ਰੋਮੀਆਂ 6

6 ¹ਫਿਰ ਅਸੀਂ ਕੀ ਆਖੀਏ? ਕੀ ਅਸੀਂ ਪਾਪ ਕਰਦੇ ਰਹੀਏ ਤਾਂ ਜੋ ਕਿਰਪਾ ਵਧੇ? ²ਕਦੇ ਨਹੀਂ! ਅਸੀਂ ਜਿਹੜੇ ਪਾਪ ਲਈ ਮਰ ਚੁੱਕੇ ਹਾਂ, ਭਲਾ ਹੋਰ ਕਿਵੇਂ ਉਸ ਵਿੱਚ ਜੀਉਂਦੇ ਰਹੀਏ? ³ਕੀ ਤੁਸੀਂ ਨਹੀਂ ਜਾਣਦੇ ਕਿ ਅਸੀਂ ਸਾਰੇ ਜਿਨ੍ਹਾਂ ਨੇ ਮਸੀਹ ਯਿਸੂ ਵਿੱਚ ਬਪਤਿਸਮਾ ਲਿਆ, ਉਸ ਦੀ ਮੌਤ ਵਿੱਚ ਬਪਤਿਸਮਾ ਲਿਆ? ⁴ਸੋ ਅਸੀਂ ਬਪਤਿਸਮੇ ਦੁਆਰਾ ਉਸ ਨਾਲ ਮੌਤ ਵਿੱਚ ਦੱਬੇ ਗਏ, ਤਾਂ ਜੋ ਜਿਵੇਂ ਮਸੀਹ ਸਾਡੇ ਪਿਤਾ ਦੀ ਮਹਿਮਾ ਦੁਆਰਾ ਮੁਰਦਿਆਂ ਵਿੱਚੋਂ ਜੀ ਉੱਠਿਆ, ਤਿਵੇਂ ਅਸੀਂ ਵੀ ਨਵੇਂ ਜੀਵਨ ਵਿੱਚ ਚੱਲੀਏ।

⁵ਕਿਉਂਕਿ ਜੇ ਅਸੀਂ ਉਸ ਦੀ ਮੌਤ ਦੀ ਸਮਾਨਤਾ ਵਿੱਚ ਉਸ ਨਾਲ ਜੁੜ ਗਏ ਹਾਂ, ਤਾਂ ਜ਼ਰੂਰ ਹੀ ਉਸ ਦੇ ਜੀ ਉੱਠਣ ਵਿੱਚ ਵੀ ਜੁੜਾਂਗੇ। ⁶ਅਸੀਂ ਜਾਣਦੇ ਹਾਂ ਕਿ ਸਾਡਾ ਪੁਰਾਣਾ ਮਨੁੱਖ ਉਸ ਨਾਲ ਸਲੀਬ ਉੱਤੇ ਚੜ੍ਹਾਇਆ ਗਿਆ, ਤਾਂ ਜੋ ਪਾਪ ਦਾ ਸਰੀਰ ਨਾਸ ਹੋ ਜਾਵੇ, ਅਤੇ ਅਸੀਂ ਅੱਗੇ ਨੂੰ ਪਾਪ ਦੇ ਗੁਲਾਮ ਨਾ ਰਹੀਏ। ⁷ਕਿਉਂਕਿ ਜਿਹੜਾ ਮਰ ਗਿਆ ਹੈ, ਉਹ ਪਾਪ ਤੋਂ ਮੁਕਤ ਕਰ ਦਿੱਤਾ ਗਿਆ ਹੈ। ⁸ਹੁਣ ਜੇ ਅਸੀਂ ਮਸੀਹ ਨਾਲ ਮਰੇ, ਤਾਂ ਅਸੀਂ ਵਿਸ਼ਵਾਸ ਕਰਦੇ ਹਾਂ ਕਿ ਅਸੀਂ ਉਸ ਨਾਲ ਜੀਉਂਦੇ ਵੀ ਰਹਾਂਗੇ। ⁹ਕਿਉਂਕਿ ਅਸੀਂ ਜਾਣਦੇ ਹਾਂ ਕਿ ਮਸੀਹ ਮੁਰਦਿਆਂ ਵਿੱਚੋਂ ਜੀ ਉੱਠ ਕੇ ਫਿਰ ਕਦੇ ਨਹੀਂ ਮਰਦਾ; ਮੌਤ ਦਾ ਉਸ ਉੱਤੇ ਹੋਰ ਰਾਜ ਨਹੀਂ। ¹⁰ਕਿਉਂਕਿ ਜੋ ਮੌਤ ਉਹ ਮਰਿਆ, ਉਹ ਪਾਪ ਲਈ ਇੱਕੋ ਵਾਰ ਸਦਾ ਲਈ ਮਰਿਆ; ਪਰ ਜੋ ਜੀਵਨ ਉਹ ਜੀਉਂਦਾ ਹੈ, ਉਹ ਸਾਡੇ ਪਿਤਾ ਲਈ ਜੀਉਂਦਾ ਹੈ। ¹¹ਇਸੇ ਤਰ੍ਹਾਂ ਤੁਸੀਂ ਵੀ ਆਪਣੇ ਆਪ ਨੂੰ ਪਾਪ ਲਈ ਮਰੇ ਹੋਏ, ਪਰ ਮਸੀਹ ਯਿਸੂ ਵਿੱਚ ਸਾਡੇ ਪਿਤਾ ਲਈ ਜੀਉਂਦੇ ਸਮਝੋ।

