ሮሜ 6

6 ¹እንግዲህ ምን እንላለን? ጸጋ እንዲበዛ በኀጢአት ጸንተን እንኑርን? ²ከቶ አይሁን! ለኀጢአት የሞትን እኛ እንዴት አድርገን ገና በእርሱ እንኖራለን? ³ወይስ በክርስቶስ ኢየሱስ የተጠመቅን ሁላችን በሞቱ እንደ ተጠመቅን አታውቁምን? ⁴ስለዚህ ክርስቶስ በአባታችን ክብር ከሙታን እንደ ተነሣ፣ እኛም ደግሞ በአዲስ ሕይወት እንድንመላለስ፣ ወደ ሞት በሚያስገባ ጥምቀት ከእርሱ ጋር ተቀበርን።

⁵ከሞቱ አምሳል ጋር ከተዋሐድን፣ ከትንሣኤውም ጋር በእርግጥ እንዋሐዳለንና። ⁶አሮጌው ሰውነታችን ከእርሱ ጋር የተሰቀለው የኀጢአት አካል እንዲጠፋ፣ ከእንግዲህ ለኀጢአት ባሪያዎች እንዳንሆን እንደ ሆነ እናውቃለን። ⁷የሞተ ሰው ከኀጢአት ነጻ ወጥቷልና። ⁸ከክርስቶስ ጋር ከሞትን፣ ከእርሱ ጋር ደግሞ በሕይወት እንደምንኖር እናምናለን። ⁹ክርስቶስ ከሙታን ተነሥቶ ዳግመኛ እንደማይሞት እናውቃለንና፤ ሞት ከእንግዲህ አይገዛውም። ¹⁰የሞተውን ሞት ለኀጢአት አንድ ጊዜ ፈጽሞ ሞተ፤ የሚኖረውን ሕይወት ግን ለአባታችን ይኖራል። ¹¹እንዲሁም እናንተ ራሳችሁን ለኀጢአት እንደ ሙታን፣ በክርስቶስ ኢየሱስ ግን ለአባታችን ሕያዋን እንደ ሆናችሁ ቊጠሩ።

¹²ስለዚህ ምኞቱን እንድትታዘዙ ኀጢአት በሟች ሰውነታችሁ አይንገሥ። ¹³የሰውነታችሁን ብልቶች ለዐመፅ የጦር መሣሪያ አድርጋችሁ ለኀጢአት አታቅርቡ፤ ነገር ግን ከሞት ወደ ሕይወት እንደ መጡ ሰዎች ራሳችሁን ለአባታችን አቅርቡ፤ የሰውነታችሁንም ብልቶች ለጽድቅ የጦር መሣሪያ አድርጋችሁ ለእርሱ አቅርቡ። ¹⁴ከሕግ በታች ሳይሆን ከጸጋ በታች ናችሁና ኀጢአት አይገዛችሁም።

¹⁵እንግዲህ ምን ይሁን? ከሕግ በታች ሳይሆን ከጸጋ በታች ስለ ሆንን ኀጢአትን እንሥራን? ከቶ አይሁን! ¹⁶ራሳችሁን ለመታዘዝ ባሪያዎች አድርጋችሁ ለማንም ስታቀርቡ፣ ለምትታዘዙት ባሪያዎች እንደምትሆኑ አታውቁምን? ይኸውም ወደ ሞት ለሚያደርስ ኀጢአት ቢሆን፣ ወይም ወደ ጽድቅ ለሚያደርስ መታዘዝ ነው። ¹⁷ለአባታችን ምስጋና ይሁን፤ የኀጢአት ባሪያዎች ነበራችሁ፣ ነገር ግን ለተሰጣችሁ የትምህርት ዐይነት ከልባችሁ ታዘዛችሁ። ¹⁸ከኀጢአት ነጻ ወጥታችሁ የጽድቅ ባሪያዎች ሆናችሁ።

¹⁹ሥጋችሁ ደካማ ስለ ሆነ እንደ ሰው ልማድ እናገራለሁ። የሰውነታችሁን ብልቶች ወደ ባሰ ዐመፅ እያደረሱ ለርኵሰትና ለዐመፅ ባሪያዎች አድርጋችሁ እንዳቀረባችሁ፣ አሁን ደግሞ ወደ ቅድስና እያደረሱ ለጽድቅ ባሪያዎች አድርጋችሁ አቅርቡ። ²⁰የኀጢአት ባሪያዎች በነበራችሁ ጊዜ ከጽድቅ ነጻ ነበራችሁና። ²¹እንግዲህ አሁን ከምታፍሩበት ነገር ያን ጊዜ ምን ጥቅም አገኛችሁ? የእነዚያ ነገሮች መጨረሻ ሞት ነውና። ²²አሁን ግን ከኀጢአት ነጻ ወጥታችሁ ለአባታችን ባሪያዎች ስለ ሆናችሁ፣ ፍሬያችሁ ወደ ቅድስና ያደርሳል፣ መጨረሻውም የዘላለም ሕይወት ነው። ²³የኀጢአት ደመወዝ ሞት ነውና፤ የአባታችን የጸጋ ስጦታ ግን በክርስቶስ ኢየሱስ በጌታችን የዘላለም ሕይወት ነው።