Romu 6

6 ¹Kí ni a óò wí nígbà náà? Ṣé kí a máa bá a nìṣó ní dídẹ́ṣẹ̀ kí oore-ọ̀fẹ́ lè pọ̀ sí i? ²Rárá o! Báwo ni àwa tí a ti kú sí ẹ̀ṣẹ̀ ṣe lè máa gbé inú rẹ̀ síbẹ̀? ³Tàbí ẹ kò mọ̀ pé gbogbo àwa tí a ṣe ìrìbọmi sínú Kristi Jesu, a ṣe ìrìbọmi sínú ikú rẹ̀? ⁴Nítorí náà, a sin wá pẹ̀lú rẹ̀ nípa ìrìbọmi sínú ikú, pé gẹ́gẹ́ bí a ti jí Kristi dìde kúrò nínú òkú nípa ògo Baba wa, àwa pẹ̀lú lè máa rìn nínú ìyè tuntun.

⁵Nítorí bí a bá ti darapọ̀ mọ́ àfarawé ikú rẹ̀, dájúdájú àwa yóò tún darapọ̀ mọ́ àjíǹde rẹ̀ pẹ̀lú. ⁶A mọ̀ pé a kàn ògbólógbòó ẹ̀dá wa mọ́ àgbélébùú pẹ̀lú rẹ̀, láti pa ara ẹ̀ṣẹ̀ run, kí àwa má baà jẹ́ ẹrú fún ẹ̀ṣẹ̀ mọ́. ⁷Nítorí ẹnikẹ́ni tí ó bá ti kú ni a ti dá sílẹ̀ kúrò nínú ẹ̀ṣẹ̀. ⁸Ǹjẹ́ bí a bá kú pẹ̀lú Kristi, a gbàgbọ́ pé àwa yóò tún bá a wà láàyè pẹ̀lú. ⁹Nítorí a mọ̀ pé Kristi, tí a ti jí dìde kúrò nínú òkú, kì yóò kú mọ́ láéláé; ikú kò ní ìjọba lórí rẹ̀ mọ́. ¹⁰Nítorí ikú tí ó kú, ó kú sí ẹ̀ṣẹ̀ lẹ́ẹ̀kan ṣoṣo; ṣùgbọ́n ìyè tí ó ń gbé, ó ń gbé e sí Baba wa. ¹¹Bákan náà, ẹ ka ara yín sí òkú sí ẹ̀ṣẹ̀ ṣùgbọ́n alààyè sí Baba wa nínú Kristi Jesu.

¹²Nítorí náà, ẹ má ṣe jẹ́ kí ẹ̀ṣẹ̀ jọba nínú ara yín tí ń kú, kí ẹ má baà máa gbọràn sí ìfẹ́kúfẹ̀ẹ́ rẹ̀. ¹³Ẹ má ṣe fi àwọn ẹ̀yà ara yín fún ẹ̀ṣẹ̀ bí ohun ìjà fún àìṣòdodo; dípò bẹ́ẹ̀, ẹ fi ara yín fún Baba wa bí àwọn tí a ti mú kúrò nínú ikú wá sí ìyè, àti àwọn ẹ̀yà ara yín fún un bí ohun ìjà fún òdodo. ¹⁴Nítorí ẹ̀ṣẹ̀ kì yóò ní ìjọba lórí yín, nítorí ẹ kò sí lábẹ́ òfin bí kò ṣe lábẹ́ oore-ọ̀fẹ́.

¹⁵Kí ni nígbà náà? Ṣé kí a máa dẹ́ṣẹ̀ nítorí àwa kò sí lábẹ́ òfin bí kò ṣe lábẹ́ oore-ọ̀fẹ́? Rárá o! ¹⁶Ẹ kò ha mọ̀ pé bí ẹ bá fi ara yín fún ẹnìkan bí ẹrú láti máa gbọràn, ẹ di ẹrú ẹni tí ẹ bá ń gbọràn sí—yálà ẹ̀ṣẹ̀, tí ń ṣamọ̀nà sí ikú, tàbí ìgbọràn, tí ń ṣamọ̀nà sí òdodo? ¹⁷Ọpẹ́ ni fún Baba wa: ẹ jẹ́ ẹrú ẹ̀ṣẹ̀ tẹ́lẹ̀, ṣùgbọ́n ẹ gbọràn láti inú ọkàn sí àpẹẹrẹ ẹ̀kọ́ tí a fi lé yín lọ́wọ́. ¹⁸Lẹ́yìn tí a ti dá yín sílẹ̀ kúrò nínú ẹ̀ṣẹ̀, ẹ di ẹrú òdodo.

¹⁹Mo ń sọ̀rọ̀ bí ènìyàn, nítorí àìlera ara yín. Gẹ́gẹ́ bí ẹ ti fi àwọn ẹ̀yà ara yín fúnni bí ẹrú sí àìmọ́ àti àìlófin, tí ó mú àìlófin púpọ̀ sí i wá, báyìí ẹ fi wọ́n fúnni bí ẹrú sí òdodo, tí ó mú ìwà mímọ́ wá. ²⁰Nítorí nígbà tí ẹ jẹ́ ẹrú ẹ̀ṣẹ̀, ẹ ti bọ́ sílẹ̀ kúrò lọ́wọ́ òdodo. ²¹Èrè kí ni ẹ jẹ nígbà náà nínú àwọn ohun tí ojú ń tì yín nísinsìnyí? Nítorí òpin àwọn nǹkan wọ̀nyẹn ni ikú. ²²Ṣùgbọ́n nísinsìnyí, tí a ti dá yín sílẹ̀ kúrò nínú ẹ̀ṣẹ̀, tí ẹ sì ti di ẹrú Baba wa, èso yín ń ṣamọ̀nà sí ìwà mímọ́, òpin rẹ̀ sì ni ìyè àìnípẹ̀kun. ²³Nítorí èrè ẹ̀ṣẹ̀ ni ikú, ṣùgbọ́n ẹ̀bùn Baba wa ni ìyè àìnípẹ̀kun nínú Kristi Jesu Olúwa wa.