دَ ګناه نه مړۀ، پلار ته ژوندى

که فضل هر څه پټوي، نو ولې په ازاده ګناه ونه کړو؟ د پولس ځواب قاعده نه ده بلکې مرګ دی: بپتسما موږ د مسیح له مرګ سره یو ځای کړو، نو ګناه ته بېرته ستنېدل داسې دي لکه هغه قبر ته ورګرځېدل چې موږ لا دمخه ترې وتلي یو. خپل بدن زموږ پلار ته وړاندې کړه — ته به د هغه څه خدمت کوې چې اطاعت يې کوې.

څپرکی 6.

نو اوس مونږ څۀ ووايو؟ ايا مونږ دې په ګناه کولو کښې دوام ورکوو چې فضل زيات شى؟ هرګز نه! مونږ چې دَ ګناه نه مړۀ شوى يُو، نو بيا څنګه په هغې کښې ژوند کولے شُو؟ ايا تاسو ته دا معلوم نۀ دى چې مونږ ټول چې په عيسىٰ مسيح کښې بپتسمه راکړے شوے يُو، هغه دَ هغۀ په مرګ کښې بپتسمه وه؟ نو مونږ دَ بپتسمې په وسيله دَ هغۀ سره په مرګ کښې ښخ شوُو، دې دپاره چې لکه څنګه چې مسيح دَ زمونږ دَ پلار دَ لوئى په وسيله دَ مړو نه راژوندے شو، هم هغه شان مونږ هم په نوى ژوند کښې وګرځُو.

ځکه چې کۀ مونږ دَ هغۀ دَ مرګ دَ مثال سره يو ځائ شوى يُو، نو خامخا به دَ هغۀ دَ بيا راژوندى کېدو سره هم يو ځائ شُو. مونږ ته دا معلومه ده چې زمونږ زوړ انسان دَ هغۀ سره په سولئ کړے شو، دې دپاره چې دَ ګناه بدن تباه شى، او مونږ بيا دَ ګناه غلامان نۀ وُو. ځکه چې څوک چې مړ شوے وى، هغه دَ ګناه نه آزاد کړے شوے دے. نو کۀ مونږ دَ مسيح سره مړۀ شوى يُو، نو مونږ ايمان لرُو چې دَ هغۀ سره به ژوند هم کوُو. ځکه چې مونږ ته دا معلومه ده چې مسيح چې دَ مړو نه راژوندے شو، هغه بيا هيچرې نۀ مرى؛ مرګ نور په هغۀ باندې حکومت نۀ کوى. ځکه چې کوم مرګ هغۀ ومنلو، هغه دَ ګناه دپاره يو ځل دَ تل دپاره مړ شو؛ خو کوم ژوند چې هغه کوى، هغه دَ زمونږ پلار دپاره ژوند کوى. هم هغه شان، تاسو هم خپل ځانونه دَ ګناه نه مړۀ وګڼئ، خو په عيسىٰ مسيح کښې دَ زمونږ پلار دپاره ژوندى.

نو ځکه ګناه ته اجازت مۀ ورکوئ چې ستاسو په مرَنى بدن باندې بادشاهى وکړى چې تاسو دَ هغې دَ خواهشونو اطاعت وکړئ. دَ خپل بدن غړى دَ بدکارۍ دَ وسلو په شان ګناه ته مۀ وړاندې کوئ؛ بلکې خپل ځانونه دَ هغه کسانو په شان زمونږ پلار ته وړاندې کوئ چې دَ مرګ نه ژوند ته راوستے شوى دى، او دَ خپل بدن غړى دَ صداقت دَ وسلو په شان هغۀ ته وړاندې کوئ. ځکه چې ګناه به په تاسو باندې غلبه ونۀ لرى، ځکه چې تاسو دَ شريعت لاندې نۀ يئ بلکې دَ فضل لاندې يئ.

نو بيا څۀ؟ ايا مونږ دې ګناه وکړو ځکه چې مونږ دَ شريعت لاندې نۀ يُو بلکې دَ فضل لاندې يُو؟ هرګز نه! ايا تاسو ته دا معلوم نۀ دى چې کله تاسو خپل ځانونه دَ اطاعت کولو دپاره دَ چا په حواله دَ غلامانو په شان کوئ، نو تاسو دَ هغه چا غلامان شئ دَ چا چې اطاعت کوئ، کۀ هغه ګناه وى چې مرګ ته رسوى، او کۀ اطاعت وى چې صداقت ته رسوى؟ خو دَ زمونږ پلار شکر دے: تاسو دَ ګناه غلامان وئ، خو دَ کوم تعليم په نمونه چې تاسو ته سپارلے شوے وو، تاسو دَ زړۀ نه دَ هغې اطاعت وکړو. او کله چې تاسو دَ ګناه نه آزاد کړے شوئ، نو تاسو دَ صداقت غلامان شوئ.

زۀ دَ انسان په طور خبرې کوم، ځکه چې ستاسو جسم کمزورے دے. لکه څنګه چې تاسو خپل بدن غړى دَ ناپاکۍ او بې‌دينۍ غلامان ګرځولى وُو چې نوره بې‌دينى پېدا کړى، نو اوس هم هغه دَ صداقت غلامان وګرځوئ چې پاکوالے پېدا کړى. ځکه چې کله تاسو دَ ګناه غلامان وئ، نو تاسو دَ صداقت نه آزاد وئ. نو هغه وخت تاسو دَ هغه کارونو نه څۀ ګټه واخسته چې اوس پرې شرمېږئ؟ ځکه چې دَ هغه شيانو انجام مرګ دے. خو اوس چې تاسو دَ ګناه نه آزاد شوئ او دَ زمونږ پلار غلامان شوئ، نو ستاسو مېوه پاکوالى ته رسوى، او انجام يې دَ تل ژوندون دے. ځکه چې دَ ګناه مزدورى مرګ دے، خو دَ زمونږ پلار بخشش دَ تل ژوندون دے چې په عيسىٰ مسيح، زمونږ مالِک کښې دے.