Warumi 7

7 ¹Au je, hamjui, ndugu zangu—ninasema na watu wanaoijua sheria—kwamba sheria humtawala mtu wakati wote anapokuwa hai? ²Mwanamke aliyeolewa amefungwa na sheria kwa mumewe wakati anapokuwa hai; lakini mumewe akifa, amefunguliwa kutoka katika ile sheria ya mume. ³Basi, wakati mumewe angali hai, ataitwa mzinzi kama akiwa mke wa mwanaume mwingine; lakini mumewe akifa, huwa huru kutoka katika sheria ile—wala si mzinzi kama akiolewa na mwanaume mwingine. ⁴Kwa hiyo, ndugu zangu, ninyi pia mliuawa kuhusu sheria kwa njia ya mwili wa Kristo, ili mpate kuwa wa mwingine—yeye aliyefufuliwa kutoka kwa wafu—ili tuzae matunda kwa ajili ya Baba yetu. ⁵Kwa maana tulipokuwa katika mwili, tamaa za dhambi, zilizochochewa na sheria, zilitenda kazi katika viungo vyetu ili kuzaa matunda kwa ajili ya mauti. ⁶Lakini sasa tumefunguliwa kutoka katika sheria, tukiwa tumekufa kwa kile kilichotufunga, ili tutumike kwa njia mpya ya Roho, wala si kwa njia ya zamani ya andiko lililoandikwa.

Sheria Yafichua Nguvu ya Dhambi

⁷Basi tuseme nini? Je, sheria ni dhambi? La, hasha! Lakini nisingeijua dhambi isipokuwa kwa njia ya sheria—wala nisingeijua tamaa, kama sheria isingesema, "Usitamani kisicho chako." ⁸Lakini dhambi, ikipata nafasi kwa njia ya ile amri, ilizaa ndani yangu kila tamaa ya kutamani. Kwa maana pasipo sheria, dhambi imekufa. ⁹Zamani niliishi pasipo sheria; lakini ile amri ilipokuja, dhambi ilifufuka, nami nikafa. ¹⁰Nikaona kwamba ile amri iliyokusudiwa kuleta uzima, kwa kweli ililetea mauti. ¹¹Kwa maana dhambi, ikipata nafasi kwa njia ya ile amri, ilinidanganya, na kwa njia ya ile amri ikaniua. ¹²Basi, sheria ni takatifu, na ile amri ni takatifu na ya haki na njema.

¹³Je, basi, kile kilicho chema kikawa mauti kwangu? La, hasha! Bali dhambi—ili idhihirike kuwa dhambi—ilizaa mauti ndani yangu kwa njia ya kile kilicho chema, ili kwa njia ya ile amri dhambi izidi kuwa ya dhambi mno. ¹⁴Kwa maana twajua sheria ni ya kiroho, lakini mimi ni wa mwilini, nimeuzwa chini ya dhambi. ¹⁵Sifahamu nifanyacho; kwa maana lile nilitakalo silitendi, bali lile niluchukiacho ndilo nilitendalo. ¹⁶Basi kama nikitenda lile nisilolitaka, nakubali kwamba sheria ni njema. ¹⁷Basi sasa, si mimi tena nitendaye jambo hilo, bali ni dhambi ikaayo ndani yangu. ¹⁸Kwa maana najua ya kuwa hakuna jema likaalo ndani yangu—yaani, ndani ya mwili wangu. Kwa kuwa nataka kutenda jema, lakini siwezi kulitimiza. ¹⁹Kwa maana lile jema nilitakalo silitendi, bali lile baya nisilolitaka ndilo nilitendalo daima. ²⁰Basi kama nikitenda lile nisilolitaka, si mimi tena nilitendaye, bali ni dhambi ikaayo ndani yangu ndiyo ilitendayo. ²¹Basi naiona sheria hii: nitakapo kutenda jema, uovu upo karibu nami. ²²Kwa maana kwa utu wangu wa ndani naifurahia sheria ya Baba yetu. ²³Lakini naona sheria nyingine katika mwili wangu, ikipigana na sheria ya akili yangu, na kunifanya mateka wa sheria ya dhambi iliyo katika mwili wangu. ²⁴Ole wangu, maskini mimi! Ni nani atakayeniokoa na mwili huu wa mauti? ²⁵Ashukuriwe Baba yetu kwa njia ya Yesu Kristo Bwana wetu! Basi, mimi mwenyewe kwa akili yangu naitumikia sheria ya Baba yetu, lakini kwa mwili wangu naitumikia sheria ya dhambi.