Warumi 6

6 ¹Basi tuseme nini? Je, tuendelee kutenda dhambi ili neema iongezeke? ²La, hasha! Sisi tuliokufa kwa dhambi tutaishije tena ndani yake? ³Au hamjui ya kuwa sisi sote tuliobatizwa katika Kristo Yesu tulibatizwa katika mauti yake? ⁴Basi tulizikwa pamoja naye kwa njia ya ubatizo katika mauti, ili kama vile Kristo alivyofufuliwa kutoka kwa wafu kwa utukufu wa Baba yetu, vivyo hivyo na sisi tuenende katika upya wa uzima.

⁵Kwa maana ikiwa tumeunganishwa naye katika mfano wa mauti yake, bila shaka tutaunganishwa naye katika mfano wa ufufuo wake pia. ⁶Tunajua ya kuwa utu wetu wa kale ulisulubiwa pamoja naye, ili mwili wa dhambi ubatilike, tusiwe tena watumwa wa dhambi. ⁷Kwa maana aliyekufa amewekwa huru na dhambi. ⁸Basi ikiwa tulikufa pamoja na Kristo, twaamini ya kuwa tutaishi pia pamoja naye. ⁹Kwa maana tunajua ya kwamba Kristo, akiisha kufufuliwa kutoka kwa wafu, hafi tena; mauti haimtawali tena. ¹⁰Kwa maana kufa alikokufa, aliifia dhambi mara moja tu; bali uzima autuao, anaishi kwa ajili ya Baba yetu. ¹¹Vivyo hivyo ninyi jihesabuni kuwa mmekufa kwa dhambi, bali mko hai kwa Baba yetu katika Kristo Yesu.

¹²Basi dhambi isitawale katika mwili wenu wa kufa hata mkazitii tamaa zake. ¹³Wala msivitoe viungo vya mwili wenu kuwa silaha za udhalimu kwa dhambi; bali jitoeni ninyi wenyewe kwa Baba yetu kama walio hai kutoka kwa wafu, na viungo vya mwili wenu kuwa silaha za haki kwake yeye. ¹⁴Kwa maana dhambi haitawatawala ninyi, kwa sababu hamko chini ya sheria, bali chini ya neema.

¹⁵Basi, ni nini? Je, tutende dhambi kwa sababu hatuko chini ya sheria, bali chini ya neema? La, hasha! ¹⁶Hamjui ya kuwa mkijitoa ninyi wenyewe kwa mtu kuwa watumwa wa kumtii, mmekuwa watumwa wake yule mnayemtii—ikiwa ni dhambi iletayo mauti, au utii uletao haki? ¹⁷Bali ashukuriwe Baba yetu, kwa kuwa mlikuwa watumwa wa dhambi, lakini mliitii kwa moyo ile namna ya mafundisho mliyokabidhiwa. ¹⁸Na mkiisha kuwekwa huru na dhambi, mkawa watumwa wa haki.

¹⁹Nasema kwa jinsi ya kibinadamu, kwa sababu ya udhaifu wa mwili wenu. Kwa maana kama vile mlivyovitoa viungo vya mwili wenu kuwa watumwa wa uchafu na uasi kwa kuzidi uasi, vivyo hivyo sasa vitoeni viungo vyenu kuwa watumwa wa haki hata mpate utakatifu. ²⁰Kwa maana mlipokuwa watumwa wa dhambi, mlikuwa huru mbali na haki. ²¹Basi wakati ule mlipata faida gani katika mambo hayo ambayo sasa mnayaonea aibu? Kwa maana mwisho wa mambo hayo ni mauti. ²²Lakini sasa, mkiisha kuwekwa huru na dhambi na kuwa watumwa wa Baba yetu, mnapata faida yenu iletayo utakatifu, na mwisho wake ni uzima wa milele. ²³Kwa maana mshahara wa dhambi ni mauti, bali karama ya Baba yetu ni uzima wa milele katika Kristo Yesu Bwana wetu.