ሮሜ 7 FHB Father's Heart Bible™

7 ¹ወይ ኣቱም ኣሕዋት፥ — ንሕጊ ንዝፈልጡ ሰባት እየ ዝዛረብ ዘለኹ — ሕጊ ኣብ ሰብ ዝገዝእ ንሱ ብህይወት ክሳዕ ዘሎ ጥራሕ ምዃኑ ኣይትፈልጡንዶ ኢኹም? ²እታ ሰብኣይ ዘለዋ ሰበይቲ፥ ሰብኣያ ብህይወት ክሳዕ ዘሎ ብሕጊ ምስኡ ተኣሲራ ኣላ፤ ሰብኣያ እንተ ሞተ ግና፥ ካብቲ ሕጊ ሰብኣይ ሓራ ትኸውን። ³ሰብኣያ ብህይወት ከሎ፥ ናይ ካልእ ሰብኣይ ሰበይቲ እንተ ኾነት ዘማዊት ትበሃል፤ ሰብኣያ እንተ ሞተ ግና፥ ካብቲ ሕጊ እቲ ሓራ እያ፥ ንኻልእ እንተ ተመርዓወት ዘማዊት ኣይኮነትን። ⁴ስለዙይ ኣሕዋተይ፥ ንስኻትኩምውን ብስጋ ክርስቶስ ገይርኩም ንሕጊ ሞታትኩም ኢኹም፤ ንኻልእ ማለት ነቲ ካብ ሙታን ዝተስአ ምእንቲ ኽትኮኑ፥ ንኣቦና ፍረ ምእንቲ ኽነፍሪ። ⁵ብስጋ እንተለና ኸሎና፥ እቲ ብሕጊ ዝተላዕለ ፍትወት ሓጢኣት፥ ንሞት ፍረ ምእንቲ ከፍሪ፥ ኣብ ኣካላትና ይሰርሕ ነበረ። ⁶ሕዚ ግና በቲ ኣሲሩ ንዓና ዝሓዘ ነገር ሞይትና፥ ካብ ሕጊ ሓራ ወፂእና ኣለና፤ ስለዙይ በቲ ኣረጊት ናይ ፅሑፍ መገዲ ዘይኮነ፥ በቲ ሓድሽ ናይ መንፈስ መገዲ ነገልግል ኣለና።

ሕጊ ንሓይሊ ሓጢኣት ይገልፅ

⁷እንታይ ደኣ ኽንብሎ ኢና? ሕጊ ሓጢኣትዶ እዩ? ከቶ ኣይኮነን! ይኹን እምበር፥ ብዘይ ሕጊ ንሓጢኣት ኣይምፈለጥክዎን፤ ሕጊ፥ “ዘይናትካ ኣይትመነ” ኢሉ እንተ ዘይነግረኒ፥ ንትምኒትውን ኣይምፈለጥክዎን። ⁸ሓጢኣት ግና፥ በቲ ትእዛዝ ኣጋጣሚ ረኺቡ፥ ኣባይ ኵሉ ዓይነት ተመናይ ትምኒት ኣምፅአ። ብዘይ ሕጊ ሓጢኣት ምዉት እዩ እሞ። ⁹ቀደም ብዘይ ሕጊ እነብር ነበርኩ፤ እቲ ትእዛዝ ምስ መፀ ግና፥ ሓጢኣት ህያው ኮነ፥ ኣነ ኸዓ ሞትኩ። ¹⁰እቲ ህይወት ከምፅእ ዝተገብረ ትእዛዝ፥ ንሱ ባዕሉ ብሓቂ ሞት ከም ዘምፅአለይ ረኸብኩ። ¹¹ሓጢኣት በቲ ትእዛዝ ምችዊ ጊዜ ረኺቡ ኣስሓተኒ፤ በቲ ትእዛዝ ድማ ንዓይ ቐተለ። ¹²እምበኣርከስ ሕጊ ቅዱስ እዩ፤ ትእዛዝ ድማ ቅዱስን ፃድቕን ሰናይን እዩ።

¹³እሞ እቲ ሰናይ ነገር ሞት ኣምፅአለይዶ? ከቶ ኣይኮነን! እንታይ ደኣ፥ ሓጢኣት ከም ሓጢኣት ምእንቲ ኽግለፅ፥ በቲ ሰናይ ነገር ኣባይ ሞት ኣምፅአ፤ ሓጢኣት ድማ በቲ ትእዛዝ የመና ሓጢኣተኛ ምእንቲ ኽኸውን። ¹⁴ሕጊ መንፈሳዊ ምዃኑ ንፈልጥ ኢና፤ ኣነ ግና ስጋዊ እየ፥ ትሕቲ ሓጢኣት ዝተሸጥኩ። ¹⁵ነቲ ዝገብሮ ኣየስተውዕለሉን እየ፤ ነቲ ዝደልዮ ኣይገብርን፥ ነቲ ዝፀልኦ ደኣ እገብሮ። ¹⁶ነቲ ዘይደልዮ እንተ ገበርኩ ግና፥ ሕጊ ሰናይ ምዃኑ እሰማማዕ ኣለኹ። ¹⁷ሕዚ ድማ፥ እቲ ዝገብሮ ኣብ ውሽጠይ ዝነብር ሓጢኣት እምበር፥ ደጊም ኣነ ኣይኮንኩን። ¹⁸ኣባይ፥ ማለት ኣብ ስጋይ፥ ሰናይ ነገር ከም ዘይነብር እፈልጥ እየ። ሰናይ ክገብር እደሊ እየ እሞ፥ ክፍፅሞ ግና ኣይኽእልን። ¹⁹ነቲ ዝደልዮ ሰናይ ኣይገብርን፥ ነቲ ዘይደልዮ ክፉእ ደኣ ነዙይ እገብሮ ኣለኹ። ²⁰ነቲ ዘይደልዮ እንተ ገበርኩ ኸዓ፥ እቲ ዝገብሮ ኣብ ውሽጠይ ዝነብር ሓጢኣት እምበር፥ ደጊም ኣነ ኣይኮንኩን። ²¹እምበኣር ከምዙይ ዝበለ ሕጊ ረኺበ ኣለኹ፦ ሰናይ ክገብር ክደሊ ኸለኹ፥ ክፉእ ኣብ ጥቓይ ኣሎ። ²²ብውሽጣዊ ሰብነተይ ብሕጊ ኣቦና እሕጐስ እየ እሞ። ²³ኣብ ኣካላተይ ግና ካልእ ሕጊ እርኢ ኣለኹ፤ ንሱ ምስ ሕጊ ኣእምሮይ ይዋጋእ፥ ናብቲ ኣብ ኣካላተይ ዝሰርሕ ሕጊ ሓጢኣት ድማ ማሪኹ ይወስደኒ። ²⁴ኣነ ኽንደይ ዝኣመሰለ ምስኪን ሰብ እየ! ካብዝ ስጋ ሞት እዙይ መን ከድሕነኒ እዩ? ²⁵ብጐይታና ኢየሱስ ክርስቶስ ገይረ ንኣቦና ምስጋና ይኹን! እምበኣርከስ ኣነ ባዕለይ ብኣእምሮይ ንሕጊ ኣቦና፥ ብስጋይ ግና ንሕጊ ሓጢኣት የገልግል ኣለኹ።