¹²ਇਸ ਲਈ ਪਾਪ ਨੂੰ ਆਪਣੇ ਮਰਨਹਾਰ ਸਰੀਰ ਵਿੱਚ ਰਾਜ ਨਾ ਕਰਨ ਦਿਓ, ਕਿ ਤੁਸੀਂ ਉਸ ਦੀਆਂ ਲਾਲਸਾਵਾਂ ਦੀ ਮੰਨੋ। ¹³ਆਪਣੇ ਸਰੀਰ ਦੇ ਅੰਗ ਪਾਪ ਨੂੰ ਬੁਰਾਈ ਦੇ ਹਥਿਆਰਾਂ ਵਜੋਂ ਨਾ ਸੌਂਪੋ; ਸਗੋਂ ਆਪਣੇ ਆਪ ਨੂੰ ਸਾਡੇ ਪਿਤਾ ਨੂੰ ਸੌਂਪੋ, ਉਨ੍ਹਾਂ ਵਾਂਗ ਜੋ ਮੌਤ ਵਿੱਚੋਂ ਜੀਵਨ ਵਿੱਚ ਲਿਆਂਦੇ ਗਏ, ਅਤੇ ਆਪਣੇ ਸਰੀਰ ਦੇ ਅੰਗ ਉਸ ਨੂੰ ਧਾਰਮਿਕਤਾ ਦੇ ਹਥਿਆਰਾਂ ਵਜੋਂ ਸੌਂਪੋ। ¹⁴ਕਿਉਂਕਿ ਪਾਪ ਤੁਹਾਡੇ ਉੱਤੇ ਹਕੂਮਤ ਨਹੀਂ ਕਰੇਗਾ, ਕਿਉਂਕਿ ਤੁਸੀਂ ਸ਼ਰਾ ਦੇ ਅਧੀਨ ਨਹੀਂ ਸਗੋਂ ਕਿਰਪਾ ਦੇ ਅਧੀਨ ਹੋ।

¹⁵ਤਾਂ ਫਿਰ ਕੀ? ਕੀ ਅਸੀਂ ਪਾਪ ਕਰੀਏ ਕਿਉਂਕਿ ਅਸੀਂ ਸ਼ਰਾ ਦੇ ਅਧੀਨ ਨਹੀਂ ਸਗੋਂ ਕਿਰਪਾ ਦੇ ਅਧੀਨ ਹਾਂ? ਕਦੇ ਨਹੀਂ! ¹⁶ਕੀ ਤੁਸੀਂ ਨਹੀਂ ਜਾਣਦੇ ਕਿ ਜਦੋਂ ਤੁਸੀਂ ਆਪਣੇ ਆਪ ਨੂੰ ਕਿਸੇ ਦੇ ਗੁਲਾਮ ਬਣ ਕੇ ਆਗਿਆ ਮੰਨਣ ਲਈ ਸੌਂਪਦੇ ਹੋ, ਤਾਂ ਤੁਸੀਂ ਉਸੇ ਦੇ ਗੁਲਾਮ ਹੋ ਜਿਸ ਦੀ ਤੁਸੀਂ ਮੰਨਦੇ ਹੋ—ਭਾਵੇਂ ਪਾਪ ਦੇ, ਜੋ ਮੌਤ ਵੱਲ ਲੈ ਜਾਂਦਾ ਹੈ, ਜਾਂ ਆਗਿਆ ਮੰਨਣ ਦੇ, ਜੋ ਧਾਰਮਿਕਤਾ ਵੱਲ ਲੈ ਜਾਂਦੀ ਹੈ? ¹⁷ਪਰ ਸਾਡੇ ਪਿਤਾ ਦਾ ਧੰਨਵਾਦ ਹੋਵੇ: ਤੁਸੀਂ ਪਾਪ ਦੇ ਗੁਲਾਮ ਸੀ, ਪਰ ਤੁਸੀਂ ਉਸ ਸਿੱਖਿਆ ਦੇ ਨਮੂਨੇ ਦੀ ਦਿਲੋਂ ਆਗਿਆ ਮੰਨੀ ਜਿਸ ਦੇ ਸੁਪੁਰਦ ਤੁਸੀਂ ਕੀਤੇ ਗਏ ਸੀ। ¹⁸ਅਤੇ ਪਾਪ ਤੋਂ ਮੁਕਤ ਹੋ ਕੇ, ਤੁਸੀਂ ਧਾਰਮਿਕਤਾ ਦੇ ਗੁਲਾਮ ਬਣ ਗਏ।

