ብኣቦና ዝመፅእ ሰላምን ተስፋን

ፃድቃን ምዃን ምስ ኣቦና ሰላም የምፅእ፥ ጳውሎስ ከዓ ነቲ መከራ ኸም ተፃራሪ ዘይኮነ ኸም መረጋገፂ ይወስዶ፦ ትዕግስቲ፥ ፅንዓት፥ ተስፋ የፍሪ። ገና ፀላእቲ እንተለና ክርስቶስ ምእንታና ሞተ። ሽዑ ኣዳምን ክርስቶስን ጎኒ ንጎኒ ይቕመጡ — ሓደ ግብሪ ዘጥፍእ፥ ሓደ ግብሪ ኸዓ ዘፍስስ።

ምዕራፍ 5።

እምበኣር፥ ብእምነት ፃድቃን ካብ ኮንና፥ ብጐይታና ኢየሱስ ክርስቶስ ገይርና ምስ ኣቦና ሰላም ኣለና። ብእኡ ድማ ናብዛ ደው ዝበልናላ ፀጋ፥ ብእምነት መእተዊ ረኺብና ኢና፤ ብተስፋ ክብሪ ኣቦናውን ንሕጐስ። ከምኡ ጥራሕ ዘይኮነ ግና፥ መከራ ትዕግስቲ ኸም ዝፈርዮ ንፈልጥ ኢና እሞ፥ ብመከራናውን ንሕበን ኢና። ትዕግስቲ ድማ ፅንዓት ይፈሪ፤ ፅንዓትውን ተስፋ ይፈሪ። እዝ ተስፋ እዙይ ኣየሕፍረናን እዩ፤ ፍቕሪ ኣቦና በቲ ንኣና ዝተውሃበ መንፈስ ቅዱስ ኣብ ልብና ፈሲሱ እዩ እሞ።

ገና ድኹማት እንተለና ኸሎ፥ ክርስቶስ በቲ ግቡእ ጊዜ ምእንቲ ሓጥኣን ሞተ። ምእንቲ ፃድቕ ሰብ ዝመውት ሳሕቲ እዩ ዝርከብ፤ ምእንቲ ሰናይ ሰብ ግና ኽመውት ዝደፍር ምናልባሽ ይህሉ ይኸውን። ኣቦና ግና ፍቕሩ ንኣና ኸምዙይ ይገልፅ፦ ገና ሓጥኣን እንተለና ኸሎ፥ ክርስቶስ ምእንታና ሞተ። ^a

እምበኣር ሕዚ ብደሙ ፃድቃን ካብ ኮንና፥ ብእኡ ጌርና ኻብ ቍጥዓ ኽንድሕን ክንደይ ኣዝዩ ይበልፅ። ፀላእቲ ኸለና፥ ብሞት ወዱ ምስ ኣቦና ተዓሪቕና እንተ ዄንና፥ ሕዚ ተዓሪቕና ኸለና ኸ፥ ብህይወቱ ኽንድሕን ክንደይ ኣዝዩ ይበልፅ። ከምኡ ጥራሕ ዘይኮነ ግና፥ በቲ ሕዚ ዕርቂ ዝተቐበልናሉ ጐይታና ኢየሱስ ክርስቶስ ገይርና፥ ብኣቦናውን ንሕጐስ ኢና።

ብኣዳም ዝመፅአ ሞት፥ ብክርስቶስ ዝመፅአ ህይወት

ስለዙይ ከምቲ ብሓደ ሰብ ሓጢኣት ናብ ዓለም ዝኣተወ፥ ብሓጢኣት ድማ ሞት ዝኣተወ፥ ኵሉ ሰብ ሓጢኣት ስለ ዝገበረ፥ ሞት ናብ ኵሉ ሰብ በፅሐ። ቅድሚ ሕጊ ሓጢኣት ኣብ ዓለም ነበረ፤ ሕጊ ኣብ ዘይብሉ ግና ሓጢኣት ኣይቚፀርን እዩ። ይኹን እምበር፥ ሞት ካብ ኣዳም ክሳዕ ሙሴ ነገሰ፥ ኣብቶም ከም በደል ኣዳም ሓጢኣት ዘይገበሩ እኳ፤ ኣዳም ድማ ነቲ ዝመፅእ ዘሎ ዝመስል እዩ።

እታ ውህብቶ ግና ከም እቲ በደል ኣይኮነትን፤ ብበደል ሓደ ሰብ ብዙሓት እንተ ሞቱ፥ ፀጋ ኣቦናን እታ ብፀጋ እቲ ሓደ ሰብ ኢየሱስ ክርስቶስ ዝመፀት ውህብቶን ናብ ብዙሓት ክንደይ ኣዝዩ ይበዝሑ። እታ ውህብቶ ድማ ከምቲ ብሓደ ዝበደለ ሰብ ዝመፀ ኣይኮነትን፤ እቲ ፍርዲ ኻብ ሓደ በደል ናብ ኵነኔ የብፅሕ፥ እታ ውህብቶ ግና ካብ ብዙሕ በደል ናብ ፅድቂ የብፅሕ። ብበደል እቲ ሓደ ሰብ፥ ብሰንኪ ሓደ በደል ሞት እንተ ነገሰ፥ እቶም ምልኣት ፀጋን ውህብቶ ፅድቅን ዝቕበሉ፥ በቲ ሓደ ሰብ ኢየሱስ ክርስቶስ ገይሮም ኣብ ህይወት ክንደይ ኣዝዮም ይነግሱ።

እምበኣር ከምቲ ብሓደ በደል ኣብ ኵሉ ሰብ ኵነኔ ዝመፀ፥ ከምኡ ድማ ብሓደ ፅድቂ ኣብ ኵሉ ሰብ ፅድቂ ህይወትን ይመፅእ። ከምቲ ብዘይምእዛዝ እቲ ሓደ ሰብ ብዙሓት ሓጥኣን ዝኾኑ፥ ከምኡ ድማ ብምእዛዝ እቲ ሓደ ሰብ ብዙሓት ፃድቃን ክኾኑ እዮም። እቲ በደል ምእንቲ ኽበዝሕ ድማ ሕጊ ኣተወ፤ ሓጢኣት ኣብ ዝበዝሐሉ ግና፥ ፀጋ ኣዝዩ ብዙሕ በዝሐ፤ ከምቲ ሓጢኣት ብሞት ዝነገሰ፥ ከምኡ ድማ ፀጋ ብፅድቂ ገይሩ ናብ ናይ ዘለኣለም ህይወት፥ ብጐይታና ኢየሱስ ክርስቶስ ገይሩ ምእንቲ ኽነግስ እዩ።