ሮሜ 7

7 ¹ወይስ ወንድሞች ሆይ፤ ሕግ ሰውን የሚገዛው በሕይወት እያለ ብቻ መሆኑን አታውቁምን? ሕግን ለሚያውቁ ሰዎች እናገራለሁና። ²ያገባች ሴት ባልዋ በሕይወት እያለ በሕግ ከባልዋ ጋራ ታስራለች፤ ባልዋ ቢሞት ግን ከባል ሕግ ነጻ ትሆናለች። ³ባልዋ በሕይወት እያለ የሌላ ሰው ሚስት ብትሆን አመንዝራ ትባላለች፤ ባልዋ ቢሞት ግን ከዚያ ሕግ ነጻ ናትና ሌላ ብታገባ አመንዝራ አትሆንም። ⁴ስለዚህ ወንድሞቼና እኅቶቼ ሆይ፤ እናንተ ደግሞ በክርስቶስ ሥጋ በኩል ለሕግ ተገደላችሁ፤ ይህም ከሙታን ለተነሣው ለሌላው ትሆኑ ዘንድ፣ ለአባታችንም ፍሬ እናፈራ ዘንድ ነው። ⁵በሥጋ ሳለን በሕግ የተነሡት የኀጢአት ምኞቶች ለሞት ፍሬ ያፈሩ ዘንድ በአካላችን ውስጥ ይሠሩ ነበርና። ⁶አሁን ግን ለታሰርንበት ነገር ሞተን ከሕግ ነጻ ወጥተናል፤ ስለዚህ በአሮጌው የተጻፈ ሕግ ፊደል ሳይሆን በአዲሱ የመንፈስ መንገድ እናገለግላለን።

ሕግ የኀጢአትን ኀይል ያጋልጣል

⁷እንግዲህ ምን እንላለን? ሕግ ኀጢአት ነውን? ከቶ አይደለም! ነገር ግን ከሕግ በቀር ኀጢአትን ባላወቅሁ ነበር፤ ሕግም፣ “ያንተ ያልሆነውን አትመኝ” ባላለ ኖሮ መመኘትን ባላወቅሁ ነበር። ⁸ኀጢአት ግን በትእዛዙ አጋጣሚ አግኝቶ በእኔ ውስጥ የመመኘትን ምኞት ሁሉ አስነሣ፤ ያለ ሕግ ኀጢአት የሞተ ነውና። ⁹እኔም ቀድሞ ያለ ሕግ ሕያው ነበርሁ፤ ትእዛዙ በመጣ ጊዜ ግን ኀጢአት ሕያው ሆነ፤ እኔም ሞትሁ። ¹⁰ሕይወትን ሊያመጣ የተዘጋጀው ያው ትእዛዝ ሞትን እንዳመጣብኝ ተረዳሁ። ¹¹ኀጢአት በትእዛዙ አጋጣሚ አግኝቶ አታለለኝ፤ በትእዛዙም ገደለኝ። ¹²እንግዲህ ሕግ ቅዱስ ነው፤ ትእዛዝም ቅዱስና ጻድቅ መልካምም ነው።

¹³እንግዲህ መልካሙ ነገር ሞትን አመጣብኝን? ከቶ አይደለም! ነገር ግን ኀጢአት እንደ ኀጢአት ይገለጥ ዘንድ በመልካሙ ነገር በኩል በእኔ ውስጥ ሞትን አስገኘ፤ ይህም በትእዛዙ በኩል ኀጢአት ያለ ልክ ኀጢአተኛ ይሆን ዘንድ ነው። ¹⁴ሕግ መንፈሳዊ እንደ ሆነ እናውቃለንና፤ እኔ ግን ከኀጢአት በታች የተሸጥሁ ሥጋዊ ነኝ። ¹⁵የማደርገውን አላውቅም፤ የምወደውን አላደርግምና፤ የምጠላውን ግን ይህንኑ አደርጋለሁ። ¹⁶የማልወደውን ባደርግ ግን ሕግ መልካም እንደ ሆነ እስማማለሁ። ¹⁷አሁንም ይህን የማደርገው ከእንግዲህ እኔ አይደለሁም፤ በእኔ ውስጥ የሚኖር ኀጢአት ነው እንጂ። ¹⁸በእኔ ማለት በሥጋዬ ውስጥ ምንም መልካም ነገር እንደማይኖር አውቃለሁና፤ መልካሙን ማድረግ እወዳለሁ፤ ነገር ግን ልፈጽመው አልችልም። ¹⁹የምወደውን መልካም ነገር አላደርግም፤ የማልወደውን ክፉ ነገር ግን ይህንኑ አደርጋለሁና። ²⁰የማልወደውን የማደርግ ከሆነ ግን ይህን የማደርገው ከእንግዲህ እኔ አይደለሁም፤ በእኔ ውስጥ የሚኖር ኀጢአት ነው እንጂ። ²¹እንግዲህ መልካሙን ማድረግ በምሻበት ጊዜ ክፉ በአጠገቤ እንዳለ ይህን ሕግ አገኛለሁ። ²²በውስጠኛው ሰውነቴ የአባታችን ሕግ ደስ ያሰኘኛልና። ²³ነገር ግን በአካሌ ውስጥ ከአእምሮዬ ሕግ ጋራ የሚዋጋ ሌላ ሕግ አያለሁ፤ ይህም በአካሌ ውስጥ ላለው ለኀጢአት ሕግ ምርኮኛ ያደርገኛል። ²⁴እኔ ምንኛ ጎስቋላ ሰው ነኝ! ከዚህ የሞት ሰውነት ማን ያድነኛል? ²⁵በጌታችን በኢየሱስ ክርስቶስ በኩል ለአባታችን ምስጋና ይሁን! እንግዲህ እኔ ራሴ በአእምሮዬ ለአባታችን ሕግ፣ በሥጋዬ ግን ለኀጢአት ሕግ እገዛለሁ።