ሮሜ 6 FHB Father's Heart Bible™

6 ¹እምበኣር እንታይ ክንብል ኢና? ፀጋ ምእንቲ ኽበዝሕ ኣብ ሓጢኣት ክንቕፅል ዲና? ²ኣይኹን ከቶ! ንሕና እቶም ንሓጢኣት ዝሞትና፥ ከመይ ጌርና ደጊም ኣብኣ ክንነብር ንኽእል? ³ወይ ንሕና ዅላትና እቶም ናብ ክርስቶስ ኢየሱስ ዝተጠመቕና፥ ናብ ሞቱ ኸም ዝተጠመቕና ኣይትፈልጡን ዲኹም? ⁴እምበኣር ብጥምቀት ናብ ሞት ምስኡ ተቐበርና፤ ከምቲ ክርስቶስ ብኽብሪ ኣቦና ካብ ምዉታን ዝተስአ፥ ንሕናውን ከምኡ ብሓዳስ ህይወት ክንመላለስ ኢና።

⁵ምስ ምስሊ ሞቱ ሕቡራት እንተ ዀይንና፥ ምስ ትንሳኤኡ ድማ ብርግፅ ሕቡራት ክንኸውን ኢና። ⁶እቲ ኣረጊት ሰብነትና ምስኡ ኸም ዝተሰቕለ ንፈልጥ ኢና፤ እዙይ ከዓ ሰብነት ሓጢኣት ምእንቲ ኽጠፍእ፥ ደጊም ንሓጢኣት ባሮት ከይንኸውን እዩ። ⁷እቲ ዝሞተ ኻብ ሓጢኣት ሓራ ወፂኡ እዩ እሞ። ⁸ምስ ክርስቶስ ዝሞትና እንተ ዀይንና ኸዓ፥ ምስኡ ድማ ከም እንነብር ንኣምን ኢና። ⁹ክርስቶስ ካብ ምዉታን ተሲኡ ደጊም ከም ዘይመውት፥ ሞትውን ደጊም ከም ዘይመልኮ ንፈልጥ ኢና። ¹⁰እቲ ዝሞቶ ሞት፥ ንሓጢኣት ሓንሳእ ንዅሉ ሞቶ፤ እታ ዝነብራ ህይወት ግና፥ ንኣቦና ይነብር። ¹¹ከምኡውን ንስኻትኩም ኣብ ክርስቶስ ኢየሱስ ኴንኩም፥ ንሓጢኣት ምዉታት፥ ንኣቦና ግና ህያዋን ከም ዝዀንኩም ጌርኩም ንርእስኹም ቚፀርዋ።

¹²ስለዙይ ንትምኒቱ ምእንቲ ኸይትእዘዙ፥ ሓጢኣት ኣብ መዋቲ ስጋኹም ኣይንገስ። ¹³ኣካላት ሰብነትኩም ኣፅዋር ዓመፃ ጌርኩም ንሓጢኣት ኣይተወፍይዎ፤ የግዳስ ከም ካብ ሞት ናብ ህይወት ዝመፁ ኾይንኩም፥ ንርእስኹም ንኣቦና ወፍይዋ፤ ኣካላት ሰብነትኩምውን ኣፅዋር ፅድቂ ጌርኩም ንእኡ ወፍይዎ። ¹⁴ንስኻትኩም ኣብ ትሕቲ ፀጋ እምበር፥ ኣብ ትሕቲ ሕጊ ኣይኮንኩምን እሞ፥ ሓጢኣት ኣይመልከኩምን እዩ።

¹⁵እምበኣር እንታይ እሞ? ኣብ ትሕቲ ፀጋ እምበር፥ ኣብ ትሕቲ ሕጊ ስለ ዘይኮንና ዲና ሓጢኣት እንገብር? ኣይኹን ከቶ! ¹⁶ንርእስኹም ንሓደ ሰብ ባሮት ኴንኩም ክትእዘዝዎ እንተ ወፊኹም፥ ናይቲ እትእዘዝዎ ባሮት ከም እትኾኑ፥ ወይ ናይ ሓጢኣት ባሮት ኴንኩም ናብ ሞት፥ ወይ ናይ ምእዛዝ ባሮት ኴንኩም ናብ ፅድቂ ከም ዘብፅሕ፥ ኣይትፈልጡን ዲኹም? ¹⁷ንኣቦና ምስጋና ይኹን፤ ባሮት ሓጢኣት ኔርኩም፥ ነቲ ዝተዋሃብኩምዎ ኣርኣያ ትምህርቲ ግና ብልብኹም ተኣዘዝኩምዎ። ¹⁸ካብ ሓጢኣት ሓራ ወፂእኹም፥ ባሮት ፅድቂ ኾንኩም።

¹⁹ስጋኹም ድኹም ስለ ዝኾነ፥ ከም ኣዘራርባ ሰብ እዛረብ ኣለኹ። ከምቲ ኣካላት ሰብነትኩም ንርኽሰትን ንዓመፅን ባሮት ጌርኩም ዘቕረብኩምዎ፥ ዓመፅውን እናበዝሐ ዝኸደ፥ ሕዚ ድማ ኣካላት ሰብነትኩም ናብ ቅድስና ምእንቲ ኽበፅሕ፥ ባሮት ፅድቂ ጌርኩም ኣቕርብዎ። ²⁰ባሮት ሓጢኣት ከለኹም፥ ካብ ፅድቂ ሓራ ኔርኩም እሞ። ²¹እምበኣር ሕዚ ኻብቲ እትሓፍሩሉ ነገር እንታይ ጥቕሚ ረኺብኩም? መወዳእታ እዞም ነገራት እዚኣቶም ሞት እዩ እሞ። ²²ሕዚ ግና ካብ ሓጢኣት ሓራ ወፂእኹም፥ ንኣቦና ባሮት ኴንኩም፥ ፍሪኹም ናብ ቅድስና ይበፅሕ፤ መወዳእታኡ ኸዓ ናይ ዘለኣለም ህይወት እዩ። ²³ዓስቢ ሓጢኣት ሞት እዩ እሞ፤ ውህብቶ ኣቦና ግና ኣብ ክርስቶስ ኢየሱስ ጐይታና፥ ናይ ዘለኣለም ህይወት እዩ።