Mga Taga-Roma 6

6 ¹Nan, unsa may atong ikaingon? Magpadayon ba kita sa pagpakasala aron modagaya ang grasya? ²Dili gayod! Kita nga nangamatay na sa sala, unsaon man nato pagpuyo pa diha niini? ³O wala ba kamo masayod nga kitang tanan nga nabawtismohan ngadto kang Cristo Jesus nabawtismohan ngadto sa iyang kamatayon? ⁴Busa gilubong kita uban kaniya pinaagi sa bawtismo ngadto sa kamatayon, aron nga maingon nga si Cristo gibanhaw gikan sa mga patay pinaagi sa himaya sa atong Amahan, kita usab magkinabuhi diha sa kabag-ohan sa kinabuhi.

⁵Kay kon kita nahiusa na sa pagkasama sa iyang kamatayon, mahiusa usab gayod kita sa iyang pagkabanhaw. ⁶Nasayod kita nga ang atong daang pagkatawo gilansang uban kaniya sa krus aron laglagon ang lawas sa sala, aron dili na kita maulipon sa sala. ⁷Kay si bisan kinsa nga namatay na gipagawas na gikan sa sala. ⁸Karon kon namatay kita uban ni Cristo, mituo kita nga mabuhi usab kita uban kaniya. ⁹Kay nasayod kita nga si Cristo, nga gibanhaw gikan sa mga patay, dili na gayod mamatay pag-usab; ang kamatayon wala nay gahom kaniya. ¹⁰Kay ang kamatayon nga iyang giantos, namatay siya sa sala sa makausa alang sa tanan; apan ang kinabuhi nga iyang gipuy-an, nagkinabuhi siya alang sa atong Amahan. ¹¹Sa samang paagi, isipa ninyo ang inyong kaugalingon nga patay sa sala apan buhi sa atong Amahan diha kang Cristo Jesus.

¹²Busa ayaw ninyo tugoti ang sala nga maghari sa inyong may kamatayong lawas aron tumanon ninyo ang mga pangibog niini. ¹³Ayaw ninyo ihalad ang mga bahin sa inyong lawas ngadto sa sala ingon nga mga hinagiban alang sa pagkadaotan; hinuon, ihalad ang inyong kaugalingon ngadto sa atong Amahan ingon nga mga gidala gikan sa kamatayon ngadto sa kinabuhi, ug ang mga bahin sa inyong lawas ngadto kaniya ingon nga mga hinagiban alang sa pagkamatarong. ¹⁴Kay ang sala dili na magagahom kaninyo, tungod kay kamo wala na ilalom sa balaod kondili ilalom sa grasya.

¹⁵Nan, unsa man? Magpakasala ba kita tungod kay kita wala ilalom sa balaod kondili ilalom sa grasya? Dili gayod! ¹⁶Wala ba kamo masayod nga sa pagtugyan ninyo sa inyong kaugalingon ngadto sa usa ingon nga mga ulipon aron motuman, nahimo kamong mga ulipon sa bisan kinsa nga inyong gituman—kon sa sala ba, nga nagtultol ngadto sa kamatayon, o sa pagkamasinugtanon, nga nagtultol ngadto sa pagkamatarong? ¹⁷Salamat sa atong Amahan: mga ulipon kamo kaniadto sa sala, apan mituman kamo gikan sa kasingkasing sa sulondan sa pagtulon-an nga gitugyan kaninyo. ¹⁸Sanglit gipagawas na kamo gikan sa sala, nahimo kamong mga ulipon sa pagkamatarong.

¹⁹Nagsulti ako sa tawhanong paagi, tungod kay huyang ang inyong unod. Maingon nga gihalad ninyo kaniadto ang mga bahin sa inyong lawas ingon nga mga ulipon sa kahugaw ug sa pagkamalinapason, nga misangko sa labaw pang pagkamalinapason, karon ihalad ninyo kini ingon nga mga ulipon sa pagkamatarong, nga magtultol ngadto sa pagkabalaan. ²⁰Kay sa dihang mga ulipon pa kamo sa sala, gawasnon kamo gikan sa pagkamatarong. ²¹Unsa may inyong naani niadtong panahona gikan sa mga butang nga inyong gikaulawan karon? Kay kadtong mga butanga mosangko ngadto sa kamatayon. ²²Apan karon, gipagawas na gikan sa sala ug nahimong ulipon sa atong Amahan, ang inyong bunga magtultol ngadto sa pagkabalaan, ug ang kataposan, kinabuhing dayon. ²³Kay ang suhol sa sala mao ang kamatayon, apan ang gasa sa atong Amahan mao ang kinabuhing dayon diha kang Cristo Jesus nga atong Ginoo.