷kala chingri kahaiwui shongfa chi athumna matheimana. ¹⁸Athumwui miktāli ithumwui Avāli khangachee maleimana."

¹⁹Ainna hāngkahai saikora chi ain azingli leibingli zatra kaji ithumna thei. Chieina khamor kachiva̱ khāmhaipaira kala okathui katonga ithumwui Avāli athut sākahaipaira. ²⁰Awui mangāli khipālikha ainwui otsakna mamashungmimana; kha ain china moreiwui theikhami khuirai.

Jishuli Shitkasang Mangā eina Mashungmi

²¹Kha ara ain maleila, ain kala marānbingna shākhi khami ithumwui Avāwui khamashung khangarong chi theingasakhaira. ²²Ithumwui Avāwui khamashung khangarong hi Jishu Khristali shitkasang mangā eina, shitkasanga saikorali kharāna; kaja ngateikhami maleimana, ²³kaja mi saikorana morei sāhaira kala ithumwui Avāwui tekhamatei chi mataida lei, ²⁴kala Khrista Jishuli khalei ningkhān mangā eina awui lukhamashanna thada mashungmihaira. ²⁵Awui asheeli shitkasang mangā eina, awui khamashung khangarong chitheikhavai, ithumwui Avāna ali morei pheomi khavai pha̱kaphayā sāda pha̱mi; kaja awui ningzinghāringda rida sākahai morei chi ngaruithuihairasai, ²⁶ana hi ara awui khamashung khangarong chitheikhavai sai. Chieina a khalatta khamashungla ngasāra, kala Jishuli shitkasanga mi kachiva̱li mashung ngasakra.

²⁷Chithākha lāngso chi khilei lei? Khuishokhaira. Khikha ainnala? Otsakwui vangla? Maningmana, shitkasangwui ainna. ²⁸Kaja mi akha chi ainwui otsak maleila shitkasang mangā eina mashungmi da ithumna hānga. ²⁹Lah ithumwui Avā hi Jihudibingmāngwui Avāla? Gentilebingwui Avāla maningsermala? Mha, Gentilebingwui vangla, ³⁰kaja ithumwui Avā hi akhana, ana ahui rimkashokbingli shitkasang eina kala ahui marimkashokbingli shitkasang mangā eina mashung ngasakra.

³¹Shitkasang hiwui mangā eina ithumna ain chi khamasai ngasakla? Maningphutmana! Ithumna ain chi ungshung ngasakhaira.