¹⁹ਮੈਂ ਮਨੁੱਖੀ ਢੰਗ ਨਾਲ ਬੋਲਦਾ ਹਾਂ, ਕਿਉਂਕਿ ਤੁਹਾਡਾ ਸਰੀਰ ਕਮਜ਼ੋਰ ਹੈ। ਜਿਵੇਂ ਤੁਸੀਂ ਆਪਣੇ ਸਰੀਰ ਦੇ ਅੰਗ ਅਸ਼ੁੱਧਤਾ ਅਤੇ ਬੇਸ਼ਰਾਈ ਦੇ ਗੁਲਾਮ ਵਜੋਂ ਸੌਂਪੇ, ਜਿਸ ਤੋਂ ਹੋਰ ਬੇਸ਼ਰਾਈ ਪੈਦਾ ਹੋਈ, ਤਿਵੇਂ ਹੁਣ ਉਨ੍ਹਾਂ ਨੂੰ ਧਾਰਮਿਕਤਾ ਦੇ ਗੁਲਾਮ ਵਜੋਂ ਸੌਂਪੋ, ਜਿਸ ਤੋਂ ਪਵਿੱਤਰਤਾ ਪੈਦਾ ਹੋਵੇ। ²⁰ਕਿਉਂਕਿ ਜਦੋਂ ਤੁਸੀਂ ਪਾਪ ਦੇ ਗੁਲਾਮ ਸੀ, ਤਦੋਂ ਤੁਸੀਂ ਧਾਰਮਿਕਤਾ ਵੱਲੋਂ ਆਜ਼ਾਦ ਸੀ। ²¹ਤਾਂ ਉਸ ਵੇਲੇ ਤੁਹਾਨੂੰ ਉਨ੍ਹਾਂ ਗੱਲਾਂ ਤੋਂ ਕੀ ਲਾਭ ਹੋਇਆ, ਜਿਨ੍ਹਾਂ ਤੋਂ ਹੁਣ ਤੁਸੀਂ ਸ਼ਰਮਿੰਦੇ ਹੋ? ਕਿਉਂਕਿ ਉਨ੍ਹਾਂ ਗੱਲਾਂ ਦਾ ਅੰਤ ਮੌਤ ਹੈ। ²²ਪਰ ਹੁਣ, ਪਾਪ ਤੋਂ ਮੁਕਤ ਹੋ ਕੇ ਅਤੇ ਸਾਡੇ ਪਿਤਾ ਦੇ ਗੁਲਾਮ ਬਣ ਕੇ, ਤੁਹਾਡਾ ਫਲ ਪਵਿੱਤਰਤਾ ਵੱਲ ਲੈ ਜਾਂਦਾ ਹੈ, ਅਤੇ ਅੰਤ ਸਦੀਪਕ ਜੀਵਨ ਹੈ। ²³ਕਿਉਂਕਿ ਪਾਪ ਦੀ ਮਜ਼ਦੂਰੀ ਮੌਤ ਹੈ, ਪਰ ਸਾਡੇ ਪਿਤਾ ਦੀ ਦਾਤ ਸਾਡੇ ਪ੍ਰਭੂ ਮਸੀਹ ਯਿਸੂ ਵਿੱਚ ਸਦੀਪਕ ਜੀਵਨ ਹੈ।