Romnao 4

4 ¹Chithākha, phasā athishurda ithumwui shāvā Abrahamna khi samphanga da ithumna hāngrakhala? ²Kaja Abrahamna otsak eina mashung ngasakhaira jisi kaja, ana langsokapai kachikathā akha leira, kha ithumwui Avā mangāli maningmana. ³Kaja Kathara lairikna khi hāngkhala? Abrahamna ithumwui Avāli shitsanga, kala chi ali khamashung khangaronga da shānkhui. ^a a v3 "Shānkhui" chiya lupā mashing shānkhuiwui tui akhana, kha ithumwui Avā chi ning katak lupā mashing shānkhui mi maningmana. Abrahamna ali ningtongda shitsangmāng sai, kala ithumwui Avāna khikha makhalei awui pāng chi yanglaga ali khamashung khangaronga da shānkhui. ⁴Ot kasa mili china, ngalangman chi lemmet thāda mashānkhuimana, kha miphalungki kaji thāda shānkhui. ⁵Kha ot masāla, makhayāli mashung khami ali shitkasanga mili china, awui shitkasang chi khamashung khangaronga da shānkhui. ⁶Davidna otsak eina maningla ithumwui Avāna khamashung khangaronga da shānkhui mi chiwui sokhamiwui pongli hithada hānga: ⁷"Khayonkhamāng pheomi kahaibing chi sokhamina, kala morei farormi kahaibing chila sokhamina; ⁸ithumwui Avāna awui morei khipākha makaphenmara mi chi sokhamina."

⁹Sokhami hi ahui rimkashokbingwui vangmānga, lah ahui marimkashokbinglila kajikhala? Abrahamwui shitkasang chi khamashung khangaronga da shānkhui da ithumna hānga. ¹⁰Chithākha kathada shānkhuikhala? Ahui rimshok kahaiwui thili, lah ahui marimshok naoli? Ahui rimshok kahaiwui thili maningla, kha ahui marimshok naolina. ¹¹Ana ahui rimshok chi machut akha sāda samphanga, chiya ahui marimshok naolakha eina shitkasang mangā eina khami khamashung khangarongwui sealina; chieina athumlila khamashung khangaronga da shānkhui khavai ahui marimshok naolala shitkasanga saikorawui avā a sāngasakra, ¹²kala ahui rimshokmāng maningla ithumwui shāvā Abrahamwui ahui marimshok naolakha eina khalei shitkasang thāda shitkasanga ahui rimkashok mibingwui avā a sāngasak khavaina.

¹³Kaja Abraham kala awui ara̱-azāli, ana okathui chi samphangra kaji ngashitmi kahai lemmet chi ain mangā eina maningla, shitkasangwui khamashung khangarong mangā einana. ¹⁴Kaja ain athishurda ringda khalei mibing chi shimluikatna jisi kaja, shitkasang chi arema sāhaora, kala ngashitmi kahai lemmet chi shimitmihaira. ¹⁵Ainna malungkhavāt rāngasaka; kha ain maleisā apamli, ain sākhaida maleimana.

¹⁶Chieina hi shitkasang einana, lukhamashan mangā eina sāda, ara̱-azā saikorali ngashitmi kahai lemmet chi ninglum ngasak khavaina. Hi ain eina khalapshān kahaibingwui vangmānga maningla, kha Abrahamwui shitkasang khangarum mibinglila khamina. Ana ithum saikorawui avāna,

¹⁷hithada kapihaida lei, "Ina nali miyur kachungkhawui avā sāngasakhaira". Abrahamna shitkasanga, kathebingli kharing khami kala khikha maleikahaibingli lei khavai hokakhui ithumwui Avā mangāli Abraham chi avāva̱na. ¹⁸Kachihān maleilala, ana kachihānli shitsanga, miyur kachungkhawui avā sāhaoda, ali hithada hāngkahai thāda: "Nawui ara̱-azā chithāda shokngasakra."

¹⁹Awui zingkum shākha shakha kāhairasai. Kha shitkasangli makhangazanda ana awui khalattawui phasā ara thikahai thāda, kala Sarahwui naopam manglā makhangavāna da yangkachunga. ²⁰Shitkasang maleila ithumwui Avāwui ngashit kahaili maningmaongmana, kha ithumwui Avāli sochikatta shitkasangli pangsanga, ²¹ithumwui Avāna ngashit kahai chi a sāshapla lei da kachangkhat theikhuihaira. ²²Chiwui vang eina "ali khamashung khangaronga da shānkhui." ²³Kha "ali shānkhui" jikahai tui chi awui vang amang kapihai maningmana, ²⁴kala ithumwui Proho Jishuli kathiwui eina ringshok ngasaka ali shitsanga, chi shānkhuira ithumwui vangla kapihaida lei. ²⁵A china ithumwui morei vang eina chihovā kahaina, kala ithumli ithumwui Avāli mashungmi khavai ringshok ngasakhaira.