Romu 5

5 ¹Nítorí náà, níwọ̀n bí a ti dá wa láre nípa ìgbàgbọ́, àwa ní àlàáfíà pẹ̀lú Baba wa nípasẹ̀ Olúwa wa Jesu Kristi. ²Ẹni tí a ti ipasẹ̀ rẹ̀ rí ọ̀nà àbáwọlé nípa ìgbàgbọ́ sínú oore-ọ̀fẹ́ yìí tí a dúró nínú rẹ̀, àwa sì ń yọ̀ nínú ìrètí ògo Baba wa. ³Kì í ṣe èyí nìkan, ṣùgbọ́n àwa tún ń ṣògo nínú ìjìyà wa, nítorí ìjìyà ń mú sùúrù wá, ⁴sùúrù sì ń mú ìwà rere wá, ìwà rere sì ń mú ìrètí wá. ⁵Ìrètí kì í dójú tì wá, nítorí a ti da ìfẹ́ Baba wa sínú ọkàn wa nípasẹ̀ Ẹ̀mí Mímọ́ tí a fi fún wa.

⁶Nígbà tí àwa ṣì jẹ́ aláìlágbára, ní àkókò tí ó yẹ, Kristi kú fún àwọn ènìyàn búburú. ⁷Ó ṣọ̀wọ́n kí ẹnikẹ́ni kú fún olódodo, bí ó tilẹ̀ jẹ́ pé fún ènìyàn rere ẹnìkan lè tilẹ̀ gbójúgbóyà láti kú. ⁸Ṣùgbọ́n Baba wa fi ìfẹ́ tirẹ̀ hàn sí wa pé: nígbà tí àwa ṣì jẹ́ ẹlẹ́ṣẹ̀, Kristi kú fún wa. ^a a v8 Baba wa fi ìfẹ́ rẹ̀ hàn ní orí àgbélébùú — nípa fífi Ọmọ rẹ̀ fún wa nígbà tí àwa ṣì wà ní ọ̀nà jíjìn sí i.

⁹Mélòó mélòó sì ni, báyìí tí a ti dá wa láre nípa ẹ̀jẹ̀ rẹ̀, a ó gbà wá là nípasẹ̀ rẹ̀ kúrò lọ́wọ́ ìbínú náà. ¹⁰Bí, nígbà tí a jẹ́ ọ̀tá, a bá ti bá Baba wa làjà nípasẹ̀ ikú Ọmọ rẹ̀, mélòó mélòó sí ni, báyìí tí a ti làjà, ìyè rẹ̀ yóò gbà wá là? ¹¹Kì í ṣe èyí nìkan—àwa tún ń yọ̀ nínú Baba wa nípasẹ̀ Olúwa wa Jesu Kristi, ẹni tí a ti ipasẹ̀ rẹ̀ gba ìlàjà báyìí.

Ikú Nípasẹ̀ Adamu, Ìyè Nípasẹ̀ Kristi

¹²Nítorí náà, gẹ́gẹ́ bí ẹ̀ṣẹ̀ ti wọ ayé nípasẹ̀ ènìyàn kan, àti ikú nípasẹ̀ ẹ̀ṣẹ̀, bẹ́ẹ̀ ni ikú tàn dé ọ̀dọ̀ gbogbo ènìyàn, nítorí gbogbo ènìyàn ni ó dẹ́ṣẹ̀. ¹³Ṣáájú òfin, ẹ̀ṣẹ̀ ti wà ní ayé; ṣùgbọ́n a kì í ka ẹ̀ṣẹ̀ sí níbi tí kò sí òfin. ¹⁴Síbẹ̀, ikú jọba láti ìgbà Adamu títí dé Mose, àní lórí àwọn tí ẹ̀ṣẹ̀ wọn kò bá ìrékọjá Adamu mu—Adamu jẹ́ àwòrán ẹni tí ń bọ̀.

¹⁵Ṣùgbọ́n ẹ̀bùn náà kò dàbí ẹ̀ṣẹ̀ náà: bí ọ̀pọ̀lọpọ̀ bá kú nípasẹ̀ ẹ̀ṣẹ̀ ènìyàn kan, mélòó mélòó sí ni oore-ọ̀fẹ́ Baba wa àti ẹ̀bùn náà nípa oore-ọ̀fẹ́ ènìyàn kan, Jesu Kristi, ti pọ̀ yanturú fún ọ̀pọ̀lọpọ̀. ¹⁶Ẹ̀bùn náà kò sì dàbí àbájáde ẹ̀ṣẹ̀ ènìyàn kan náà: ìdájọ́ tí ó ti ẹ̀ṣẹ̀ kan wá mú ẹ̀bi wá, ṣùgbọ́n ẹ̀bùn tí ó ti ọ̀pọ̀lọpọ̀ ẹ̀ṣẹ̀ wá mú ìdáláre wá. ¹⁷Nítorí bí ikú bá jọba nípasẹ̀ ènìyàn kan náà nítorí ìrékọjá kan, mélòó mélòó sí ni àwọn tí ń gba ọ̀pọ̀ oore-ọ̀fẹ́ àti ẹ̀bùn òdodo yóò jọba nínú ìyè nípasẹ̀ ènìyàn kan, Jesu Kristi.

¹⁸Nítorí náà, gẹ́gẹ́ bí ìrékọjá kan ti dá gbogbo ènìyàn lẹ́bi, bẹ́ẹ̀ ni iṣẹ́ òdodo kan mú ìdáláre àti ìyè wá fún gbogbo ènìyàn. ¹⁹Gẹ́gẹ́ bí àìgbọràn ènìyàn kan ti sọ ọ̀pọ̀lọpọ̀ di ẹlẹ́ṣẹ̀, bẹ́ẹ̀ ni ìgbọràn ènìyàn kan yóò sọ ọ̀pọ̀lọpọ̀ di olódodo. ²⁰Òfin sì wọlé kí ìrékọjá lè pọ̀ sí i, ṣùgbọ́n níbi tí ẹ̀ṣẹ̀ ti pọ̀ sí i, oore-ọ̀fẹ́ pọ̀ yanturú jù bẹ́ẹ̀ lọ, ²¹kí ó baà jẹ́ pé gẹ́gẹ́ bí ẹ̀ṣẹ̀ ti jọba nínú ikú, bẹ́ẹ̀ ni kí oore-ọ̀fẹ́ lè jọba nípa òdodo sí ìyè àìnípẹ̀kun, nípasẹ̀ Jesu Kristi Olúwa wa.