Romnao 5

5 ¹Chieina, ithum shitkasang eina khamashunga sākahaiwui vang, ithumwui Proho Jishu Khristawui mangā eina ithumwui Avā eina chingri kahai leihaira. ²Awui mangā eina ithum shitkasang eina ara ithum nganinga hi lukhamashanli zangkapaihaira, kala ithumwui Avāwui tekhamateiwui kachihānli mathāna. ³Chi maningla, ithum ithumwui kakhanangli chila lāngsora, khikhalajila kakhanangna khāngkathei ngasaka, ⁴kala khāngkathei china khamayā ngasaka, kala khamayāna kachihān ngasaka. ⁵Kachihānna ithumli mai mashi ngasakmana, khikhalajila ithumli mikahai Manglā Kathara mangā eina ithumwui Avāwui leikashi ithumwui wuklungli heirormihaira.

⁶Ithum aruila yāng makakā leilakha, atam ungkashung eina Khristana makhayābingwui vang thihaira. ⁷Khamashunga miwui vang thikhavai mi kateokhana; chithālala kaphā miwui vang chiya kachikathāna thikhavai malung pingpaishina. ⁸Kha ithumwui Avāna ithumli awui khalatta leikashi hithada chitheihaira: ithum aruila morei kaphungbing leilakha, Khristana ithumwui vang thihaira. ^a a v8 Ithumwui Avāna krushli awui leikashi chitheihaira — ithum aruila awui eina ayarda leilakha ithumwui vang awui Anaomayarali mihaiwui mangā eina.

⁹Chithākha ara awui ashee eina khamashunga sākahai ithum awui mangā eina malungkhavātwui eina kayākha mataida huikhuira. ¹⁰Ithum yangkashe leilakha, awui Anaomayarawui kathi mangā eina ithumwui Avā eina ngashim khangasakhaiakha, ara ngashim khangasaka ithum, kayākha mataida awui kharingna ithumli huimira? ¹¹Chi maningla, ithum ithumwui Proho Jishu Khristawui mangā eina ithumwui Avāli chila mathāna. Awui mangā eina ithum ara khangashim chi samphanghaira.

Adamwui Mangā eina Kathi, Khristawui Mangā eina Kharing

¹²Chieina, mi akhawui mangā eina morei okathuili azangda, kala moreiwui mangā eina kathi azangkahai thada, mi saikorana morei sāhaiwui vang, kathi mi saikorali ngayaovāhaira. ¹³Ain marārangsai eina, morei okathuili aruila leisai; kha ain makhalei pamli morei mashānmana. ¹⁴Chithālala, Adamwui eina thuida Moseswui atam eina tangda, Adamwui khayonkhamāngwui thāda morei masā athumwuitungli tangdala, kathina munga. Adam chiya kharākhavai akhawui sakrinna.

¹⁵Kha lemmet chiya moreiwui thāda maningmana: mi akhawui moreiwui mangā eina kachungkha thihaiakha, kayākha mataida ithumwui Avāwui lukhamashan kala mi akha Jishu Khristawui lukhamashan mangā eina lemmet chi kachungkhawuitungli mavātlakla heirormihaira. ¹⁶Kala lemmet chiya morei sākahai mi akhawui atheiwui thāda maningmana: morei akha eina bicharna khonshāt thāhaowa, kha morei kachungkha eina lemmet chiya khamashung khangarong thāhaowa. ¹⁷Khikhalajila chonkhamakān akhawui vang mi akhawui mangā eina kathina munghaiakha, kayākha mataida lukhamashanwui khanaowa kala khamashung khangarongwui lemmet samphanga athum mi akha Jishu Khristawui mangā eina kharingli mungra.

¹⁸Chieina, morei akhana mi saikorali yonngasak thada, khamashung khangarong otsak akhana mi saikorali mashungkhui kala kharing mira. ¹⁹Mi akhawui kahāng makhanganā eina mi kachungkha morei kaphungbing sāngasak thada, mi akhawui kahāng khanganā eina mi kachungkhali khamashungli shānsangra. ²⁰Ara, morei mataisang khavai ain china rāzanga, kha morei mataisang pamli, lukhamashan china mataimeida heirormi, ²¹chieina morei china kathiwui lungli munga thada, lukhamashan china khamashung khangarong mangā eina katang makhavai kharingli thanvāda, ithumwui Proho Jishu Khristawui mangā eina mungra.