رومیوں 7

7 ¹اے بھائیو، کیا تم نہیں جانتے—میں تو اُن لوگوں سے کہہ رہا ہوں جو شریعت سے واقف ہیں—کہ شریعت انسان پر صرف اُس وقت تک حکومت کرتی ہے جب تک وہ زندہ رہتا ہے؟ ²شادی شدہ عورت اپنے شوہر کے جیتے جی شریعت کے مطابق اُس کے ساتھ بندھی رہتی ہے؛ لیکن اگر شوہر مر جائے تو وہ شوہر کی شریعت سے آزاد ہو جاتی ہے۔ ³چنانچہ اگر شوہر کے جیتے جی وہ کسی اور مرد کی بیوی بن جائے تو زناکار کہلاتی ہے؛ لیکن اگر شوہر مر جائے تو وہ اُس شریعت سے آزاد ہے—اور اگر کسی اور سے بیاہ کرے تو زناکار نہیں ٹھہرتی۔ ⁴پس اے میرے بھائیو اور بہنو، تم بھی مسیح کے بدن کے وسیلے سے شریعت کے لیے مُردہ ٹھہرے، تاکہ کسی اور کے ہو جاؤ—یعنی اُس کے جو مُردوں میں سے جِلایا گیا—تاکہ ہم اپنے باپ کے لیے پھل لائیں۔ ⁵کیونکہ جب ہم جسم میں تھے تو گناہ کی وہ خواہشیں، جو شریعت سے بھڑکتی تھیں، ہمارے اعضا میں کام کرتی تھیں تاکہ موت کے لیے پھل پیدا کریں۔ ⁶لیکن اب ہم شریعت سے آزاد ہو گئے، اور اُس چیز کے لیے مُردہ ہو گئے جس نے ہمیں جکڑ رکھا تھا، تاکہ ہم رُوح کے نئے طریقے سے خدمت کریں، نہ کہ لکھی ہوئی شریعت کے پرانے طریقے سے۔

شریعت گناہ کی طاقت کو بے نقاب کرتی ہے

⁷پس ہم کیا کہیں؟ کیا شریعت گناہ ہے؟ ہرگز نہیں! بلکہ میں تو گناہ کو نہ پہچانتا اگر شریعت کے وسیلے سے نہ ہوتا—اور نہ لالچ کو جانتا اگر شریعت یہ نہ کہتی کہ ”جو تیرا نہیں اُس کا لالچ نہ کر۔“ ⁸لیکن گناہ نے حکم کے ذریعے موقع پا کر مجھ میں ہر طرح کی لالچ بھری خواہش پیدا کر دی۔ کیونکہ شریعت کے بغیر گناہ مُردہ ہے۔ ⁹ایک وقت تھا کہ میں شریعت کے بغیر زندہ تھا؛ لیکن جب حکم آیا تو گناہ زندہ ہو گیا اور میں مر گیا۔ ¹⁰اور مجھ پر یہ کھلا کہ وہی حکم جو زندگی بخشنے کے لیے تھا، درحقیقت میرے لیے موت کا باعث بنا۔ ¹¹کیونکہ گناہ نے حکم کے ذریعے موقع پا کر مجھے فریب دیا، اور اُسی حکم کے وسیلے سے مجھے مار ڈالا۔ ¹²پس شریعت پاک ہے، اور حکم بھی پاک اور راست اور اچھا ہے۔

¹³تو کیا جو اچھا تھا وہ میرے لیے موت کا باعث بنا؟ ہرگز نہیں! بلکہ گناہ نے—تاکہ گناہ ظاہر ہو—اُس اچھی چیز کے وسیلے سے مجھ میں موت پیدا کی، تاکہ حکم کے ذریعے گناہ نہایت ہی گناہ آلود ٹھہرے۔ ¹⁴کیونکہ ہم جانتے ہیں کہ شریعت رُوحانی ہے، مگر میں جسمانی ہوں، گناہ کے ہاتھ بِکا ہوا۔ ¹⁵جو میں کرتا ہوں اُسے میں سمجھتا نہیں؛ کیونکہ جو چاہتا ہوں وہ نہیں کرتا، بلکہ جس سے نفرت کرتا ہوں وہی کرتا ہوں۔ ¹⁶اور اگر میں وہ کرتا ہوں جو نہیں چاہتا، تو میں مان لیتا ہوں کہ شریعت اچھی ہے۔ ¹⁷پس اب یہ کام کرنے والا میں نہیں رہا، بلکہ گناہ ہے جو مجھ میں بسا ہوا ہے۔ ¹⁸کیونکہ میں جانتا ہوں کہ مجھ میں—یعنی میرے جسم میں—کوئی نیکی نہیں بستی۔ کیونکہ نیکی کا ارادہ تو مجھ میں ہے، مگر اُسے کر گزرنا مجھ سے نہیں ہو پاتا۔ ¹⁹کیونکہ جو نیکی میں چاہتا ہوں وہ نہیں کرتا، بلکہ جو بدی نہیں چاہتا وہی کرتا رہتا ہوں۔ ²⁰اور اگر میں وہ کرتا ہوں جو نہیں چاہتا، تو اُس کا کرنے والا میں نہیں رہا، بلکہ گناہ جو مجھ میں بسا ہوا ہے وہی کرتا ہے۔ ²¹پس میں یہ اصول پاتا ہوں کہ جب میں نیکی کرنا چاہتا ہوں تو بدی میرے پاس ہی موجود رہتی ہے۔ ²²کیونکہ اپنے باطن میں تو میں اپنے باپ کی شریعت سے خوش ہوتا ہوں۔ ²³لیکن مجھے اپنے اعضا میں ایک اور شریعت نظر آتی ہے، جو میرے ذہن کی شریعت سے لڑتی ہے اور مجھے گناہ کی اُس شریعت کا قیدی بنا لیتی ہے جو میرے اعضا میں کام کرتی ہے۔ ²⁴میں کیسا بدبخت انسان ہوں! اِس موت کے بدن سے مجھے کون چھڑائے گا؟ ²⁵ہمارے باپ کا شکر ہو، ہمارے خُداوند یسوع مسیح کے وسیلے سے! پس میں خود اپنے ذہن سے تو اپنے باپ کی شریعت کی خدمت کرتا ہوں، مگر اپنے جسم سے گناہ کی شریعت کی۔